Ntsiab lus tseem ceeb:
- Tau muaj ntau txheeb tus me nyuam neeg txum tim raug yuam cais tawm ntawm lawv tsev neeg mus nyob nrog tej neeg dawb.
- Tej kev muab lawv cais no tau ras los ua ib co caws pliav uas rau lawv tau ntshai rau sab ntsuj plig thiab cev ntaj ntsug rau ntau phaum neeg.
- Tej zej zog thiaj tsim ib co program los pab thiab kom tej neeg no muaj kev sib cuag nrog lawv tej kab lis kev cai kom thiaj ntxeem dhau tej xwm txheej no.
- Cov kev kawm/qhia txog lawv tej keeb kwm no thiab cov kev lees paub tej xwm txheej no ntawm haiv neeg no yog ib co tseem ceeb yuav pab kom lawv ntxeem dhau tej xwm txheej no.
Lus tim tsum: Toom xov xwm no yuav muaj tej yam ua rau ib txhia nyuaj siab ntxov plawv vim yuav tham txog tej xwm txheej ua rau ib txhia tau ntshai rau sab ntsuj plig thiab cev ntaj ntsug, cov kev cais tej me nyuam, thiab yuav tham txog Australia tej neeg txum tim uas tau nruam sim lawm.
Txij xyoo 1910 txog rau lub caij xyoo 1970s ces tej tsoom fwv lub caij ntawd yeej muaj tej cai los cais Australia tej neeg txum tim Aboriginal and Torres Strait Islander tej me nyuam ntau txheeb tawm ntawm lawv tsev neeg coj mus nyob rau ntawm ib co chaw los yog coj mus nyob nrog tej cuab yig neeg Australia uas tsis yog neeg txum tim.
Vim li cas thiaj muaj tej me nyuam no cais?
Shannan Dodson uas yog ib tug poj niam neeg txum tim caj ceg neeg Yawuru ntawm Broome thiab kuj yog tus coj lub koom haum Healing Foundation hais tias muaj ib co hom phiaj puas tsuaj rau tej xwm txheej no.
“Qhov tau ua rau txaus tu siab heev txog cov neeg Stolen Generations uas yog ntau caum txheeb tus me nyuam yaus raug tshem/cais tawm no, ces lub hom phiaj tseem ceeb tiag yog xav kom txia haiv thiab koom nyob nrog tej kab lis kev cai uas tsis yog neeg txum tim...Thiaj ua rau coob leej ntau tus me nyuam no raug lwm tus ua phem rau thiab muaj coob tus yeej tsis tau rov qab pom/ntsib lawv tsev neeg ntxiv li lawm.”
Tej me nyuam no tos raug cais los vim tias lawv yog cov yuav lees txais tej lawv raug cob qhia tau yooj yim dua, thiab yog cov yuav tsis lees txais lawv tej kab lis kev cai. Tej cuab yig thiaj dag thiab qhia tej me nyuam no tias lawv niam thiab lawv txiv/lawv tsev neeg tas sim neej lawm los sis yog lawv tsev neeg muab lawv xyob laim pov tseg tsis xav yuav lawv lawm.
Cov kev tsis ua tib zoo teev tej xwm txheej no thiaj nyuaj heev thiab ua rau tsis paub tias muaj tej me nyuam no coob npaum li cas raug cais tawm ntawm lawv tsev neeg, tab sis yeej xav tias yuav muaj ib tug me nyuam ntawm txhua txhua peb tug twg raug cais. Thiab peb yeej paub tias txhua txhua cov zejzog neeg txum tim Aboriginal and Torres Strait Islander yeej raug hloov mus ib txhis thiab tej xwm txheej no tau ras los ua ib co caws pliav uas yeej tseem nyob rawv rau hauv lawv nruab siab.
CANBERRA, AUSTRALIA - FEBRUARY 13: Tej tub koom siab ntawm Australia cov neeg Stolen Generations cov kev tu siab rau lub caij lawv mloog Australia tus qub thawj pwm tsav Kevin Rudd hais lus thov txim rau tej kev txhaum txheej uas tej tsoom fwv Australia tau ua rau neeg txum tim hnub tim February 13, 2008 ntawm tuam ceeb Canberra, Australia. Cov lus thov txim no yog hais fi tsi ntsees rau ntau caum txheeb tus neeg txum tim Aborigines uas raug yuam cais tawm ntawm lawv tsev neeg thaum lawv tseem yog me nyuam yaus raws li Australia tej tsoom fwv dhau los tej cai uas tau siv tab sis tso tseg tsis siv tam sim no lawm. (Photo by Mark Baker-Pool/Getty Images) Credit: Pool/Getty Images
Coj tej me nyuam no mus rau qhov twg?
