Ntsiab lus tseem ceeb:
- National Reconciliation Week yeej tau ua rau hnub tim 27 lub 5 hlis ntuj txog hnub tim 3 lub 6 hlis ntuj ib xyoos twg..
- Cov kev zwj thaj pib thiab xaus yog cim txog tej keeb kwm tseem ceeb ntawm neeg txum tim tej keeb kwm.
- Thiaj tau siv sob lus 'Bridging Now to Next' no rau lub limtiam no xyoo no.
National Reconciliation Week (NRW) ces yog lub caij uas tej neeg Australia los kawm txog thiab sib qhia txog tej keeb kwm, kab lis kev cai thiab tej uas lawv tau ua tiav.
Lub limtiam NRW xyoo no ces siv sob lus 'Bridging Now to Next' coj los qhia txog cov kev sib txuas ntawm yav tag los, tam sim no thiab yav pem suab.
NRW ces yeej rau ua kev zoo siab txhua xyoo txim hnub tim 17 lub 5 hlis ntuj txog tim 3 lub 6 hlis ntuj, thiab cov zwj thaj no yog ib co tseem ceeb heev rau neeg txum tim.
Cov hnub no ces yog ''ua kev nco txog 2 co keeb kwm tseem ceeb ntawm peb tej keeb kwm'', raws li Karen Mundine uas yog tus coj lus koom haum Reconciliation Australia hais.
Nws tau qhia rau SBS tias "Yog cov kev muaj neeg Australia tawm suab txog 90.77 feem pua pom zoo los kho txhooj cai tswj haiv xoo 1967, thiab xyoo 1992 uas tsev hais plaub High Court tau txiav txim rau Mabo yeej rooj plaub hais kom neeg txum tim muaj cai ua tswv av thiab tso tseg tsis siv tsab cai terra nullius (lub teb chaws tsis muaj tsw) — thaum tej neeg Askiv tuaj aws nam nias tswj hwm,''
"Reconciliation ces yog cov kev tsim thiab cov kev kho kom muaj txoj kev sib raug zoo ntawm neeg txum tim thiab lwm cov neeg Australia kom muaj kev totaub txog qhov tseeb ntawm Australia tej keeb kwm tuaj nam nias liaj ia teb chaws tswj hwm.
"Thiab yog ib cov kev ncaj ncees rau neeg txum tim thiab kuj yog ib cov kev tsim kev koom npoj rau teb chaws Australia uas hwm neeg txum tim tej kab lis kev cai 65,000 xyoo thiab tej lawv tau ua tiav.''
Cov zwj thaj tseem ceeb
Ntxiv ntawm qhov tseem ceeb txog cov zwj thaj pib thiab zwj thaj xaus ntawm lub limtiam no lawm, hnub ua ntej limtiam Reconciliation Week uas yog hnub tim 26 lub 5 hlis ntuj kuj yog hnub National Sorry Day thiab.
Hnub no tau pib xyoo 1998, ib xyoo tom qab uas lub koom haum Human Rights Commission tau coj tsab ntawv cej luam tseem ceeb Cov lawv rov qab los Tsev (Bringing them Home): Uas cej luam txog cov kev txheeb txog cov kev cais thiab tshem neeg txum tim Aboriginal thiab Torres Strait Islander tej me nyuam tawm ntawm lawv tsev neeg (Stolen Generations).
Hnub no yog hnub lees paub txog cov phaum neeg Stolen Generations, uas raug mus tshem tawm ntawm lawv tsev neeg, lawv tej zejzog raws li tej tsoom fwv tej caij txij lub caij xyoo 1910 txog rau 1970 ntawd.
Ua ke no los cov kev muaj peev xwm tawm suab tiav raws li siab xav rau hnub tim 27 lub 5 hlis ntuj xyoo 1967 los kho Australia tej txhooj cai tswj haiv yeej tau kho 2 nqe cai tseem ceeb.
