Thawj pwm tsav Anthony Albanese tau muaj cov kev sib khom lagluam rau tej tooj hlau tseem ceeb thiab muaj tsawg (Rare earths and critical minerals) ruaj rau lub caij nws tau koom thawj lub rooj sab laj nrog Meskas tus thawj tsav meem (President) Donald Trump, txawm li cas los kuj tseem tsis tau paub txog cov kev sib khom no ntxaws thiab.
Trump tau hais tias ''yeej tau muaj cov kev sib khom no tau 4 los yog 5 lub hlis lawm,'' thaum nws tau koom nrog Mr Alabanese nrog tej neeg nthuav xov xwm tham ntawm tsev dawb rau thaum sawv ntxov hnub zwj Quag (Tuesday).
Australia yog lub teb chaws uas muaj xuab zes uas yog tej peev txheej tooj hlau (mineral sands) ntau tshaj plaws hauv ntiaj teb, uas yog ib co tseem ceeb yuav muaj peev xwm coj los siv ua tej technology huv (green energy technologies), thiab coj los siv tsim xov tooj (semiconducter chips) thiab riam phom.
Raws li ntiaj teb lub koom haum International Energy Agency hais ces tej teb chaws vam meej yeej tau cuam tshuam nrog Suav cov kev muaj peev xwm los ua tus tswj xa thiab siv tej khom hais no los ntev — vim rau qhov Suav yog tus khawb thiab nchuav tej tooj tej hlau no txog 70 los yog 90 feem pua.
Lub caij uas Beijing tswj tej cai tsis pub xa tej khoom no muag txawv teb chaws nruaj tuaj ntxiv, thaib hawv tias tsuas tsim ib nrab xwb, thiaj tau ras los ua ib co kev tsis sib haum xeeb ntawm Meskas thiab Suav. Australia thiab Meskas cov kev tau kos xyeem mem tes sib khom pom zoo rau tej peev txheej no thiaj cia siab tias yuav tawm tsam nrog Suav cov kev muaj peev xwm los ua tib tug tswj tej no.
Trump tau hais tias "Ib xyoos txij no mus ces peb yuav muaj tej critical minerals no ntau heev lawm ... uas peb tsis paub tias xyov yuav coj mus siv li cas,"
Txawm tias tseem tsis tau qhia cov kev sib khom no kom ntxaws los Albanese tau qhia tias Australia thiab Meskas ib tog twg yuav pab nyiaj $1 billion ua tej hauj lwm no rau lub caij 6 hli ntxiv no.
Nws tau hasi tias "tsis yog tib co kev khawb tej peev txheej no nkaus xwb,'' thiab tab sis yog cov kev yuav tsim cov ib co projects raug nyiaj txog $8.5 billion.
Albanese tau tshab txhais tias "Peb lub tswv yim tsim ntawm Australia ces tsis yog cov kev khawb tej peev txheej thiab xa muag txawv teb chaws xwb, tab sis yog peb kev ua tib zoo xyuas kom peb siv tau tej supply chains nrog peb tej phooj ywg, thiab kom tau txais txiaj ntsim thiab siv tej cib fim no,''
"Thiab kuj yog ib cov kev los npaj tej no thiab yog ib co kev koom tes ntawm Australia thiab Meskas."
Muaj peb yam tseem ceeb ntawm cov kev sib khom no li: koom nqes peev rau cov lagluam khawb tooj hlau tseem ceeb uas muaj tsawg ntawm Australia thiab Meskas, Meskas cov kev nqes peev ntawm teb chaws Australia los khawb thiab nchuav tej tooj hlau tseem ceeb no thaib tau npaj ntau cov projects ntawm Meskas, Australia thiab Japan.
Cov kev sib khom no yuav koom tes nrog ntau cov supply chains los txheeb seb ho muaj tej yam tseem ua tsis tau zoo thiab kub siab los txheeb tej nqe thiab cov kev ua luam uas tsis tau txais kev ncaj ncees rau.
Tsev dawb ib co ncauj lug hais tias ob tug tsoom fwv no yuav siv nyiaj $USD 3 billion ($AUD 4.61 billion) rau lub caij 3 hlis ntxiv no.
Tom qab tau nrog tej neeg nthuav xov xwm sib tham lawm ces tsoom fwv Albanese tau qhia txog cov kev nqes peev rau 2 co projects.
Cov kev nqe peev no ces yog yuav siv nyiaj USD$200 million (AUD$307 million) coj los txhawb nqa cov Alcoa-Sojitz Gallium Recovery Project ntawm Wagerup (coj los tsim cov semiconducter chips, khoom siv electronics), ntawm xeev Western Australia thiab nqes peev USD$100 million (AUD$154 million) rau cov Arafura Nolans project ntawm Northern Territory uas yuav khawb cov peev txheej (neodymium thiab praseodymium) uas siv ua tsheb siv hluav taws xob, phiaj ziab tshav tsim hluav taws xob thiab tej khaub lig cua tsim hluav taws xob).
Uas ob co project no yuav khawb tau tej peev txheej tooj hlau tseem ceeb coj los pab tej hauj lwm tub rog thiab tsim kom tau hluav taws xob ruaj siv raws li tsoom fwv hais.
Albanese tau hais ib co ncauj lug tias "Cov kev koom tes rau cov peev txheej tseem ceeb thiab cov kev xyuas kom xa tau tej khoom no siv yog tej yam uas Australia thiab Meskas uas yog ob lub teb chaws muaj kev sib ntseeg siab yuav ua raws li tej tswv yim ntawm ntau cov teb chaws phooj ywg tej hauj lwm tiv thaib teb chaws uas npaj tseg yuav ua raws."
"Kuv cia siab tias yuav koom tes ua hauj lwm ua ke nrog President Trump los txhawb nqa cov kev koom tes no kom zoo tshaj qub ntxiv thiab pab Australia thiab Meskas tej neeg ua hauj lwm, tej lagluam thiab tej neeg nqes peev lagluam."
