Txheeb xyuas qhov tseeb txog tej neeg cov kev xav tias yeej yog muaj ib tug twg los tsim tus kab mob coronavirus no los yog muaj ib cov tswv yim kho tau tus kab mob no.
Muaj Australia ib tug kws paub zoo txog cov dej num tswj kev ruaj ntseg rau fab kev noj qab haus huv thiab tej txuj txog cov kev tiv thaiv kab mob ntawm tej tsiaj muaj sia thiab nroj tsuag txhua yam tau los tham txog qhov chiv keeb ntawm tus kab mob coronavirus no, thiab nws cov kev sib kis mus txog rau los txheeb xyuas txog tej kev xav tias seb puas yog ib tug neeg twg yog tus tsim tus kab mob no, los yog ntau yam lus cuam tshuam txog tus mob COVID-19 uas peb yeej tseem tsis tau paub txog qhov tseeb tias yog li cas tiag.
Nyob rau lub caij uas tus kab mob COVID-19 tau sib kis thoob ntuj coob zuj zus tuaj txhua hnub no, yeej tau muaj ib cov kev xav thiab qee cov dab neeg piav txog tus mob virus no uas tseem tsis tau paub tias seb puas muaj tseeb tiag raug coj los tham thoob ntuj lawm.
Tsis hais yog tej social media cov xov xwm mus txog rau ntiaj teb tsoom theej tswj tej kav xav, nrog rau ib cov xov xwm cuav uas tej kws paub zoo txog tej kab mob no hais tias ntshe thaum kawg yuav ua rau muaj teeb meem phom sij tau rau tib neeg txoj sia.
Yuav muaj teeb meem phom sij rau tib neeg txoj sia...Nod yog tej xov xwm cuav ua rau muaj teeb meem sib chab sib caws uas pab tsis tau dab tsi," raws li Adam Kamradt-Scott uas yog ib tug kws paub zoo txog kev ruaj ntseg rau kev noj qab haus huv ntawm tsev kawm qib siab University of Sydney tau qhia rau SBS News.
Txuas ntxiv no mus yog qee cov piv txwv cuam tshuam txog tej lus cuav thiab cov kev xav txog cov kab mob coronavirus (COVID-19) no:
'Yeej yog muaj neeg txhob txwm tsim tus kab mob Coronavirus (COVID-19) no xwb'
Txij li tau muaj cov kab mob no sib kis tsaib no los, ces yeej tau muaj ntau cov kev tawm tswv yim los yog xaus lus uas tsis muaj pov thawj tim khawv txaus los qhia kom tau qhov tseeb txog tias lub chiv keeb ntawm tus kab mob COVID-19 no ho tshwm sim tau li cas tiag.Bronwyn Bishop uas yog ib tug nom ntawm pab nom Liberal Party tau hais tias Suav tuam tshoj yog tus tsim tus kab mob no thiab muaj lub tswv yim coj mus siv ua ib yam tsis zoo dab tsi.
Suav Tuam Tshoj yog tus tsim tus kab mob no los txov tej neeg Suav uas pab tsis tau lub teb chaws Suav ...Kom lawv (Suav) txhob tau yug tej neeg no xwb, raws li Ms Bishop tau qhia rau Sky News. Nws tseem tau hais ntxiv tias Suav tuam tshoj yeej tau npaj "xa cov kab mob virus no coj mus kis rau teb chaws Meskas, thiab kuj tseem sim tias seb tej hauj lwm li hais no puas yuav muaj peev xwm xa mus kis rau ntiaj teb no kom ntiaj teb cov lagluam puas tsuaj.
Tsis tas li no los yeej tseem muaj ib lub tswv yim muaj ntsis xws li no raug coj los sib faib rau hauv tej social media tias lub chiv keeb tiag yeej muaj tus kab mob COVID-19 no tshwm sim ntawm teb chaws Suav ib lub chaw tshawb fawb thiab yeej muaj feem cuam tshuam txog cov kev teeb txheeb uas siv kab mob coj los ua cuab yeej riam phom ua tsov rog.
Hos tib lub tsam thawj no los, tej neeg Suav los kuj muaj lawv ib lub tswv yim xav thiab tias tus kab mob no tshwm sim li cas.