Ces thiaj tau rov qab kho nqe cai Section 127, uas tsis pub suav neeg txum tim Aboriginal thiab Torres Strait Islander nrog Australia tej pej xeem.
Tsis tas li ntawd los cov kev kho txhooj cai tswj haiv no kuj tau tshem sob lus ''other than the Aboriginal race" ntawm ntawm nqe cai Section 51 (xxvi).
Cov kev kho Australia tej txhooj cai tswj haiv no txhais tias tej xeev tsis muaj peev xwm yuav tsim tej cai piv txwv li tej cai Aboriginal Protection Acts siv ntxiv uas yuav tso cai rau tej nom tswv xeev no muaj peev xwm cais/tshem tejme nyuam neeg txum tim tawm ntawm lawv tsev neeg yam raug kev raug cai ntxiv lawm.
Lub chiv keeb ntawm lub limtiam National Reconciliation Week
Royal Commission cov kev mus txheeb txog tej xwm txheej neeg txum tim Aboriginal tas sim neej rau lub caij tseem raug nom tswv ceev tseg thiabj li yog tsab ntawv cej luam kawg uas coj los qhia rau tsev tsoom fwv xyoo 1991. Ces tsab ntawv cej luam no ib co lus taw qhia thiaj tau ua rau tau pib muaj cov txheej txheem los tsim kom muaj kev sib raug zoo rau haiv neeg no.
Txij ntawm los ces tsev tsoom fwv thiaj tau tsim tau tsab cai Council for Aboriginal Reconciliation Act, uas tau teeb tsa lub koom haum Council for Aboriginal Reconciliation (CAR).
Raws li tsab cai CAR no tau teev tseg, ces yuav siv txog 10 xyoo los ua cov zeem muag ''tsim kom muaj kev koom npoj rau Australia'' uas muaj cov kev hwm lub teb chaw no tej luaj pua, ''saib neeg txum tim Aboriginal thiab Torres Strait Islander tej puav pheej thiab xyuas kom lawv tau txais kev ncaj ncees thiab tau txais kev vaj huam sib luag rau txhua leej txhua tus.''
Ces lub koom haum no thiaj muaj 25 tug tug koom siab, uas muaj tej neeg Australia uas yog neeg txum tim thiab tej neeg Australia uas tsis yog neeg txum tim koom. Pat Dodson thiaj yog tus Chair thiab kuj yog ib tug txiv neej neeg txum tim caj ceg neeg Yawuru thiab kuj yog tus ''leej txi uas tsim cov kev sib kho kom muaj kev sib raug zoo'. Xyoo 1997 ces Dr Evelyn Scott uas yog neeg txum tim ib tug neeg tawm tsam pov puag lawv txoj cai thiaj tau los ua tus coj txuas ntxiv.
Xyoo 1993, ces thiaj tau ua lub koom txoos National Week of Prayer for Reconciliation thawj limtiam. Thiab 3 xyoos tom qab ntawd ces kuj tau txais kev txhawb nqa ntau tuaj ntxiv ces lub koom haum CAR thiaj tau tsim lub koom txoos Reconciliation Week.
Lub koom haum CAR tsab ntawv cej luam kawg uas cej luam rau tej coj ntau tus uas tiss yog neeg txum tim uas muaj John Howard uas yog Australia tus qub thawj pwm tsav dhau los thiab Sir William Deane uas yog tus nom sawv cev rau huab tais — The Australian Declaration towards Reconciliation thiab The Roadmap for Reconciliation — tau cav tias ntshe yuav tsis muaj peev xwm los kho kom muaj kev sib raug zoo rau haiv neeg no rau lub caij 10 xyoo nkaus xwb.
Ces tej xwm txheej no thiaj tau ua rau muaj cov kev teeb tsa lub koom haum Reconciliation Australia.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follow los yog lwm cov podcasts platforms (iHeart, Amazon Music & Podcasts).