Yeej muaj tej me nyuam coob heev uas raug nom tswv muab cai no raug coj mus nyob rau ntawm tsoom fwv xeev tej chaw los yog tej tsev teev hawm thoob teb chaws no.
Thiab pheej muab tej chaw no hu tias yog cov chaw xyaum thiab cob qhia los yog tej chaw nyob chaw pw so kawm ntawv uas tej me nyuam yuav raug qhuab qhia raws ib co cai uas nruj heev. Thiaj tsis pub lawv lees paub lawv tej cim thawj thiab tis npe tshiab rau lawv, kom lawv kawm lwm yam ntawv tshiab thiab ntseeg ib cov kev ntseeg tshiab.
Tej nkauj muam nraug nus los yeej ib txwm raug cais tsis pub nyob ua ke, thiab muaj ib co chaw ces tsuas pub tej me nyuam txij li yug los txog hnoob nyoog 2 xyoos nyob xwb.
Xyoo 1943 uas tau 4 xyoos tom qab uas Aunty Lorraine Peeters uas yog ib tug poj niam neeg txum tim cag ceg neeg Gamilaroi thiab Wailwan tau raug muab cais tawm ntawm nws tsev neeg coj mus nyob rau ntawm Cootamundra Domestic Training Home for Aboriginal Girls ntawm NSW. Ces nws ob tug nus kuj raug coj mus nyob rau ntawm qhov chaw nto npe phem Kinchela Aboriginal Boys' Training Home.
Nws yeej tseem nco tias “Yus yuav raug rau txim kiag tam sim ntawd yog tias yus tseem tsis nco qab coj tam li ib tug neeg dawb thiab yeej raug txim yam txaus ntshai heev ntawm tej chaw ntawd,”
“Lawv yeej tsis pub peb tham txog tias ib tug neeg txum tim Aboriginal zoo li cas li. Ces lawv thiaj tej me nyuam yaus hnoob nyoog 4 xyoos ntxuav hlwb tag lawm. Tsis ntev ces yus cia li tsis nco tias neeg txum tim Aboriginal tej xub ke ua neej zoo li cas lawm thiab cia li tau mus kawm tej neeg dawb txoj kev ua lub neej lawm xwb.”
Ces 10 lub xyoo txuas ntxiv ntawd Aunty Lorraine thiaj tau mus kawm ua ib tug neeg tu vaj tu tsev rau cov cuab yig neeg dawb.
Tam sim no ces nws yog ib tug uas tau los ua ib lub suab tseem ceeb sawv cev rau Australia tej neeg txum tim uas ntxeem dhau tej xwm txheej no uas tseem muaj txoj sia ua lub neej nyob, thiab kuj yog tus teeb tsa cov Marumali Program, uas yog ib co program tsim tsi ntsees coj los pab rau tej neeg uas raug yuam cais tawm ntawm lawv tsev neeg kom ntxeem dhau tej xwm txheej no.
Shannan Dodson CEO Healing Foundation
Tej xwm txheej muaj rau ntau phaum neeg (Intergenerational trauma) yog tej xwm txheej dab tsi?
Yeej tau muaj tej xwm txheej no rau tej me nyuam, rau lawv tsev neeg thiab tej zejzog txuas ntxiv tas los rov qab muaj dua ntxiv thiab.
Aunty Lorraine hasi tias yeej muaj tej hluas tam sim no yeej tsis paub tias xyov lawv yog leej twg, lawv tshwm sim qhov twg los, los sis vim li cas lawv thiaj li coj tej cwj pwm li lawv coj ntawd.
“Thiab yog ib co xwm txheej teeb meem uas tshwm sim tag los rov qab tshwm sim ntxiv. Yog tias peb tsis muaj peev xwm los daws tau tej teeb meem no hauv peb tej cuab yig, ces ntshe yeej tseem yuav muaj tej xwm txheej no txuas ntxiv.”
Vim raws li keeb kwm paub lawm ces yeej tsis tshua muaj kev pab cuam rau tej neeg no, ces thiaj tseem ua rau muaj tej xwm txheej uas tau ntshai rau sab ntsuj plig thiab cev ntaj ntsug no tuas ntxiv rau tej me nyuam li lawv tau pom tej teeb meem uas lawv niam thiab lawv txiv los yog lawv pog lawv yawg ntsib.
Tej xwm txheej no thiaj yog ib co xwm txheej muaj rau ntau phaum neeg.