Lijian Zhao uas yog Suav tus pwm tsav tswj lub tuam chav lis laj fai pej kum tau hais tias 'tej zaum yeej yog Meskas cov tub rog yog cov coj tus kab mob no mus kis rau teb chaws Suav.'
Txawm li cas los kuj tau thim nws cov lus xub hais ua ntej no, thiab tsuas rov qab los qhia tis nws tsuas ua pauj rau qhov America cov kev pheej liam tias Suav yog tus tsim cov teeb meem no xwb, thiab cov kev liam thiab kev sib tawm tsam no yuav pab tiv thaiv tsis tau Meskas dab tsi. Nws kuj tau hais ntxiv tias Suav yeej tseem yuav koom tes nrog World Health Organisation (WHO) los daws cov teeb meem no txuas ntxiv.
Meskas tus thawj tsav meem (President) Donald Trump kuj tau sau ib cov lus ntawm nws phau Twitter tias cov kab mob coronavirus no yog Suav cov kab mob 'Chinese virus' no thiab los txog rau hnub im 15 April 2020 no nws tau qhia tias txiav cov nyiaj $400 million tsis pab rau WHO ntxiv lawm vim nws tsis muaj peev xwm lis tau hauj lwm zoo.
Thiaj tau ua rau WHO tau hais tias kom txhob muab cov kab mob no coj los sib tawm tsam ua laj fai kum xeeb thiab kev sib tib tus ub tus no, tab sis tsim nyog yuav tau los sib koom tes tawm tsam nrog tus kab mob no ua ke.
Mahmoud Ahmadinejad uas yog Iran tus qub thawj tsav meem (President) dhau los tau sau ntawv rau ntiaj teb lub koom haum tswj kev noj qab haus huv thiab tau hais kom yuav tsum mus tshuaj ntsuam xyuas cov kab mob uas siv coj los ua tsov rog tawm tsam nrog tib neeg, thiab xav paub tias vim li cas Meskas thiaj tsis txaus siab rau lwm tus neeg cov kev xav cuam tshuam txog tus kab mob no li.
Kuj tseem muaj lwm cov kev xav ntxiv tias, yeej yog Bill Gates uas yog tus tuam los pav lagluam uas tsim lub tuam txhab Microsoft yog tus tsim cov kab mob sib kis no kom nws tau txais txiaj ntsim xwb. Tsis tas li no los yeej tseem muaj ntau yam lus tawm tswv yim thiab cov kev xav ntau yam ntxixv thiab.
Tab sis yeej tsis muaj ib lub tswv yim twg qhia tau qhov tseeb tias xub muaj tus mob coronavirus (COVID-19) no kis qhov twg ua ntej li.
Tej neeg hnav cov khaub ncaws thiab npog qhov ncauj khwb qhov muag ntawm ib lub chaw caij tsheb ciav hlau ntawm tuam ceeb Beijing. Source: Getty
Raws li WHO tau qhia lawm, "yeej muaj pov thawj tim khawv zoo heev qhia tias tus kab mob no kis tau los ntawm ib lub khw muag seafood thiab muag tej tsiaj qus ntawm Suav lub nroog Wuhan rau thaum lig tsaib no (2019)."
Yog li thiaj muaj qee cov neeg uas xub raug txheeb tau tias kis tau tus mob COVID-19 no yeej yog cov neeg uas tau mus ncig los yog tau ua hauj lwm ntawm lub khw hais no.
Kuj tau muaj tej chaw tshaj xov xwm cej luam tawm ntau heev tias, yeej yog tej neeg tau noj ib tug puav lawm ces thiaj li kis tau tus kab mob no xwb, tab sis Associate Professor Kamradt-Scott tau hais tias yeej tsis muaj peev xwm yuav xaus tau lo lus no yooj yim npaum li ntawd thiab.
Txawm nws tau hais tias tej zaum yuav yog puav yog tus muaj cov kab mob no, vim yeej tau muaj lwm hom kab mob coronavirus cuam tshuam txog puav thiab, tab sis kuj tseem yuav muaj lwm yam tsiaj uas tus kis tus mob no ntawm puav los kis rau tib neeg ntxiv thiab.
