Australia lub tuam chav tswj dej num txawv teb chaws thia lagluam (Department of Foreign Affairs and Trade - DFAT) tau thov txim rau tej cuab yig uas muaj ob tug hluas neeg Australia ris hnab ncig teb chaws uas tau tas sim cuam tshuam nrog tej taug cawv methanol hauv Nplog teb vim tsis qhia xov xwm txog ib rooj plaub cuam tshuam txog ob tug neeg uas tas sim neej no.
Tej xwm txheej tas sim neej ntawm cov taug cawv methanol ntawm Vang Vieng
Holly Morton-Bowles thiab Bianca Jones uas muaj hnoob nyoog 19 xyoos tib yam tau tab tom ev hnab ncig teb chaws Nplog rau yav lig xyoo 2024 thaum uas nkawv cov kev ntoj ncig tau ras los ua ib co xwm txheej txaus ntshai thiab txaus tu siab heev.
Ob tug ntxhais hluas ntawm Melbourne no tau haus cawv tsuas cov taug methanol thaum nkawv tseem tab tom haus cawv rau ib hmo ntawm lub tsev tos qhua Nana Backpackers Hostel ntawm Vang Vieng.
Ces thiaj muaj tej neeg txawv teb chaws yam tsawg li 6 leej tau tas sim neej rau lub caij muaj neeg qaug cov taug cawv coob heev no rau thaum lub 11 hlis ntuj xyoo 2024, suav tus poj niam neeg Askiv hu ua Simone White, ib tug neeg ntoj ncig neeg Meskas thiab ob tug poj niam hluas neeg Denmark.
Holly txiv uas yog Shaun Bowles tau hais tias yeej tsis muaj xov xwm dab tsi ntawm tsoom fwv Australia qhia txog nom tswv Nplog cov kev tshuaj ntsuam txog nws tus ntxhais cov kev tas sim neej li.
Rooj plaub taug cawv methanol uas tej neeg tas sim neej ntawm Nplog teb
Bowles thiab Bianca txiv uas yog Mark Jones tau hais tias lawv tau nrog ib pab neeg tham nrog White tsev neeg txog tej xov xwm tshiab uas tau los ntawm tsoom fwv Askiv vim rau qhov zoo li yeej tsis muaj cov kev sib txuas lus dab tsi ntawm nom tswv Australia li.
Ces ob tsev neeg no thiaj paub tias muaj 10 tus neeg cuam tshuam nrog lub tsev tos qhua ntawd rooj plaub uas tau hais rau lub 1 hlis ntuj (2026) thiab tej neeg no tsuas raug nplua $185 rau lawv cov kev muab tej pov thawj txov pov tseg xwb.
Tej neeg uas muaj feem cuam tshuam no los kuj raug ncua tsis raug txim rau lawv thiab raws li pab neeg sib tham no hais.
Txawm tias Nplog lub tsev hais plaub rau txim me rau tej neeg cuam tshuam nrog rooj plaub no, los zoo li yeej tsis tsub txim dab tsi rau tej neeg no uas tau ua rau ob tug neeg Australia ris hnab ncig teb chaws uas tau tas sim neej li.
Peb xav tias zoo li yeej tsis muaj cov kev tsub nias kom txaus rau tsoom fwv Nplog kom kub siab txog tej xwm txheej no li. Peb tsis muaj peev xwm mus tau rau lub teb chaws no, thiab peb tsis muaj lwm txoj xub ke lawm — thiab peb xav kom tus tsoom fwv no pab peb.Bowles tau qhia rau 3AW hnub zwj Quag (Tuesday)
Tej lus taw qhia rau tej hluas ntoj ncig
Bowles thiaj tau taw qhia kom tej hluas ntoj ncig tsim nyog nco qab ntsoov txog tej xwm txheej no ntawm teb chaws Nplog thiab kub siab txog lwm haiv neeg.