Shannan Dodson thiaj tshab txhais tias tej neeg raug cais uas tseem muaj txoj sia nyob tham tias yog tej yam nyuam npaum li cas rau cov kev ua leej niam leej txi rau lawv tej me nyuam, vim lawv tsis yog tej neeg tau loj hlob uas yuav tau txais kev hlub thiab kev pab los ntawm lwm tus.
“Yeej muaj ib txhia neeg no uas tseem muaj txoj sia ua lub neej yeej tau lees tias vim tej xwm txheej uas tau ua rau lawv tau ntshai rau sab ntsuj plig thiab cev ntaj ntsug uas lawv tau ntsib no, yog tej yam txaus tu siab heev uas tseem muaj tej teeb meem no txuas ntxiv rau lawv tej me nyuam. Thiab peb yeej pom tias yeej tseem muaj tej voj voog teeb meem no rov qab tshem sim tas los rov qab tshwm sim ntxiv rau lawv tej xeeb leej xeeb ntxwv. Vim li ntawd thiaj muab tej xwm txheej no hu tias yog cov xwm txheej ntau phaum neeg (Intergenrational trauma).”
Tej yam ntxwv ntawm cov teeb meem muaj rau ntau phaum neeg no ces yog tej kab theem ntawm tej cuab yig ua tsis tsheej cuab tsheej yig ntau heev, tej teeb meem kub ntxhov, tej kev raug kaw tsev laj cuj, tej kev tua tus kheej/txov txo tus kheej txoj sia thiab tej kev quav dej quav cawv.
Ces tam sim no tej zej zog thiaj tab tom los tsim ib cov program coj los pab kom tej neeg no ntxeem dhau ntawm tej teeb meem uas pheej tseem ua rau muaj rau ntau phaum neeg.
Cov kev kawm thiab kev qhia txog tej neeg Stolen Generations tej dab neeg no thiaj yog ib feem tseem ceeb ntawm cov kev pab kom lawv ntxeem dhau tej xwm txheej no — vim yog ib cov kev ua tib zoo xyuas kom tag nrho txhua tus neeg Australia nkag siab txog qhov tseeb ntawm cov neeg Stolen Generations. Credit: davidf/Getty Images
Cov kev pab kom tej neeg ntxeem dhau tej xwm txheej no zoo li cas?
Shannon Dodson hais tias “Kuv xav tias cov kev ntxeem dhau tej xwm txheej no yeej sib txawv ntawm ib tug rau lwm tus, tab sis peb yeej paub tias tej neeg raug cais uas tseem muaj txoj sia ua lub neej nyob no yuav tau txiav txim siab seb lawv xav kom cov kev pab lawv ntxeem dhau tej xwm txeej no tsim nyog yog cov zoo li cas rau lawv.”
Cov kev pab kom ntxeem dhau tej xwm txheej no txhais tias yuav tau rov qab los kho cov kev teeb tsa ntawm tej cuab yig dua tshiab thiab txhawb nqa kom muaj tej zejzog ruaj khov. Thiab kuj txhais tau ntxiv tias rov qab pab kom tej neeg mloog tau tias lawv muaj lawv tej cim thawj thiab muaj toj kev xaus siab hlo tias lawv yog leej twg. Ces cov kev nrog xyuas kom tej neeg no rov qab muaj kev sib cuag nrog lawv tej teb chaws, tej kab lis kev cai thiab tej cim thawj uas lawv tau plam lawm thiaj yog tej yam tseem ceeb heev rau lawv.
Tej neeg raug tej xwm txheej no uas tseem muaj txoj sia ua lub neej nyob los kuj hais tias lawv tau qhia txog tej xwm txheej tau tshwm sim rau lwm tus paub thiab yeej muaj peev xwm yuav qhia tau tej xwm txheej tau tswm sim dhau los uas tsis tau txais kev ncaj ncees no.
Aunty Lorraine uas yog ib tug tau ua hauj lwm nrog lub koom haum Coota Girls Aboriginal Corporation, uas raug tej neeg tau nyob ntawm lub koom haum
Cootamundra Home teeb tsa no hais tias:
“Peb tau mus sib ntsib sib sau ua ke ua voj vooj ua ke kom thiaj pab peb ntxeem dhau tej xwm txheej tau tshwm sim rau peb dhau los ntawm tej chaw ntawd,''
“Lawv yeej tau tham txog tej xwm txheej ntawd thiab tau pab kom lawv ntxeem dhau thaum lawv los qhia tej xwm txheej tau tshwm sim rau lawv rau lwm tus...thiab yog lawv tham thiab qhia tej xwm txheej no ntau npaum li cas ces yuav muaj neeg kub siab nco txog thiab yuav tsis hnov qab txog lawv.”