Tsis tas li no nws tseem hais ntxiv tias Wuhan lub khw no yeej yog thaj chaw yuav muaj ntau txoj xub ke uas yuav peev xwm kis tau tus kab mob ntawm puav rau tib neeg los yog lwm yam tsiaj tau thiab. Ntxiv ntawd los yeej tseem muaj tej tsiaj qus tseem ciaj sia nrog rau cov twb tuag nyob siab ze ua ke uas yog tej chaw cov kab mob viruses thiab bacteria nyiam heev, thiab yeej muaj neeg mus los coob heev mus ncig lub khw no thiab.
Ces thiaj li yog ib thaj chaw uas tej kab mob ntawm tej tsiaj no thiaj yuav kis tau yooj yim heev rau tej neeg ces mam li coj mus kis rau lwm tus neeg ntxiv, raws li Associate Professor Kamradt-Scott tau qhia.
Cov kev txuag tshuaj tua kab mob ntawm Huanan lub khw muag seafood. Source: Getty
Stuart Tangye uas yog tus coj lub laboratory Immunology and Immunodeficiency ntawm lub chaw teeb txheeb Garvan Institute of Medical Research ntawm nroog Sydney tau hais tias "tsis tau pom muaj dua cov xwm txheej uas kab mob kis tau ntawm tej tsiaj rau tib neeg dua los li."
"Cov kab mob Severe Acute Respiratory Syndrome (SARS) virus uas tau sib kis rau xyoo 2002-2003 los yeej sib kis tib yam li no thiab, peb yeej tau pom muaj cov kab mob khaub thuas npua thiab noog uas kis ntawm tej tsiaj los rau tib neeg thiab."
"Thaum muaj tus neeg zoo li Bronwyn Bishop tau hais lus tawm tswv yim txog tej kab mob COVID-19 nrog lub chaw nthuav xov xwm li Sky News rau neeg coob heev thiab tseem qhia tej xov xwm cuav thiab ces thiaj yog tej yam tsis zoo rau tej neeg zejzog, tsis zoo rau tej cai, tsis zoo rau zej tsoom cov kev tswj kev noj qab haus huv thiab tej kws tshawb fawb tawm los tib si."
"Yeej tsis xav kom muaj tej qub nom los tawm tswv yim hais dab tsi tsis tsim nyog, los yog ua lub ntsej lub muag cuam tshuam txog zej tsoom tej xwm txheej mob nkeeg uas yog ib cov xwm kub heev no li."
'Tus kab mob virus no muaj nyob ntawm tej cua thiab'
Associate Professor Kamradt-Scott tau hais tias tau muaj ntau cov xov xwm cuav tau qhia txog tias tus kab mob coronavirusf (COVID-19) no sib kis li cas.
"Yeej tau muaj tej xov xwm ntau heev tau qhia tias tus kab mob no muaj peev xwm sib kis tau raws tej cua, thiab tseem ua rau tej neeg ntseeg li hais ntawd thiab," raws li Associate Professor Kamradt-Scott tau qhia."
"Tab sis pej kum haiv yeej tsis muaj pov thawj tim khawv qhia tau tias muaj tseeb li tau hais ntawd tiag li."
N5CiY3qW_normal.jpgAustralian Government ✔@ausgov Fresh air and exercise are in important part of keeping healthy. Public parks remain open for exercise; but playgrounds & exercise equipment are now closed to slow the spread of coronavirus. Latest information: http://Australia.gov.au #COVID19 #coronavirusaustraliaEUfnXexX0AEEHDi?format=jpg&name=small 509 3:15 PM - Apr 1, 2020 Twitter Ads info and privacy
212 people are talking about this
Associate Professor Kamradt-Scott tau hais tias tej xov xwm cuav no tau ua rau tej neeg totaub yuam kev tias, lawv kis tau cov kab mob virus no li cas, thiab lawv muaj peev xwm yuav ua dab tsi los tiv thaiv kom lawv txhob kis tau tus mob no.
Txawm li cas los tej nom tswv tswj kev noj qab haus huv yeej tau qhia tias, tus kab mob virus no "kis tau los ntawm tej qaub ncaug thiab kua ntswg uas twb muaj tus mob no."
"Tib neeg cov kab mob coronavirus no muaj peev xwm kis tau ntawm tus neeg uas twb kis tau tus mob COVID-19 nyob ze nrog lwm tus, los yog lawv tej qaub ncaug thiab kua ntswg uas tau txham thiab hnoos paug rau tej chaw, los yog tau kov tau chwv tau tuav lawv tes, thiab tej rooj tog pob qhov rooj ntawd," raws li tej xov xwm tswj kev noj qab haus huv ntawm xeev New South Wales tau qhia.
