Yeej tseem muaj tej xwm txheej huab cua kub sov ntau hnub sib law liag txuas ntxiv rau tej chaw feem ntau ntawm Australia sab qab teb hnub tuaj, thiaj ua rau nom tswv yuav tau ceev faj heev tsam ua rau muaj tej xwm txheej hav zoo yuav kub hnyiab tau ntau tuaj ntxiv.
Tau kwv yees tias yuav muaj huab cua kub sov tuaj ntxiv thoob plaws rau ntau thaj chaw ntawm xeev Victoria thiab xeev South Ausralia hnub zwj Quag (Tuesday 27/01/2026) no, thiab lub chaw ntsuam thiab kwv yees huab cua (Bureau of Meteorology) ceeb toom tias tej zaum yuav sov tshaj tej kev kub kev sov tau teev tseg.
Thiaj ua rau Melbourne yuav ntsib ib hnub uas kub sov tshaj plaws txog li ntawm 44C txij tau muaj kob hav zoov kub hnyiab Black Saturday xyoo 2009 uas tsim kev puas tsuaj loj los no.
Mildura uas yog thaj chaw nyob sab qaum teb ntawm xeev Victoria raug kwv yees tias yuav muaj huab cua kub sov txog 49C, hos ntawm Broken Hill ntawm NSW ces yuav kub txog 47C, uas ob thaj chaw no yog ob thaj uas yuav muaj huab cua kub sov tshaj tej tau teev tseg dhau los.
Txwv tu nrho tsis pub rauv taws nraum zoov
Tau txwv tu nrho tsis pub tej neeg raug taws nraum zoov ntawm ob lub xeev Victoria (VIC0 thiab South Australia (SA) rau lub caij uas tseem muaj ntau kob hluav taws kub hnyiab loj uas tsis muaj peev xwm tswj tau.
Hnub Monday (zwj Hli) dhau los es nroog Adelaide kub sov txog 44.7C kub tshaj hnub Australia Day uas tau teev tseg xyoo 2006 lawm.
Hos Ceduna uas nyog sab qaum teb ntawm lub nroog no kub txog 49C, thiab kub tshaj tej kev kub kev sov tau xub teev tseg dhau los, thiab ntawm NSW lub zos Dubbo ces kub txog 46.1C uas yog kub sov tshaj plaws rau lub ib hlis ntuj.
Tej xwm txheej huab cua no thiaj ua rau tej nom tswv xeev Victoria txhawj xeeb heev rau lub caij tseem muaj ntau kob hav zoov kub hnyiab loj uas tseem tsis tau muaj peev xwm tswj tau, suav kob kub ntawm Otways uas twb kub dhau txoj kab kem ciam ntawm tus dej Carlisle River hnub zwj Cag dhau los, thiab tab tom yuav raug teeb meem rau lub zos Gellibrand uas yog ib lub zos me me.
Nom tswv thiaj hais tias tseem tsis tau paub tseeb tias muaj tej vaj tse ntau npaum li cas raug kub hnyiab lawm.
Lub chaw ntsuam huab cua thiaj ceeb toom tias muaj cua hlob tshuab rau sab qab teb hnub poob los hla Melbourne tom qab tav su dua hnub zwj Quag (Tuesday) ces thiaj yuav ua rau muaj xob nroob xob laim.
Ntshe yuav muaj hav zoo kub hnyiab kis toj kis pes 'sai heev thiab twv tsis tau tias xyov yuav kub zoo li cas'
Tab sis kuj yuav muaj tej huab cua hloov txias zog rau hnub zwj Feej (Wednesday) ntawm xeev Victoria, txawm li cas los ntshe yuav pab tsis tau ntau thaj chaw nyob sab qab teb hnub tuaj pes tsawg thiab.
Thiaj ua rau Alistair Drayton uas yog tus lwm coj uas tswj tej xwm txheej hais tias cov kev pauv hloov ua rau muaj cua hlob yog tej yam txaus txhawj xeeb, thiaj ua rau tej nom tswv nqua hu kom tej neeg nyob ntawm tej zos Gellibrand, Kawarren, Beech Forest, Forrest thiab Barongarook tsiv tawm mus rau lwm thaj chaw.
Nws tau hais tias "Tej xwm txheej huab cua no yuav ua rau hluav taws kub kis sai heev thiab tsis muaj peev xwm yuav twv tau tias yuav kub zoo li cas. Peb thiaj xav taw qhia kom tej neeg ntawm tej chaw uas yuav raug hav zoov kub hnyiab yuav tau npaj tej tswv yim npaj tos hav zoov kub hnyiab, tsiv tawm kom sai thaum tseem ntxov thiaj pov puag tau yus tus kheej thiab yus tsev neeg."
Tej huab cua kub sov ntau hnub sib law liag no thiaj ua rau tej paramedics ceeb toom rau zej tsoom sawv daws kom yuav tau xyuam xim ceev faj, vim ob hnub so dhau los no xwb lawv twb tau mus pab cawm 11 tug me nyuam uas raug muab xauv rau hauv tsheb rau lub caij uas hub cua kub sov txog li 40s ntawm Victoria no lawm.
Lub koom haum Ambulance Victoria thiaj tau nqua hu kom tsis txhob cia yus tej me nyuam, yus tej tsiaj thiab tej laus neeg nyob hauv tsheb yam tsis muaj ib tug twg saib xyuas.
Dale Armstrong uas yog tus coj tswj tej xwm txheej ti tes ti taw thiaj tau hais tias "Tej kev kub kev sov hauv lub tsheb muaj peev xwm kub sov txog ob npaug tuaj ntxiv thiab raws los ua ib co xwm txheej phom sij heev rau lub sij hawm ntau ntiag tiv."
"Thiab hais tsi ntsees kuj yog ib co xwm txheej phom sij heev rau tej me nyuam uas tsis nco qab txog lawv thiab pheej cia lawv nyob sab hauv tej tsheb, vim rau qhov ib tug me nyuam twg lub cev yuav kub sai heev tuaj ntxiv txog li ntawm 3 txog 5 npaug sai dua tej laus lub cev."
Thiaj tau muaj cov kev nqua hu kom tej neeg ntawm ob lub xeev no haus dej kom ntau npaum li ntau tau pab rau yus lub cev, txheeb xyuas yus tsev neeg, tej phooj ywg, tej yim neeg nyob ze yus seb lawv puas xav tau txais kev pab dab tsi thiab xav kom nyob twj ywm hauv tsev.
Mloog tau xov xwm tshiab ntawm SBS Hmong, download SBS Adio app thiab caum SBS Hmong Facebook page.
