Thaum uas yus tej hniav thiab tej pos hniav tseem zoo, ces tej zaum yus kuj tsis paub tias tseem ceeb npaum li cas rau yus txoj kev ua lub neej ntawm ib hnub rau ib hnub twg. Cov kev tau txais kev noj qab nyob zoo rau yus lub qhov ncauj yuav pab kom yus zom tau zaub mov, saj tau zaub mov seb qab li cas, pab yus nqos zaub mov, pab yus tham thiab hais lus los yog pab qhia txog yus cov kev xav.
Txhais tias yus lub qhov ncauj muaj peev xwm ua rau muaj tau teeb meem tsis tau tej zaub mov muaj txiaj ntsim pab rau yus, ua rau yus tsis muaj kev ntseeg siab rau yus tus kheej, yus cov kev ntau kev phooj ywg, thiab pab kom yus tau txais kev noj qab nyob zoo thiab noj qab haus huv.
Tej neeg uas lov hniav los yog ib tug hniav twg puas lawm, los sis ho muaj lwm yam mob rau yus lub qhov ncauj li mob pos hniav, ces yeej paub txog tej tau hais no zoo heev.
Tsis yog tias yuav ua rau yuav ua rau lawv mob pw tsis tsaug zog, hais lus tsis meej thiab tsis muaj peev xwm noj tau tej zaub mov uas xav noj xwb, tab sis tseem ua rau tej neeg ntawd raug lwm tus faib cai thiab ntaus nqe tsis zoo rau lawv thiab.
Vim li cas thaum yus lov ib tug hniav los yog mob pos hniav thiaj yog tej yam ua rau yus txaj muag heev? Thiab peb ho muaj peev xwm ua tau dab tsi los pab?
Muaj teeb meem rau yus ntawm zejzog thiab ua rau yus nyuaj siab rau yus lub neej thiab kev noj qab nyob zoo
Cov kev tau txais kev noj qab haus huv rau yus lub qhov ncauj yeej muaj kev cuam tshuam loj heev nrog yus tej meej mom ntawm yus lub neej. Tej neeg uas tsis muaj tej hniav zoo ces yeej raug lwm tus ntaus nqe tsis zoo txog lawv cov kev noj qab haus huv, kev nplua nuj los yog tseem cuam tshuam txog lawv cov kev txawj ntse thiab.
Piv txwv li yeej muaj ib co kev teeb txheeb ntawm teb chaws Askiv xyoo 2010, uas tej kws teeb txheeb tau coj tej hluas cov duab ntawm tib tug hluas twg tab sis muab nws cov hniav hloov ua cov hniav lwj, hniav kab noj ntau theem sib txawv coj los rau tej neeg saib.
Thaum uas tej neeg uas koom cov kev teeb txheeb no tau pom tej hniav kab noj (hniav lwj) ces lawv pheej hais tias tus neeg muaj cov hniav lwj ntawd ntshe yog ib tug tsis tshua txawj ntse pes tsawg, tsis muaj tej txuj yuav sib txuas lus nrog lwm tus, musj cov kev ntseeg siab rau lawv tus kheej tsawg dua los sis muaj cov kev hwm lawv tus kheej tsawg dua thiab xav tias xyov tus neeg ntawd puas muaj kev zoo siab — thaum uas tej neeg koom cov kev teeb txheeb no tau saib tej duab ntawd.
Tej kev ntaus nqe tsis zoo rau lwm tus no thiaj muaj peev xwm ras los ua ib co kev thab zes lwm tus los yog xav phem xav tsis zoo rau ib tug neeg twg uas tej zaum yuav ras los ua ib co caws pliav rau tej neeg nruab siab mus tag lawv ib sim neej.
Raws li tau muaj ib co kev teeb txheeb tsis ntev los no nrog ib co neeg koom ua hauj lwm ua ke, uas peb tau mus txheeb tej me nyuam xov xwm 4,476 cov uas sawv cev rau haiv neeg no ntawm Longitudinal Study of Australian Children.
Ces peb tau txheeb tau tias tej kev lov hniav los vim ib tug hliav twg lwj los yog tau to qhov los sis yog raug mob ces yeej yog tej xwm txheej uas pom muaj tas mus li, thiab tau ua rau muaj teeb meem rau ib tug me nyuam ntawm kaum (10) tus twg. Ces thiaj ua rau tej me nyuam no muaj cov cib fim txog li 42 feem pua yuav raug lwm tus thab zes ntawm tej teej kawm ntau dua.
Tej kev raug lwm tus pheej xav phem xav tsis zoo rau yus no yuav ua rau yus txaj muag, thiab tsis tshua hwm yus tus kheej. Thiab muaj tej thaum ces kuj ua rau tej neeg pheej tsis tshua mus siv cov kev pab cuam kho/rho hniav thiab, vim pheej ntshai tsam ua rau lawv txaj muag los sis yog tsam raug lwm tus liam tias tsis kub siab tu thiab saib xyuas lawv tus kheej.