"Tej neeg feem coob uas tau tus mob COVID-19 no yeej yog kis tau los ntawm cov kev tau nyob ze nrog tus neeg uas twb mob tus mob no lawm...[Tab sis] yeej tau muaj ntau cov kev tshawb fawb nrog rau ib cov xov xwm thaum ntxov qhia txog tej mob COVID-19 no yeej qhia tias, tej zaum tus mob no muaj sia nyob tau ntawm tej chaw uas tej neeg mob tau hnoos tau txham paug rau li ntau teev los yog ntau hnub tau thiab."
NYEEM TAU NTXIV
Yeej tau muaj ib cov kev teeb txheeb (research) coj mus cej luam ntawm phau ntawv xov xwm New England Journal of Medicine txheeb tau tias, tus kab mob COVID-19 no tseem muaj sia nyob tau ntawm tej tooj (Copper) ntev txog 4 teev, nyob tau ntawm tej thawv ntawv li 1 hnub, nyob tau ntawm tej roj hmab (Plastic) thiab hlau (Stainless steel) txog li 3 hnub thiab. Tab sis yog ntev tshaj tej sij hawm hais no lawm, ces yuav muaj tej kab mob no tsawg lawm thiab.
Professor Tangye tau hais tias "tseem muaj tej txee tum khoom muag ntawm tej khw muag khoom, tej nqaj tuav kom txhob vau txhob ntog hauv tej tsheb me, tej pob qhov rooj thaum qhib mus rau tej tsev, thiab txhua yam npoo (li npoo rooj-tog etc,.) yuav muaj peev xwm ua rau tus kab mob no nyob tau rau ib lub caij luv luv uas yuav kis tau rau lwm tus thiab."
"Thiaj yog tej yam tseem ceeb heev yuav tau nyob kom nrug ntawm lwm tus neeg, tab sis yuav tsum tu yus tus kheej kom huv si, siv tej tshuaj muaj cawv coj los ntxuav thiab so tej npoo rooj tog, tej chaw ntawd los yog siv tej tshuaj li no los ntxuav tes, los sis siv tshuaj ntxuav tes (soap) los ntxuav tes mas thiaj yuav tua tau tus kab mob virus no."
Thiab nws tseem hais ntxiv tias, cov kev nyob hauv tsev nkaus xwb, thiab tsis pub tej neeg tawm mus nraum zoov li, yeej yog ib cov tswv yim zoo los pab tiv thaiv kom tus kab mob COVID-19 no txhob kis coob ntxiv, tab sis yuav ua rau muaj teeb meem rau teb chaws, thiab ua rau tib neeg muaj kev nyiaj siab ntxov plawv thiab muaj teeb meem cuam tshaum rau lawv txoj kev xav."
'Kuv puas kis tau tus kab mob coronavirus (COVID-19) no los ntawm kuv tus dev thiab'
Yeej muaj ntau cov kev tawm tswv yim tias tej tsiaj yus tu muaj peev xwm kis tau tus kab mob COVID-19 no rau tib neeg. Thiab tseem muaj lus paj lus cua ntau tuaj ntxiv tom qab tau muaj ib tug poj niam thiab nws tus dev ntawm Hong Kong raug txheeb tau tias kis tau tus kab mob coronavirus no lawm.
Txawm li cas los Hong Kong lub tuam chav tswj tej laj fai cog qoob loo, yug ntses thiab ceev txuag tej ib puag ncig (Agriculture, Fisheries and Conservation Department) yeej tau qhia tias "dev yeej kis tau tus kab mob virus no tsawg heev," tab sis hauv internet mas yeej muaj tej lus tawm tswv yim ntau yam txog tej tsiaj no thiab cov kab mob COVID-19 no, ces thiaj tau ua rau muaj teeb meem loj heev rau lub ntiaj teb no.
Yeej tseem tsis muaj ib tug tsiaj kis tau tus kab mob COVID-19 ntawm teb chaws Australia hlo li. Source: Getty
"Tej xwm txheej no thiaj tau ua rau muaj neeg muab lawv tej tsiaj cuam saum tej tsev siab poob los rau pem teb," raws li Associate Professor Kamradt-Scott tau qhia.
