Lub caij uas muaj cov hnub ntev ntxiv tuaj no, tej huab cua los kuj sov zog lawm thiab kuj pib muaj tej paj xyoob paj ntoo tawg, thiab yeej muaj neeg Australia coob heev ua kev zoo siab rau thaum pib lub caij nplooj hlav no lawm.
Yog hais txog ib txhia lawm ces, yuav yog hlub caij ua cov npaws hay fever thiab lub caij fab tej paj xyoob paj ntoo lawm, uas yuv ua rau tej neeg txham, ua rau khaus qhov muag, los ntswg, thiab qhov muag o.
Thiab xyoo no ces nom tswv yeej tau qhia tias muaj tej huab cua El Niño, thiab tej kws yeej tau ceeb toom tias yog ib lub caij yuav ua rau tej neeg fab txawv dua tej ib txwm pom dhau los thiab.
Nod yog tej uas peb paub tzog lawm.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.
Lub caij ua rau tej neeg fab yog dab tsi thiab thaum twg thiaj yog lub caij ua rau tej neeg fab?
Lub caij tej neeg ua xua thiab mob hay fever uas yog ib co yam ntxwv mob ua npaws vim fab los yog tsis haum tej hmoov paj xyoob paj ntoos rau ib lub caij twg ntawm lub xyoo nrog tej cua ntau heev.
Thiab muaj tej yam txwv mob li pheej ua rau txham, txhaws qhov ntswg los yog los ntswg, khaus khaus los yog pheej ua rau qhov muag los kua muag, ua rau qhov muag o, los sis yog txhaws pob ntseg thiab khaus pob ntseg.
Yeej muaj ib tug ntawm tsib tug neeg Australia twg ces yeej ntsib cov teeb meem ua xua no rau lub caij ua xua, thiab tej neeg uas hawb pob los yog muaj lwm yam mob cuam tshuam txog ntsws thiab cov kev ua pa ces kuj yuav raug tej xwm txheej no thiab.
Dr Edwin Lampugnani uas yog ib tug kws paub zoo txog tej kab mob los yog tej hmoov paj xyoob paj ntoo uas ya raws cua thiab kuj yog tus ttswj lub tuam chav Melbourne Pollen Count tau hais tias lub caij ua xuas no yeej ib txwm pom tej neeg fab coob heev rau lub caij nplooj hlav thaum muaj tej nroj tsuag xyoob ntoo tab tom tawg paj.
Nws tau hais tias "Yeej muaj neeg Australia coob heev ua xua, vim tej nrog tsuag xyoob ntoo no ntau yam yog ib co ua rau muaj teeb meem loj heev rau lawv pheej ua xua, thiab tseem ua rau lawv tau cov khaub thuas hay fever thiab ua rau txhaws ntswg, txham thiab khaus qhov ntswg."
"Lub caij ua xua no thiaj pib txij li ntawm lub 9 hli ntuj mus txog lub 12 hlis ntuj ntawm ib lub xyoos twg, thiab yuav ua rau tej neeg ua xua coob heev rau lub 10 hli ntuj mus txog lub 12 hlis ntuj vim yog lub caij uas muaj tej paj xyoob paj ntoo tawg ntau heev rau lub caij ntawd.''
Ua li cas tej huab cua ho muaj feem ua rau tej neeg ua xua?
Tej yam ntxwv huab cua muaj peev xwm pab kom tej kws tshawb fawb muaj peev xwm txheeb tau tias yuav muaj cov kev ua xua no ntev npaum li cas los yog muaj lub caij ua xua no muaj ceem npaum li cas.
Kira Hughes, uas yog ib tug kawm tiav PhD thiab yog ib tug kws tshawb fawb uas teeb txheeb ntawm lub chaw teeb txheeb Deakin AIRwatch tau hais tias yog muaj huab cua pauv hloov ces tej zaum kuj yuav ua rau tej neeg muaj cib fim yuav ua xua ntau tuaj ntxiv thiab.
Thiab yeej muaj cov kev pauv hloov ntawm ntawm ib hnub rau ib hnub, los yog muaj tej huab cua pauv hloov rau ib lub caij twg ntev.
Hughes tau hais tias raws li tau muaj pej kum haiv ntau cov kev teeb txheeb tau qhia ces tej huab cua pauv hloov kuj tau ua rau muaj tej hmoov paj xyoob paj ntoo xyaw tej cua ntev, ces yuav ua rau lub caij tej neeg ua xua ntev dua thiab.
Nws tau hais tias “Peb yeej tau pom ntau cov kev teeb txheeb lawm tias ... tau ua rau muaj lub caij uas tej hmoov paj xyoob paj ntoo no ntev tuaj ntxiv txog li ob limtiam lawm vim tau muaj huab cua pauv hloov."
“Thiab thaum muaj tej xwm txheej huab cua La Niña (ua rau ntuj los nag ntau) tau tshwm sim rau ntau xyoo dhau los no ... ces tau ua rau muaj lub caij muaj tej paj xyoob paj ntoo tawg ntev zog lawm, dua ntawm yuav xaus rau lub 12 hlis ntuj los tseem muaj lub caij no ntev txuas ntxiv mus txog ntua lub ib hlis ntuj thiab."
Hos lub caij El Niño (huab cua kub sov thiab qhuav) ho yuav ua rau tej neeg ua xua li cas thiab?
Lub sij hawm peb xyoo dhau los ntawd, ces Australia yeej ntsib cov xwm txheej huab cua La Niña (ntuj los nag heev), ces thiaj ua rau huab cua txias dua thiab ua rau muaj ntuj los nag ntau dua yog piv rau lwm xyoo.