Cov kev tsis muaj peev xwm siv tau cov kev kho/rho hniav
Tej hniav lwj (hniav to qhov) thiab tej mob pos hniav yeej yog tej mob ntawm qhov ncauj uas pom muaj ntau tshaj plaws ntawm teb chaws Australia no thiab kuj muaj peev xwm yuav ua rau yus lov hniav/los sis yog raug muab tus hniav lwj (hniav to qhov) ntawd rho tawm pov tseg.
Thaab yeej muaj peev xwm muaj tau tej xwm txheej no rau ib tug neeg uas muaj ib co hnoob nyoog twg, tsis hais thaum tseem yau los yog thaum muaj hnoob nyoog lawm, tab sis yog yus muaj hnoob nyoog zuj zus tuaj ntxiv ces yuav muaj teeb meem phem zuj zus rau yus ntxiv.
Txawm tias tsoom fwv muaj cov kev pab rho hniav rau tej me nyuam yaus hu ua Child Dental Benefits Schedule (CDBS) los tsuas pab rho/kho hniav rau tej me nyuam hnoob nyoog txog 17 xyoo los yog qes dua ntawd xwb yog tias lawv niam lawv txiv tau ib co kev pab cuam dab tsi ntawm tsoom fwv.
Ib txhia xeev ces kuj muaj ib cov kev rho hniav pab rau tej hnoob nyog 18 xyoo rov sauv thiab. Tab sis yuav tau teev zwm npe tos ntev heev mas thiaj mam li tau mus rho hniav ntawm zej tsoom tej chaw kho mob thiab.
Txhais tias yeej tseem muaj neeg Australia coob heev tsis tau siv cov kev rho hniav los yeej tsis tshua muaj peev xwm them kom tau siv tej kev rho hniav no li.
Cov kev tsis tau txais kev noj qab nyob zoo rau qhov ncauj ua rau muaj teeb meem rau cov kev ua lub neej txhua hnub
Thiaj muaj cov kev sib cav tias cov kev yuav pab kom tau txais kev noj qab nyob zoo rau tej qhov ncauj no yuav tsum kub siab tshaj plaws los pab tiv thaiv kom tsis txhob muaj mob lwm yam rau yus lub cev ntaj ntsuj. Piv txwv li, tau muaj ib cov kev teeb txheeb nrog tej neeg coob heev tshaj 170,000 tus uas hnoob nyoog nto 18 xyoo rov sauv lawm ntawm New South Wales tau txheeb tau tias tej neeg uas lov hniav los yog pheej muaj mob rau lawv tej qhov ncauj yog cov neeg uas tej zaum yuav tas sim neej los ntawm tus kab mob plawv.
Tab sis thaum uas tej neeg tsis muaj peev xwm them tej nqe pab kho lawv los yog lawv tej me nyuam tej qhov ncauj, ces kuj yog tej yam uas yuav ua rau muaj teeb meem rau lawv txoj kev ua lub neej ntawm ib hnub rau ib hnub thiab ua rau lawv tsis tau txais kev noj qab haus huv tshaj qhov ua rau muaj teeb meem rau lawv lub cev ntaj ntsug lawm thiab.
Cov kev teeb txheeb no qhia tias thaum uas tej hniav lwj ua rau lawv mob ces yuav ua rau lawv yuav tau thov ntau hnub so tsis mus ua hauj lwm los yog tsis mus kawm ntawv. Tej no thiaj yuav ua rau muaj teeb meem ntau yam tsis zoo ntev ntxiv tuaj rau lawv, vim pheej cuam tshuam rau lawv cov kev kawm thiab lawv cov kev ua hauj lwm.
Cov kev teeb txheeb tau qhia tias tej neeg mob hniav lwj (hniav to qhov) no pheej ua rau lawv muaj mob thiab pheej yuav ua rau lawv yuav thov so ntau hnub tsis mus ua hauj lwm los yog tsis tau mus kawm ntawv. Source: Getty / ArtistGNDphotography
Tej niam txiv los tej zaum kuj yuav tau thov so tsis mus ua hauj lwm kom thiaj coj tau lawv tej me nyuam mus ntsib tej kws rho hniav los yog ntsib tej kws kaus pob zeb taub txuab uas khub tej hniav. Ces thiaj ua rau lawv khwv tsis tau nyiaj txaus siv vim rau qhov pheej yuav tau rho yus tej nyiaj ntug tug coj mus them tej nqe rho hniav no.
Tej kev teeb txheeb yeej qhia tias thaum uas tej neeg tsis muaj peev xwm them tau tej nqe rho hniav ces yuav ua rau lawv pheej mloog tias zoo li lawv tsis muaj peev xwm yuav tswj tau ntau yam xwm txheej ntawm lawv lub neej li. Ces tej zaum thiaj ua rau lawv yuav tau tib mus xaiv siv cov kev kho mob pheej yig dua, piv txwv li cia li rho kiag tus hniav pov tseg txawm tias tej zaum yeej tseem muaj peev xwm cawm thiab ceev txuag tau tus hniav ntawd cia yam tsis tas rho.