Tab sis nws tau hais tias, "yeej tsis muaj pov thawj qhia tau tias tej tsiaj yus tu (dev, miv etc,.) uas nrog yus nyob yuav yog tej yam kis tau tus mob no rau tib neeg li cas."
Xeev New South Wales (NSW) lub tuam chav tswj kev noj qab haus huv los yeej pom zoo nrog lub tswv yim no thiab.
"Yeej tsis muaj lajthawj (reasons) dab tsi ua rau peb xav tias tej tsiaj txhu uas suav tej peb tu nrog peb nyob tib si ntawm teb chaws Australia yuav yog cov yuav kis tau tus kab mob tshiab no."
Vim yeej tseem tsis tau muaj ntawv cej luam qhia li tias tej tsiaj peb tu nrog peb nyob los yog tej tsiaj txhu kis tau tus mob COVID-19 ntawm teb chaws Australia no li," raws li tej xov xwm qhia txog tej kev noj qab haus huv ntawm xeev NSW tau qhia.
Yog li ntawd nyob rau lub caij uas muaj tej xwm txheej no tshwm sim, thiaj tau muaj ib tug kis ntawm Hong Kong lub tuam chav tswj tej dej num cog qoob loo, yug ntses thiab ceev txuag tej ib puag ncig yeej tau qhia tias, "tam sim no yeej tsis muaj pov thawj tim khawv dab tsi qhia tau tias tej tsiaj yus tu nrog yus nyob yuav kis tau tus kab mob COVID-19 no rau tib neeg los yog ua rau tej tsiaj no mob li."
'Tej tshuaj uas tej neeg nyias ua nyias tom tej vaj tse coj los kho tus mob coronavirus'
Yeej tau muaj ntau cov tswv yim coj los tiv thaiv los yog coj los kho tus mob COVID-19 no yeej raug coj mus sib faib sib qhia rau tej neeg hauv social media.
Cov uas muaj neeg nyiam siv tshaj yog noj qej thiab haus cawv kom ntau thiaj tiv thaiv tau tus kab mob coronavirus no. Nyob Middle East thiab nyob Europe los yeej tau muaj ib txhia qhia tias kom rhaub qhiav xyaw dej qab zib (Soda drinks-Coca Cola) los yog rhaub txiv qaub (lemon, lime), tauj dub, los yog siv thuv thiab thwjsuab tov xyaws lwm yam los rhaub haus.
Kuj tau muaj neeg hais tias ib txhia kws kho mob hais kom siv kua qaub teev taum pauv, ntsev los yog lemon los tov dej kub sov so coj los yaug qhov ncua thiab caj pas (qa) txhua hnub, los yog yuav tsum haus dej tshuaj yej, soups, kas fes thiab dej sov txhob cia yus lub qhov ncauj qhuav.
Hais txog ntawm Hmoob ces Hmoob tsuas siv Hmoob kab lis kev cai li fiv yeem los pov puag lawv tus kheej xwb, tab sis qhov tseeb tiag tsis yog ib tug dab ib tug xyw tab sis tsuas yog ib tug kab mob xwb. Txawm li cas los Hmoob yeej ib txwm ua li no ces Hmoob yeej ntseeg tias tej zaum kuj yuav pab tau sab ntsuj plig tab sis yeej tsis muaj pov thawj tim khawv qhia tau tias ua lawm ne ho puas pab tau yus li cas.
Kuj muaj ib txhia siv Hmoob kev fiv yeem, ib txhia kuj siv noob qoob loo ntau yam los kib dai coj ntawm cev, thiab dai ntawm qhov rooj, ib txhia kuj hau qe los kav nrog tshuaj txws liab, ib txhia kuj noj qe, ib txhia kuj noj qee yam nplooj xyoob nplooj uas lawv xav tias yuav tiv thaiv kom txhob kis tus mob coronavirus los yog kom pab lawv kho tau tus mob no. Tab sis yeej tsis tau muaj ib cov pov thawj tim khawv qhov twg coj los qhia tau meej tseeb tiag tias ua li hais no lawm puas yuv pab tiv thaiv tau tus kab mob no los yog kho tau tus kab mob no tiag.