Tsis txhob mus. Peb yeej tau pom ntawm peb qhov muag kiag lawm. Lawv (Nom tswv Nplog) yeej tsis kub siab txog tib neeg txoj sia li, thiab lawv yeej tau qhia tias lawv tsis kub siab txog tej xwm txheej no li.Bowles tau hais tias.
Txawm tias thaum chiv thawj tej cuab yig no tau ntseeg tias rooj plaub no tau cuam tshuam nrog lawv cov ntxhais cov kev tas sim neej, los DFAT tau qhia meej tias tej pov thawj uas raug txov ntawd tsuas cuam tshuam txog tus neeg Meskas cov kev nruam sim xwb.
Txij ntawd los lub tuam chav no thiaj tau thov txim rau cov yim neeg no vim lawv tsis qhia tej xov xwm kom lawv paub txog rooj plaub no seb txiav txim li cas lawm, thiab yeej lees tias lawv ''lawv ua tsis tau raws li peb cov kev cia siab."
Thawj pwm tsav hais tias 'Australia cia siab tias tsoom fwv Nplog yuav ua tus lav tus ris tag nrho tej xwm txheej no'.
Nyob hauv tsev tsoom fwv hnub zwj Quag (Tuesday) ces thawj pwm tsav Anthony Albanese tau hais tias yeej yog tej yam tsim nyog lawm uas DFAT tau thov txim rau cov kev tsis muaj kev sib txuas lus nrog Australia ob tsev neeg no.
Albanese hais tias "(Australia) tus nom tswj dej num txawv teb chaws yeej tau qhia meej tseeb rau Nplog tus nom tswj dej num txawv teb chaws hauv teb chaws Nplog lawm tias Australia yeej cia siab tias Nplog yuav lees ris tag nrho tej teeb meem no, thiab tsim nyog yuav rau txim raws li qhov tsim nyog rau li tej xwm txheej phom sij no."
"Peb yeej yuav koom tes nrog nom tswv Nplog txuas ntxiv rau tej plaub ntug no thiab peb yeej yuav ua txhua yam raws li qhov peb muaj peev xwm ua tau los pab Holly thiab Bianca tsev neeg rau lub caij uas nyuaj siab heev no."
Victorian Premier Jacinta Allan uas yog tus hau xeev Victoria los yeej tau xub ntsib ob tsev neeg uas tau muaj ob tug hluas tas sim neej no dhau los thiab kuj tau hais tias tej txheej txheem hauj lwm no haj yam ua rau lawv tu siab xwb.
Nws tau qhia rau tej neeg nthuav xov xwm hnub zwj Quag (Tuesday) tias "Yeej tsis muaj peev xwm muaj cov kev txiav txim plaub ntug no xam tias yog ib co kev raug txim li, puas yog mas? Tsuas yog tej yam uas txaus tus siab heev xwb."
Nyob rau ib co ncauj lus uas Sussan Ley uas yog tus coj ntawm lwm pab nom teb chaws thiab Michaelia Cash uas yog lwm pab nom teb chaws Australia tus nom tswj dej num txawv teb chaws tau nqua hu kom Nplog tus nom lis teej faj (ambassador) los ''tshab txhais txog tej xwm txheej no raws kev raws cai".
Nkawv tau hais tias "Tsoom fwv Albanese yuav tsum tau tshab txhais kom meej tseeb tias vim li cas nws tej nom tswv thiaj tsis muaj cov kev sab laj thiab pab cuam thiab ua tsis tau tej hauj lwm no, thiab vim li cas thiaj tsis ua tib zoo qhia ob tsev neeg Holly thiab Brianca txog tej xwm txheej tau tshwm sim no."
Tsoom fwv Nplog yeej tau xub cog lus ua ntej lawm tias ''yuav coj tej neeg ua txhaum los rau txim raws li nws tej cai lij choj".
SBS News yeej tau sib txuas lus nrog Nplog lub embassy tas sis nws kuj tsis tawm tswv yim dab tsi txog tej no.
Mloog tau xov xwm tshiab ntawm SBS Hmong, download SBS Adio app thiab caum SBS Hmong Facebook page.
