"Peb xav xa peb txoj kev xav thiab peb cov kev thov vaj tswv foom lus zoo rau cov neeg raug tej teeb meem no thiab lawv tsev neeg los yog tej neeg raug mob vim cov xwm txheej phom sij phem heev no. Peb tsis pom zoo thiab yuav tsis cia kom muaj tej tswv yim phem tua neeg thiab tsim kev kub ntxhov rau peb lub teb chaws thiab tej neeg zejzog. Cov neeg Australian caj ceg Somali yog ib cov neeg nyiam kev thaj yeeb, cov tswv yim tsim teeb meem phem thiab tua neeg no yog ib cov kab mob rau peb lub teb chaws, yog li peb yuav tsum tau ua txhua yam los rho cag kom txhob muaj cov kev phem no ntxiv.Tam sim no yog lub caij peb yuav tau los sib sau koom npoj thiab koom tes ua ke tawm tsam nrog tej tswv yim phem uas xav tua neeg thiab tsim kev kub ntxhov no.Peb thov ua tsaug rau nom tswv tej tuam chav tswj cai lij choj thiab tej neeg uas tau los pab cov raug tej teeb meem no thiab txhua txhua tus neeg Australia yeej yuav los sib koom tes puag xwb pwg tawm tsam kom muaj yeej nrog tej xwm txheej phom sij piam sij puas ntsoog no tau xwb," Somali Community of Victoria.
Taug tau cov xwm xwm tshiab tau ntawm SBS News ntawm no.
Tub ceev xwm Victoria paub thiab qhia meej lawm tias tus txiv neej uas xuas rim nkaug 3 tug neeg thiab zes taws rau nws lub tsheb ntawm nroog Melbourne rau thaum yav tav su dua hnub zwj Kuab (Friday 09.11.2019) ntawd yog ib cov xwm txheej cuam tshuam txog cov neeg phem.
Lawv txheeb tau tias tus neeg no yog Hassa Khalif Shire Ali muaj hnoob nyoog 30 xyoo thiab yog ib tug neeg Australian caj ceg neeg Somalian.
Tau muaj cov xwm txheej sib nkaug ntawm txoj kev Bourke Stree hauv nroog Melbourne Central Business District -CBD thaum Mr. Khalif tau zes taws hlawv nws lub tsheb cig lam lug, ces txuas ntxiv ntawd nws txawm cia li xuas riam muab peb tug neeg nkaug ua ntej tub ceev xwm los tswj nws, tab sis nws tseem siv rab riam hom rau ub rau no yuav nkaug cov tub ceev xwm ntxiv, ces tub ceev xwm thiaj xuas phom tua nws hauv siab thiab tau tas sim neej tom tsev kho mob tom qab ntawd lawm.
Tub ceev xwm teb chaws thiab xeev Victoria lub chaw tswj kev ruaj ntseg haiv thiaj tau los tshuaj ntsuam cov xwm txheej no tom qab cov neeg phem IS tau tawm los lees tias lawv yog tus txib kom tsim tej teeb meem no, tab sis tej neeg phem yeej tsis muaj pov thawj tim khawv dab tsi coj los qhia tias lawv yog tus tsim tiag.
Txawm li cas los Graham Ashton uas yog tus coj tub ceev xwm xeev Victoria yeej qhia tias tus neeg tsim cov teeb meem no yeej yog ib tug nom tswv soj nws qab thiab.
Thiab Mr. Ashton yej tau qhia rau lub tuam chav nthuav xov xwm Nine Network tias txawm nom tswv yeej paub tias tej zaum tus neeg no yuav tsim teeb meem kub ntxhov los yeej yog ib cov xwm txheej ua rau sawv daws ceeb thiab.
"Nws yeej yog ib tug neeg uas peb paub zoo, tab sis raws li tej xov xwm peb txheeb ib hmo dhau los ntawd ces nws kuj tsis raug nom tswv soj qab taug lw seb nws ua dab tsi li." "Zoo li nws yeej tau sim zes taw rau ib cov khoom nws npaj ntawd thiab ces cub hluav taws thiaj cig loj tuaj lawm. Muaj cov thoob hlau ntim gas thiaj ua rau kob hluav taws cig loj tuaj lawm. Dua ntawd ces yeej tsis muaj dab tsi ntau. Thiaj ua rau lub tsheb kub hnyiab cig lam lug thiab cov neeg tua hluav taws twb tua tau cov hluav taws kub ntawm lub tsheb no lawm."
Australia tus thawj pwm tsav Scott Morrison thiab Bill Shorten uas yog tus coj ntawm lwm pawg fai kum xeeb thiaj tau cem thiab thuam tsis pom zoo nrog tej xwm txheej tau tshwm sim no.
Tus tseem hwv xeev Victoria no los yeej qhia tias tag kis no sawv ntxov (10.11.2018) no nws pawg tim tseeb tswj thiab tawm tsam nrog cov neeg phem twb tau sab laj txog cov xwm txheej tau tshwm sim rau hnub tim 9 dhau los thiab twb npaj ib cov tswv yim los nrog xyuas cov teeb meem no lawm.
Hnub zwj Kuab (Friday) tim 09.11.2018 dhau los, Daniel Andrews uas yog tus coj xeev Victoria tau hais kom pej xeem Victorians kav tsij ua lawv lub neej li qub.