Nyob teb chaws Suav tuam tshoj ntawd ces tej kws paub zoo txog cov mob hawb pob tau hais kom siv dej qab ntsev los yaug qhov ncauj thiaj tiv thaiv tau tus mob no.
Hos nyob ntawm teb chaws America, ces Meskas tus thawj tsav meem (US President) Donald Trump yeej tau hais kom siv cov tshuaj kho mob ua npaws yoov tshaj cum (malaria) hu ua hydroxychloroquine thiab chloroquine coj los kho tej zaum yuav kho zoo thiab, tab sis tsuas muaj ib cov kev tab tom coj tej tshuaj no los tov nrog lwm yam tshuaj coj los sim siv kho xwb yeej tseem tsis tau muaj cov kev ua tib zoo teeb txheeb thiab tshawb fawb kom tau qhov tseeb tiag tias cov tshuaj no tim nrog lwm yam tshuaj puas yuav kho tau tej neeg kom zoo tu qab ntawm tus mob coronavirus tiag tiag.
Noj qej yuav pab kho tsis tau tus mob coronavirus (COVID-19)-World Health Organization
Tab sis World Health Organisation tej ntaub ntawv kuj tau taw qhia tias."Tam sim no yeej tsis tau muaj ib yam tshuaj twg raug teev coj los ua cov tshuaj tiv thaiv thiab kho tus kab mob coronavirusf (COVID-19) tshiab no li."
"Tej neeg kis tau tus mob no yuav tau txais cov kev kho raws li qhov tsim nyog kom pab tau lawv txhob mob hnyav l,os yog yuav tsum tau kho raws tej yam ntxwv mob, thiab tej neeg uas twb mob hnyav heev tsim nyog yuav tau txais cov kev pab cuam kho mob kom zoo."
"Txawm li cas los yeej tau muaj ib cov kev tshuaj ntsuam txog ib cov kev kho tus mob no tsi ntsees lawm, thiab tseem yuav tau ua tib zoo sim tej neeg ua ntej, seb cov tshuaj los yog cov kev kho no siv puas tau hauj lwm zoo thiab tso." Tab sis ntshe tseem yuav siv sij hawm li ntau hli los yog txog xyoo mas seb puas tsim tau cov tshuaj vaccine coj los kho tus mob coronavirus (COVID-19) no.
Donald Trump nrog tej neeg tshaj xov xwm tham. Source: Getty
Txawm tias tej tshuaj uas tej neeg siv tom tsev thiab tej kev qhia cov kev kho tus mob no zoo li yuav tsis muaj teeb meem dab tsi ntau los, Associae Professor Kamradt-Scott tau hais tias 'yog tej yam txaus txhawj xeeb kawg nkaus li thiab.
"Nws qhia tias tom qab Mr Trump tau tawm tswv yim tias xav coj cov tshuaj kho malaria los sim kho kab mob coronavirus (COVID-19) no, ces txawm muaj ib tug txiv neej mus yuav cov tshuaj chloroquine phosphate no los noj qaug thiab tau tas sim neej lawm."
Trump yeej tau hais tas hais thiab tias siv cov tshuaj no kho tus tus mob no zoo lawm," raws li tus txiv neej no tus poj niam tau qhia rau Meskas lub chaw nthuav xov xwm NBC.
Tom qab ntawd Mr Trump kuj tau qhia rau tej neeg tshaj xovxwm tias: "Peb muaj neeg kis tau tus mob no coob heev lawm. Thiab tam sim no peb muaj neeg tas sim neej lawm. Yog tias peb tseem coj ntau yam tshuaj mus sim hauv tej laboratory ces yuav siv sij hawm ntev heev, peb muaj peev xwm cia li sim tej tshuaj no kiag rau tej neeg uas twb mob hnyav lawv los yog tej neeg uas twb yuav tas sim neej lawm xwb. Yog tias kho tau zoo tiag, ces peb ua tau qee yam tseem ceeb heev thiab. Tab sis txawm tias siv tsis tau hauj lwm los, kom peb ho paub tias peb twb sim lawm yeej kho tsis tau tiag."
