Meskas tus thawj tsav meem Donald Trump tus tub hu ua Eric Trump cov lus hais tias tom qab xaiv tsa nom tswv teb chaws America tag lawm ces tus kab mob coronavirus no yuav cia li ploj mus tag lawm no tau ua rau muaj neeg tib nws heev.
Meskas tus coj tus tub nrab no hais tias tus kab mob COVID-19 no tsuas yog Joe Biden uas yog tus neeg sawv cev rau pab nom Democrats ib lub tswv yim nws yeej paub zoo npaj tseg coj los tsim teeb meem rau cov kev xaiv tsa America tus president xwb.
US President Donald Trump. ABACA
"Lawv xav tias lawv yog lawv muaj peev xwm mus hais lus nrhiav suab rau txhua txhua qhov chaw twg es muaj neeg txog li 50,000 tus koom rau ib zaug twg ntawd ces yuav muaj peev xwm muab Donald Trump ib co twj tseem ceeb tshaj plaws tshem tawm tau lawm,'' raws li Eric Trump tau qhia rau lub chaw nthuav xov xwm Fox News.
"Nej sim saib mus ntxiv od-lawv yeej yuav ua li no txhua txhua hnub tam sim no mus txog hnub tim 3 lub 11 hlis ntuj tiag. Tab sis tom qab hnub tim 3 lub 11 hlis ntuj lawm ces yeej yuav tsis muaj tus kab mob no thiab yeej yuav cia li ploj mus lawm xwb thiab txhua leej txhua tus yeej muaj peev xwm rov qab los qhib thiab pib ua tau lub neej dua lawm."
''Txawm li cas los tej kws paub zoo txog zej tsoom txoj kev noj qab haus huv yeej tau ceeb toom rau sawv daws tias ntshe tseem tshuav ntev yam tsawg li 1 xyoos 6 hlis ntxiv mas seb puas yuav muaj peev xwm tsim tau tus tshuaj kho tus kab mob COVID-19 no, thiab limtiam dhau los World Health Organization yeej tau ceeb toom tias ntshe tus mob coronavirus no yuav zoo li tus mob HIV uas tseem yuav sib kis txuas ntxiv.
Txawm tias yeej muaj muaj tej kws tshawb fawb thiab kws teeb txheeb tau los sam sim tsim cov tshuaj vaccine no tshaj 100 hom rau ntau theem sij hawm uas sib txawv lawm los, tej kws paub zoo txog tej hauj lwm no yeej tau ceeb toom tias ntshe yuav tsis muaj peev xwm tsim tau tej vaccine zoo coj los siv tau yooj yim thiab Mike Ryan uas yog WHO ib tug kws paub zoo txog tej teeb meem ceev xwm tau hais tias ' ntshe tus kab mob no yeej yuav tseem muaj txuas ntxiv li no mus."
Meskas yog ntiaj teb lub teb chaws uas muaj neeg kis tau tus mob no coob tshaj plaws txog li 1.5 million tus thiab twg muaj neeg coob tshaj plaws tshaj 90,000 tus tas sim neej lawm.
Eric Trump cov lus tawm tswv yim no thiaj tau ua rau muaj neeg coj los piv rau nws txiv cov lus tawm tswv yim rau lub 2 hlis ntuj dhau los, thaum muaj tej neeg tshaj xov xwm tau nug nws tias thaum twg mam li tsis muaj tus kab mob no ntxiv lawm ces Mr Trump tau teb rau lawv tias ''sai sai no ces tus kab mob no cia li yuav txawj ploj yaj ntshis mus li lawm xwb."
Kate Bedingfield tus coj uas pab Mr Joe Biden nrhiav suab rau cov kev xaiv tsa thiaj li tau tawm tswv yim rau hnub zwj Hli (Monday) dhau los tias Mr Eric cov lus tawm tswv yim no mas ''yog tej yam txawv thiab tsis txaus ntseeg kiag li."
"Vim sawv daws yeej paub qhov tseeb tias President Trump yeej tsis kub siab txog tej teeb meem uas tus kab mob coronavirus yuav tsim tau rau tej neeg los tau ntau hli no thiab yeej tsis ua zoo los nrog xyuas txhua txhua kauj ruam txij thaum ntawd los txog tam sim no li."
“Trump tej neeg nrhiav suab rau nws cov kev xaiv tsa yeej paub tias nws tsis muaj peev xwm yuav los sib tw nom yog tias nws lis tsis tau tej hauj lwm no zoo, yog li ntawd lawv thiaj kawg tswv yim thiab yuav ua txhua yam kom zais npog tau tej hauj lwm lawv tsis muaj peev xwm tswj tau rau lub caij muaj tus kab mob tseem sib kis no."
READ MORE
Ces thiaj tau ua rau muaj tej xov xwm cuav coj los qhia txog tus kab mob coronavirus no, qhia tias leeej twg yog tus tsim thiab yuav muaj tus kab mob no sib kis ntev npaum li cas ntxiv txij li thaum tau pib sib kis los no.
Graphika uas yog ib lub tuam txhab tshuaj ntsuam txog tej kiab khw thiab tej social media tsab ntawv cej luam tau coj los qhia rau lub 4 hlis ntuj yeej txheeb tau tias yog cov neeg right-wing uas tsis nyiam cov kev pauv hloov tau qhia tias tej zaum yeej muaj tej xov xwm cuav cuam tshuam txog tej neeg kis kab mob rau tej chaw sib kis coob heev no kis muaj ceem tshaj 4 npaug tib yam li cov neeg left wing cov xovxwm cuav thiab.
Joe Biden's campaign has labelled Eric Trump's comments "unbelievably reckless".
AP
Ces thiaj tau muaj Mr Trump tus tub cov lus tawm tswv yim no rau lub caij uas tus coj ntawm pab nom Republicans tau kub siab los npaj kom tau tej neeg li 2 npaug txog li 10,000 tus ntawm North Carolina mus koom sab laj thiab seb lawv puas yuav xaiv nws pab nom rau lub caij ntuj so no thiab. Thiaj tau ua rau pawg rooj saib xyuas pab nom Republican (Republican National Committee) tau coj ib tsab rooj ncauj lub los qhia rau 2 hnub so dhau los tias nws tseem yuav tau mus nrhiav kom tau tej neeg ntxiv txog li ntawm 50,000 tus ntxiv mus koom lub rooj sab laj rau hnub tim 24 lub 8 hli ntuj thiab txawm tias tseem muaj tus kab mob coronavirus sib kis thoob ntuj txuas ntxiv.