"Peb yuav tsis cia tej xwm txheej no ua rau peb lub nroog los yog lub xeev no puas koob npe thiab peb yuav tsis pub kom muaj tej no tshwm sim. Peb yuav ua peb lub neej li qub tsis hais yog 2 hnub so no los yog lwm cov hnub so ntau hnub uas tseem yuav muaj ntxiv no. Vim peb yeej muaj peev xwm tshaj thiab muaj zog tshaj tej xwm txheej tau tshwm sim no thiab yuav tsis cia tej xwm txheej no los ua ib co kev rau lwm tus ntaus nqe yuam kev rau peb ntxiv."
Opposition leader Matthew Guy uas yog tus coj ntawm lwm pawg fai kum xeeb ntawm xeev Victoria (Opposition leader) thiaj xav kom yuav tsum tsim ib cov cai thiab tswv yim coj los siv thiaj yuav muaj peev xwm tiv thaiv kom txhob muaj dua tej xwm txheej zoo li no ntxiv lawm.
"Tsis muaj laij thawj dab tsi tsim nyog nws coj tej cuj pwm zoo li no li, tsis hais yog cov xwm txheej xav tua neeg tsim kev kub ntxhov, los yog lwm yam cuam tshuam ntawd. Yog li peb thiaj yuav tsum tau siv txhua yam peev txheej uas peb lub xeev muaj coj los tawm tsam thiab rho tej kev phem no tej cag kom tu noob txhob muaj ntxiv li lawm. Tsis tsim nyog peb yuav ua lub neej nyob nrog tej teeb meem zoo li no. Cov pej xeem Melbourne tsis tas yuav nyiaj ntxeem nrog tej xwm txheej zoo li no, vim twb yog cov xwm txheej zaum 3 tau tshwm sim muaj rau ntau lub xyoo no lawm."
Yog li nom tswv pawg neeg tawm tsam nrog tej neeg phem thiaj li tau mus txheeb xyuas tus neeg no ntxiv thiab tau mus tshawb 2 lub tsev ntawm Werribee thiab Medow Heights ntxiv.
Ian McCartney uas yog tus lwm coj tub cev xwm teb chaws (Australian Federal Police - AFP) rau cov hauj lwm tswj kev ruaj ntseg haiv tau qhia tias Mr. Shire Ali yeej muaj tswv yim coj nruj tsiv xav ua phem rau lwm tus ces nom tswv Australia thiaj tsis pub nws siv passport rau xyoo 2015 lawm thaum ASIO tau txheeb xyuas nws cov kev npaj yuav mus rau teb chaws Syria ntawd.
Ian McCartney tau qhia tias nom tswv yeej tsis xav tias nws yuav yog ib tug neeg tsim tau tej teeb meem pheej hmoo cuam tshuam txog Australia txoj kev ruaj nseg haiv no li.
"Tham txog cov kev txheeb xyuas tus neeg no lawm ces nws yeej tsis yog ib tug uas peb lub koom haum tswj kev ruaj ntseg thiab tawm tsam nrog cov neeg phem txheeb xyuas thiab tshuaj ntsuam xyuas txog li. Raws li cov kev txheeb xyuas rau lub caij nws npaj tej tswv yim no ces zoo li nws yuav tsis tsim teeb meem pheej hmoo dab tsu rau peb haiv neeg txoj kev ruaj ntseg. Yog li peb thiaj tseem yuav los txheeb xyuas tias muaj dab tsi ua rau nws hloov tus cuj pwm los ua phem thiab tsim tej xwm txheej li tau tshwm sim nag hmo ntawd ntxiv seb yog tim li cas tiag."
Richard Marles uas yog pab nom Labor tus pwm tsav tswj cov lagluam tiv thaiv teb chaws tau nqua hu kom pej xeem Australia kav tij ua lawv lub neej li qub tom qab tau muaj tej xwm txheej tau tshwm sim ntawm nroog Melbourne no.
Mr Marles tau qhia rau tsev nthuav xov xwm ABC tias kom pej xeem Australia tso siab thiab ntseeg siab rau tseem hwv tej cai thiab tej hauv kev tawm tsam nrog tej neeg phem no thiab.
"Kom sawv daws pom tias peb yeej tau ua ntau yam hauj lwm los tawm tsam nrog cov neeg phem no los tau ntev lawm. Yog tej yam txaus tu siab heev uas tsam sim no tej tswv yim tsim kev kub ntxhov thiab tua neeg tau ras los ua ib feem ntawm peb lub neej lawm, tsis yog ntawm xeev Victoria no xwb tab sis tag nrho rau teb chaws Australia no thiab rau ntiaj teb tib si. Tab sis peb yeej muaj peev xwm tawm tsam nrog tej neeg phem no tau zoo heev txawm li cas los peb yeej tseem yuav tau ua tib zoo xyuas thiab yuav tau ceev faj kom zoo tshaj no ntxiv. Vim tseem muaj ntau yam dej num yuav tau los nrog lis. Peb yuav tau kos kho peb tej cai kom siv tau zoo uas peb yeej tseem tab tom nrog xyuas lawm thiab yuav tau ua zoo xyuas kom peb tej tuam chav tswj thiab tawm tsam nrog tej neeg phem no yuav tsum muaj peev txheej txaus thiab muaj peev xwm los tawm tsam nrog tej neeg phem uas nom tswv yeej tau los nrog xyuas lawm thiab."
