Tau muaj neeg phem caij tseb van (tsheb tub) khiav ceev heev mus nrau neeg rau ntawm teb chaws Spain lub zos Las Ramblas nroog Barcelona uas muaj cov neeg nyiam mus ncig ua si coob heev ua rau muaj neeg yam tsawg li 16 leej tau tas sim neej lawm thiab muaj neeg coob tshaj 100 tawm leej raug mob thiab da pawg lug hauv pem teb ntawm thaj chaw ntawd rau lub sij hawm muaj cov xwm txheej no tshwm sim rau hnub zwj Teeb (Thursday) zwj thaj tim 17/08/2017 dhau los. Kuj tau muaj neeg Australia yam tsawg li 1 leeg raug mob sab heev nrog rau 18 haiv neeg uas raug cov teeb meem no raws li lub chaw nthuav xov xwm A-F-P tau tshaj tawm.
Nom tswv tseem sam sim nrhiav cov neeg phem no thiab cov neeg phem I-S (ISIS) tau tawm los lees tias lawv yog tus tsim cov teeb meem no. Lawv txheeb tau tais muaj 2 tug txiv neej, ib tug yog neeg Moroco hos ib tug yog cov neeg North African ntawm teb chaws Spain daim av Melilla los kuj raug txhom tau lawm tab sis 2 tug neeg no tsis yog tus neeg tsav lub tsheb tub (van) mus nrau cov neeg.
Tom qab tau muaj cov xwm txheej tsheb nrau neeg no tas lawm, ces tus neeg tsav tsheb no cia li xuas taw pliab khiav lawm xwb. Cov neeg phem hu ua I-S tau tawm los lees tias lawv yog cov tsim cov xwm tsheej teeb meem no.
Spain's Prime Minister, Mariano Rajoy uas yog teb chaws Spain tus thawj pwm tsav tau nqua hu kom nws tej pej xeem muaj kev moj them nqag kab thiab koom npoj. Nws tau xa ib co lus tus siab nrog cov neeg raug teeb meem zaum no thiab xa txoj kev hlub tshua rau tej neeg raug tej teeb meem no. Rajoy kuj tau hais ntxiv tias cov neeg Jihadist yog cov tsim teeb meem zaum no thiab yog cov yeej tau tsim tej xwm txheej zoo li no rau ntau lub nroog tsis hais yuav yog tuam ceeb London ntawm teb chaws Askiv, nroog Berlin ntawm teb chaws Germany, los yog Spain lub nroog Madrid los sis yog Fakis lub nroog Nice li.
Nws thiaj xav nqua hu kom nws tej pej xeem thoob teb chaws thiab ntiaj teb koom tes los tawm tsam nrog tej neeg phem no thiab nrog hlub tej neeg nruam sim los ntawm tej xwm txheej no.
Tub ceev xwm Spanish ntawm lub zos Catalonia qhia tias lawv tau muab cov neeg uas lawv ntseeg tias yog cov neeg phem tua tau lawm thiab uas lawv ntseeg tias cov neeg phem no tau tua 4 tug neeg tuag ntawm lub zos Cambrils sab qab teb ntawm nroog Barcelona thiab muaj ib tug neeg raug mob ntxiv.
Ntiaj teb tsoom theej tswj li Fabkis tus thawj tsav meem Emmanuel Macron kuj nqua hu kom muaj kev koom npoj, Askiv tus thawj pwm tsav Thersa May kuj nrog cov neeg raug nruam sim tsev neeg tu siab thiab America tus thawj tsav meem Donald Trump los kuj xa nws txoj kev hlub tshua rau tej neeg raug teeb meem thiab hais kom sawv daws yuav tsum ua siab tawv qhawv rau lub caij muaj teeb meem nyuaj no.
Mike Pence uas yog America tus lwm thawj tsav meem los kuj tau hais ib cov lus ntawm tebchaws Panama tias tsoom hwv America yeej npaj txhij yuav pab cuam tsoom hwv teb chaws Spain los xyuas tej xwm txheej no thiab nrhiav kom tau cov neeg phem los rau txim.
Julie Bishop uas yog Australia tus pwm tsav lis laj fai pej kum qhia tias muaj ib tug poj niam neeg Australian nyob ntawm xeev New South Wales raug mob sab heev raug coj mus kho tom tsev kho mob lawm thiab muaj 2 tug txiv neej Australia uas lawv ntseeg tias yog cov neeg xeev Victoria raug mob me ntsis thiab rov qab mus rau tom tsev tos qhua lawm.
Malcolm Turnbull uas yog Australia tus thawj pwm tsav thiab Bill Shorten uas yog tus coj pab nom opposition tim tseeb tau cem thuam tsis pom zoo nrog cov xwm txheej neeg phem tsim no.
Yog li yog leej twg muaj tsev neeg los yog cov txheeb ze ces xav kom hu xov tooj ncaj qha mus nrog lawv cov neeg sib tham los yog hu lub tuam chav Department of Foreign Affairs and Trade tus xov tooj 1300 555 135.
Nyeem tau xov xwm ua lus Askiv ntxiv ntawm no:
http://www.sbs.com.au/news/article/2017/08/18/barcelona-terror-attack-16-dead-van-driver-still-run
http://www.sbs.com.au/news/article/2017/08/18/australian-woman-injured-barcelona-attack-bishop