Tsis tas li ntawd los tau tsis ntev los no ces yeej tau muaj tej neeg coob zujzus tuaj tau siv lawv tej nyiaj super (superannuation) mus them tej nqe kho hniav, rau tej xwm txheej ntau yam cuam tshuam txog tej hniav uas yeej muaj peev xwm tiv thaiv tau. Tej xwm txheej no thiaj haj yam ua rau tej neeg plam txiaj ntsim rau lawv tej nyiaj no tshaj qub ntxiv.
Yog li ntawd ne ho yuav daws tej teeb meem no li cas?
Cov kev teeb txheeb uas kuv tau koom teeb txheeb nrog kuv tej neeg ua hauj lwm ua ke xyoo no tau txheeb tau tias 96 feem pua ntawm tej neeg uas tseem muaj cov hnoob nyoog ua hauj lwm ntawm teb chaws Australia ntseeg tias cov kev tu yus lub qhov ncauj kom tau txais kev noj qab nyob zoo yog tej yam tseem ceeb heev.
Tab sis tej no yeej tau ras los ua ib cov teeb meem nyiaj txiaj tseem ceeb heev ua rau tej neeg tsis muaj peev xwm yuav siv tau cov kev rho hniav no, hais tsi ntsees rau tej neeg tsis tau hauj lwm ua, los yog tej neeg khwv tau nyiaj tsawg los sis tej neeg puas cev.
Yog li ntawd cov kev nrog xyuas kom muaj peev xwm siv tau cov kev rho hniav pheej yig thiab muaj peev xwm siv tau cov kev pab no thiaj yog ib co kauj ruam tseem ceeb heev. Vim tej no yuav txhawb nqa kom tej neeg kub siab mus siv cov kev kho mob pab kom haum raws li lub caij tsim nyog kho, li mus txheeb xyuas uas tsis yog ib co kev siv nyiaj luam thuam dab tsi rau tej neeg uas muaj peev xwm them tau tej nqe kho mob no.
Tab sis txawm tias cov kev mus ntsib/siv tej kws rho hniav (tej chaw rho hniav) yog tej yam tseem ceeb, los yog tias tsis muaj peev xwm siv tau thiab tsis muaj cov kev pov puag ntev ntxiv tuaj kom tsis txhob muaj ntau yam mob ua mob rau yus lub qhov ncauj thaum muaj ntau yam ntawm lub teb chaws los yog tej neeg tej cwj pwm pheej tseem ua rau tej neeg tsis tau txais kev noj qab nyob zoo ces kuj yeej tseem yuav ua rau tej neeg tsis tau txais kev noj qab nyob zoo rau lawv tej qhov ncauj tib yam li qub thiab.
Cov kev raug lwm tus xav phem xav tsis zoo rau yus vim yus tsis tau txais kev noj qab nyob zoo rau yus lub qhov ncauj no yuav yog tej yam uas cuam tshuam rau yus ntiag tug thiab ua rau yus txaj muag heev. Tab sis tsis tsim nyog pheej yuav cia tej nqe kho mob no ua ib co chaw leg rau tej neeg ntiag tug nkaus xwb thiab.
Tej chiv keeb teeb meem ntawm tej mob uas pheej ua mob rau tej qhov ncauj ces yog tej cwj pwm coj ntawm yus txoj kev ua lub neej — piv txwv li pheej noj tej khoom qab zib ntau, haus dej haus cawv, haus luam yeeb los sis pheej tsis kub siab tu yus lub qhov ncauj (tsis kub siab txhuam hniav) — thiab tej zaum kuj yog tim yus pheej muaj kev nyuaj siab ntxhov plawv heev.
Peb paub tias tej cwj pwm no thiab tej kev nyuaj siab ntxhov plawv no yeej yog tej uas pom muaj tas mus li rau tej neeg txom nyem.
Yog li peb thiaj yuav tau tsim kom tau tej cai siv tau nthuav dav coj los daws tej xwm txheej teeb meem uas pheej ua rau tej neeg ua lub neej, ua hauj lwm, tej hnoob nyoog, los yog tej neeg cov kev loj hlob kom muaj peev xwm yuav tau los yog yuav tau tej zaub mov muaj txiaj ntsim pab rau lawv lub cev pheej yig zog kom ntau tshaj qub ntxiv.
Cov kev nrog xyuas kom tej neeg tsis txhob plam tej txiaj ntsim yog ib co tseem ceeb tshaj plaws rau cov kev los daws tej teeb meem hniav lwj (hniav to qhov) thiab mob pos hniav thiab tej kev raug lwm tus xav phem xav tsis zoo cuam tshuam rau tej teeb meem noj qab haus huv rau lub qhov ncauj.
Ankur Singh iyog tus chair ntawm lub koom haum Lifespan Oral Health ntawm University of Sydney. Nws tau nyiaj pab cuam ntawm cov khoom plig Australian Research Council DECRA Award thiab nws txoj hauj lwm tam li yog tus chair ntawm lub koom haum Lifespan Oral Health ntawm University of Sydney yeej tau nyiaj pab los ntawm lub koom haum Rosebrook Foundation.