Cov kev muaj nag los ntau tuaj ntxiv no yuav ua rau tej nroj tsuag xyoob ntoo loj hlob huam vam zoo, thiab yuav ua rau muaj tej hmoov paj xyoob paj ntoo xyaw tej cua ntau tshaj ib txwm muaj thiab yuav ua rau muaj tej caij tej neeg ua xua muaj ceem dua.
Xyoo no ces UN thiab Australia ob lub chaw ntsuam thiab kwv yees huab cua (Bureau of Meteorology) tau qhia tias ntiaj teb thiab Australia ntsib cov xwm txheej huab cua El Niño lawm.
Txhais tau tias ntiaj teb thiab teb chaws Australia no yuav ntsib tej huab cua kub sov tshaj qub thiab qhuav nkig tshaj qub ntxiv lawm.
Lampugnani hais tias cov xwm txheej huab cua El Niño xyoo no yuav ua rau muaj ob yam tseem ceeb rau cov kev fab ua xua.
Nws tau hais tias "Thawj co ces peb kuj tab tom txheeb xyuas lub caij muaj tej hmoov paj xyoob paj ntoo thaum tseem ntxov vim peb pom tias tej huab cua yeej sov dua tam sim no thiab kuj tseem muaj tej av noo ces thiaj ua rau muaj tej nroj tsuag xyoob ntoo loj zoo heev.''
"Xyoo uas muaj cov xwm txheej huab cua El Niño no ces, yuav yog xyoo huab cua qhuav thiab yuav tsis los nag uas yuav ua rau txuab sim hais tsi ntsees rau tej nroj tsuag loj, thiab kuj yog tej yam uas yuav ua rau tsis muaj tej hmoov paj xyoob paj ntoo ntxov dua thiab."
Caij nplooj hlav yog lub caij tej neeg ua xua coob heev vim muaj tej hmoov paj xyoob paj ntoo xyaw nrog tej cua ntau heev. Source: AAP / Moodboard
Thunderstorm asthma ces yog tej nag xob nag cua thiab tej hmoov paj xyoob paj ntoo nrog cua uas ua rau tej neeg txog siav, ceev hauv siab, hawb pob, thiab pheej hnoo tas mus li.
Huges thiaj tau hais tias "Kuj yuav ua rau muaj tej cua kub, cua txias, uas yuav ua rau muaj tej nag xob nag cua, ces thiaj txhawj tias tsam peb rov qab ntsib tej xov xwm zoo li ntawd xyoo o thiab."
"Tej hav zoov kub hnyiab los kuj ua rau muaj tej pa cho ntau heev thiab, yeej muaj ntau yam cua tsis huv, ces tej zaum yuav ua rau tej neeg tsis haum tej hmoov paj xyoob paj ntoo los yog tej neeg mob hawb pob yuav raug teeb meem loj heev rau lub caij uas twb tau muaj tej hmoov paj xyoob paj ntoo no ntau tuaj ntxiv lawm, thiab tej zaum ntshe peb yuav ntsib tej xwm txheej no xyoo no."
Tej neeg ua xua yuav raug teeb meem dab tsi rau lub caij no?
Lampugnani tau hais tias cov kev pib lub caij ua xua ntxov tej zaum yuav ua rau xaus lub caij no ntxov thiab, tab sis nws kuj tau hais tias ntshe yuav muaj ''tej hmoov paj xyoob paj ntoo'' ntau dua tus zauv nrab rau ntawm cov hnub rau xyoo 2023 no thiab.
Nws tau hais tias "Qhov uas ua rau muaj teeb meem mas yog tej neeg feem coob yeej tsis tau npaj lawv tus kheej rau lub Cuaj hli ntuj uas muaj tej hmoov paj xyoob paj ntoo uas peb tab tom pom tam sim no li."
"Tshiab tsuas nyob ntawm seb ho puas los nag rau lub caij nplooj hlav no li cas xwb ... yog los tiag, ces tej zaum kuj yuav hloov tej xwm txheej rau lub caij no thiab tej zaum kuj yuav yog lub xyoo muaj tej xwm txheej no loj tshaj qub, thiab yog huab cua qhuav dua ces tej zaum yuav muaj lub caij no me dua xyoo no."
Hughes tau hais tias tej neeg uas pheej ua xua twb mloog tau tias twb muaj tej hmoov paj xyoob paj ntoo xyaw tej cua lawm thiab nws xav tias ntshe tej zaum tseem yuav ua rau muaj lub caij ua xua no ntev tshaj tej ib txwm muaj dhau los thiab.
Nws thiaj tau taw qhia rau tej neeg uas pheej ua xua tias kom siv lub app Melbourne Pollen app los yog lub vas sab txheeb xyuas tej hmoov paj xyoob paj ntoo no txhua hnub txij hnub tim 1 lub 10 hli ntuj no mus kom thiaj paub tias cov hnub twg yob cov uas yuav ua rau ua xua.
Nws tau hais tias ''Vim yuav qhia kom yus paub tias hnub twg muaj tej hmoov paj xyoob paj ntoo tsawg ces yuav tsis ua rau muaj teeb meem dab tsi ntau, los yog hnub twg muaj ntau ces thiaj pab kom yus tsis txhob tawm mus rau sab nraum zoov, thiab pab kom yus ceev faj li tau noj tshuaj pab yog tsim nyog noj tiag. Thiab yog tias yus ho yog cov neeg hawb pob thiab ... ces kuv xav taw qhia kom nrog ib tug kws kho mob tham thiab npaj tswv yim tias seb yuav ua li cas."
