Thaib thiab Cambodia tej coj tau pom zoo xaus tsov rog ''yam tsis muaj lus zoj khi'' rau hnub zwj Hli (Monday), tom qab tau sib tua ntawm tej ciam teb los tau 5 hnub uas tau ua rau muaj neeg raug tua tuag yam tsawg li 36 leej.
Muaj tej neeg ntau tshaj 200,000 tus neeg yuav tau tsiv tawm ntawm tej xeev nyob ze ciam teb ntawm ob lub teb chaws no rau lub caij ob tog tej tub rog sib tua, tua foob pob thiab tua phom ntawm tej tshav rog cuam tshuam nrog tej kev tsis sib haum xeeb txog ib co tsev hauj sam qub ntawm tej ciam teb uas tau muaj los ntev.
Cov kev tsis sib haum xeeb no thiaj yog ib co xwm txheej kub ntxhov tshaj plaws uas tau muaj txij li thaum tau muaj cov kev tsis sib haum xeeb rau tej ciam teb no txij xyoo 2008-2011, uas ob tog tau cav tias tim Fabkis cov kev faib Cambodia tej ciam teb xyoo 1907.
Tom qab uas tau muaj lub rooj sab laj tsim kev thaj yeeb ntawm ob tug coj ntawm ob lub teb chaws no thiab Anwar Ibrahim uas yog Malaysia tus thawj pwm tsav tau nyeem nkawv tej ncauj lug no lawm ces nws tau hais tias nkawv tau pom zoo ''yuav xaus tsov rog yam tsis muaj lus zoj khi dab tsi'' thiab yuav pib txij ib tag hmo hnub zwj Hli (Monday) mus.
"Nod yog thawj kauj ruam tseem ceeb rau cov kev yuav pab daws tej xwm txheej kub ntxhov thiab cov kev rov qab los kho kom tau txais kev thaj yeeb thiab kev ruaj ntseg,'' nws tau qhia rau tej neeg nthuav xov xwm ntawm Malaysia lub nroog Putrajaya, uas muaj Phumtham Wechayachai uas yog Thaib tus kis thawj pwm tsav thiab Cambodia tus thawj pwm tsav Hun Manet sawv ua ke.
Anwar tau hais tias yuav muaj ib lub rooj lagluam uas muaj tej hau rog ntawm ob tog sib tham rau thaum sawv ntxov hnub zwj Quag (Tuesday) ua ntej pawg tswj ciam teb ntawm ob tog yuav sib tham ntawm Cambodia rau hnub tim 4 lub 8 hli ntuj (2025).
Lub caij uas tau qhia txog tej xov xwm no, ces kuj muaj AFP ib tug neeg nthuav xov xwm ntawm Cambodia lub nroog Samraong uas nyob nrog deb li 17 kilometres (10 miles) ntawm cov kev sib ntaus sib tua ntawm ciam teb ntawd — tau qhia tias yeej tseem hnov suab phom suab muas txwv tawg thiab nrov txuas ntxiv.
Meskas tus President Donald Trump thiaj li tau txo tej se kim yuav tsub rau ob lub teb chaws no kom tsawg thiab tau raus tes rau tej xwm txheej no rau ob hnub so dhau los, thiab tau hais tias ob tog yeej tau pom zoo ''nrog xyuas maj ceev nrooj'' kom xaus tsov rog.
Cambodia tus thawj pwm tsav Hun Manet thiaj tau hais tias ''Hnub no ces peb teu muaj ib lub rooj sab laj zoo thiab tham tau raws li siab xav. Nws kuj tau ua tsaug rau Mr Trump cov kev ''txiav txim siab'' txhawb nqa thiab hais tias cov kev xaus tsov rog yuav yog tej yam ''chaw tiag taw rau cov kev daws tej kev tsis sib haum xeeb no rau yav pem suab.''