Lub koom haum Healing Foundation daim yeej yaj kiab (video) qhia txog tej xwm txheej ua rau neeg txum tim tau ntshai rau lawv lub cev ntaj ntsug thiab sab ntsuj plig.
Daim video no muaj tej suab ntawm tej neeg uas tau nruam sim lawm.
Cov kev kawm thiab cov kev qhia qhov tseeb
Cov kev kawm kev qhia txog tej xwm txheej no kuj yog ib feem tseem ceeb ntxiv uas yuav ua tib zoo xyuas kom tag nrho txhua tus neeg Australia nkag siab txog qhov tseeg txog cov neeg Stolen Generations.
Aunty Lorraine nqua hu tias “Kuv yeej xav pom kom tej neeg Australia uas tsis yog neeg txum tim pub cib fim rau lawv tej me nyuam kawm txog tej keeb kwm tseeb tiag ntawd lub teb chaws no, thiab rhuav tshem tej system tsis zoo no thiab rov qab pib dua tshiab, vim rau qhov tej cai uas tau tsim siv lub caij ntawd yog ib co faib cais ntxub ntxaug tsis nyiam peb tsev neeg.”
Leilla Wenberg ces yog ib tug neeg ntawm cov neeg Stolen Generation uas raug muab tshem thiab cais tawm ntawm nws niam nws txiv lub tsheb thaum nws tseem muaj hnoob nyoog 6 hli, tau tuav ib tug tswm ciab nco txog hnub National Sorry Day ntawm Royal Prince Alfred Hospital hnub tim 26 lub 5 hlis ntuj xyoo 2009 ntawm Sydney, Australia. Thiab yeej ua lub koom txoos National Sorry Day txhua xyoo rau hnub tim 26 lub 5 hlis ntuj txij xyoo 1998 los lawm, coj los ua cov kev lees paub txog tej kev txhaum txheej uas tau ua dhau los rau tej neeg txum tim tej cuab yig uas muaj lawv tej me nyuam raug cai tam li yog cov neeg stolen generations. Credit: Sergio Dionisio/Getty Images
Tam sim no ho yuav ua dab tsi ntxiv coj los pab tej neeg Stolen Generations uas tseem muaj txoj sia ua neej nyob?
Xyoo 2008 ces yog ib xyoo tseem ceeb heev uas Australia tus qub thawj pwm tsav Kevin Rudd uas yog tus nom lub caij ntawd tau los hais ib co lus thov txim rau cov neeg Stolen Generations, lawv tej xeeb leej xeeb ntxwv thiab lawv tsev neeg tau tos los ntev heev.
Txuas ntxiv ntawd ces thiaj tau tsim ntau cov kev pab cuam los pab tej neeg txum tim no suav cov kev tsim tsa lub koom haum Healing Foundation nrog thiab.
Shannan Dodson hais tias tej neeg no uas tseem muaj txoj sia nyob thiab lawv tsev neeg yeej tseem xav tau kev pab cuam ua ntuv zus txuas ntxiv. Nws hais tias:
“Peb lub koom haum yeej txhawb nqa tiag tiag kom tsim kom tau ib co kev pab cuam tej neeg kom txheem dhau tej xwm txheej no uas siv tau thoob plaws ntawm teb chaws no, ua tib zoo xyuas kom tau txais kev ncaj ncees rau phaum neeg Stolen Generation, tab sis kuj yog tej yam txaus tu siab heev uas yeej tseem muaj coob tus ntxiv tau tas sim neej lawm thiab.”
Lub koom haum Healing Foundation cov program Marumali uas yog ib co program uas tej zejzog yog cov tsim coj los siv thiaj pab kom ntau phaum neeg txum tim muaj peev xwm ntxeem dhau ntawm tej xwm txheej no txuas ntxiv.
Cov kev yuav pab kom tej neeg no ntxeem dhau tej xwm txheej no ces teb chaws Australia no yuav tsum tau los mloog lawv tej dab neeg thiab los pab tej neeg uas tseem muaj txoj sia ua lub neej kom ceev txuag tau lawv tej dab neeg tseg cia.
READ MORE
Closing the Gap yog dab tsi?
Subscribe los yog caum mloog tej xov xwm kaw ua suab Australia Explained kom paub txog ntau yam xov xwm tseem ceeb thiab tej lus taw qhia kom koj pib tau lub neej tshiab ntawm teb chaws Australia.
Yog tias koj muaj ib co lus nug dab tsi los yog muaj ib co tswv yim dab tsi? Ces xa email rau peb rau ntawm australiaexplained@sbs.com.au
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follow los yog lwm cov podcasts platforms (iHeart, Amazon Music & Podcasts).