NYEEM NTXIV:
Associate Professor Kamradt-Scott tau hais tias tej dab neeg cuam tshuam txog cov kev kho tus kab mob COVID-19 uas tsuas ua raws cov kev vam thiab kev nkag siab thiab tej pov thawj ntawm daim tawv ntiav ntiav xwb xwb mas haj yam yuav ua rau muaj teeb meem rau tej kev kho mob no tshaj kis zoo lawm."
Yog thaum twg peb muaj pov thawj qhia tau tias tsim tau ib cov kev kho mob uas kho tau neeg zoo, thiab pab kom tej neeg mob no txhob mob sab sab heev los yog muaj hmoo es ho tsim tau cov tshuaj vaccine uas kho tau tus mob no zoo kiag lawm, ces nom tswv Australia yeej yuav qhia rau zej tsoom sawv daws paub xwb.
Nws tau qhia ntxiv tias "Pej kum haiv yeej tau siv nyiaj ntau billions dollars los sib tw tsim kom tau tej tshuaj vaccine coj los kho tus mob coronavirus (COVID-19) no tib yam li cov kev sib tw tsim kom tau cov riam phom zoo kom lawv muaj fwj chim rau fab peeb zeej thiab fab laj fai kum xeeb lawm thiab."
Liberian 2 tug tub ceev xwm sawv ib sab ntawm ib daim phiaj sau tias 'kab mob ebola yeej yog ib cov kab mob tiag tiag.' Source: Getty
Txawm li cas los tej tswv yim thiab cov kev xav los yog tej dab neeg cuam tshuam txog tej xwm txheej kub cuam tshuam txog kev noj qab haus huv no yeej tsis yog ib cov xwm txheej tshiab dab tsi yog tham txog tiam uas muaj tej social media siv no lawm.
Nyob rau lub caij xyoo 2009 uas muaj cov kab mob npua ua khaub thuas sib kis thoob ntuj ntawd, yeej tau muaj ib cov tswv yim cav tias yog ib cov xwm txheej dag uas America tus thawj tsav meem Barack Obama dag kom tsim tau ib cov kev kho mob coj los siv pab thoob plaws rau lub teb chaws America xwb.
Kuj tseem tau muaj ib lub tswv yim cav ntxiv tias yog America lub chaw soj xwm qab rooj (Centreal Intelligence Agency-CIA) tsim tus kab mob virus no coj los ua kom nws muaj peev xwm npaj yuav tau tej twj kho mob ntau yam tshiab coj los npaj tseg cia kom tau siv xwb thiab.
Hos nyob rau lub caij muaj tus kab mob Ebola sib kis ntawm cov teb chaws cheeb tsam hnub poob ntawm Africa ntau lub rau xyoo 2013-2016 ntawd, ces yeej tau muaj lus paj lus cua tias tau muaj ib tug tsoom hwv txhob txwm tsim tus kab mob no coj los txov kom txhob muaj tej neeg txom nyem coob lawm xwb, ntxiv ntawd los kuj tseem muaj cov xav tias yog pej kum haiv tsim tus mob no ua kom txhob muaj neeg coob ntawm ceeb tsam no teb chaws no kom lawv tau tej peev txheej xwb.
Associate Professor Kamradt-Scott uas tau mus rau cov teb chaws West Africa rau lub caij muaj cov kab mob Ebola no sib kis tau qhia tias, yeej muaj tej xov xwm cuav thiab muaj cov kev to taub yuam kev txog tus kab mob no loj heev, ces tej tsoom hwv thiaj tau siv sob lus muaj 3 lo lus li: 'Ebola is real"-los yog "kab mob Ebola yeej yog ib cov kab mob muaj tseeb tiag" coj los taw qhia rau zej tsoom sawv daws.
"Xav kom peb yuav tsum mloog cov kev taw qhia ntawm tej nom tswv tswj kev noj qab haus huv uas txaus ntseeg xwb, tsis txhob mloog tej neeg uas tau nyeem xov xwm hauv internet los yog tej lus lawv tau hnov los ntawm yim neeg nyob ze lawv tus tub tus ib tug thaj kub thaj tim uas hnov lawv yim neeg txheeb ze qhia rau lawv."
"Cov kab mob coronavirus (COVID-19) yog cov kab mob nyaum heev txog theem uas pauv siav ciaj thiab siv tuag lawm xwb. Peb thiaj xav kom nej yuav tsum tau kub siab tiag tiag."
