Dr. Kearrin Sims uas yog ib tug lees kais qhia phab kev txhim kho ntawm tsev kawm qib siab James Cook University tau qhia tias tos nws ho tau coj nws tsab ntawv xov xwm ceeb toom txog Mr. Sombath Somphone tau ploj lawm coj mus tso rau phau ntawv xov xwm Development Policy Journal ces nws muaj lub hom phiaj xav txheeb tias "Tim dab tsi ua rau Mr Somphone ploj lawm, vim li cas nws thiaj raug yuam kom ploj, thiab tej xwm txheej tshwm sim uas cuam tshuam txog nws cov kev ploj no ho qhia tau dab tsi rau peb txog cov kev ua hauj lwm ntawm ib lub teb chaws uas pheej caij tsuj tej neeg txoj cai laj fai kum xeeb thiab muaj tej xwm txheej no tshwm sim tau li cas?"
Dr Sims hais tias vim Mr. Somphone cov teeb meem no yog ib co ''txawv'' dua lwm cov, vim tias nws tsis yog ib tug neeg tawm tsam tsoom fwv li lwm cov neeg uas pheej tawm tsam tsoom fwv, tab sis nws yog ib tug neeg ua hauj lwm pab txhim kho tej zejzog, thiab yeej tau siv tag nrho nws lub neej los ua hauj lwm ua ke nrog tsoom fwv Nplog kom pab tej zejzog ua tau lub neej zoo tuaj ntxiv tab sis nws kuj tseem ploj lawm thiab ces tej zaum lwm tus neeg kuj yuav ploj tau tib yam li nws thiab.
Dr. Sims hais tias yog tej yam txaus tus siab heev uas ''yeej tseem pom muaj tej neeg tawm tsam ntawm cov teb chaws Southeast Asia raug yuam kom ploj, raug txhom yam tsis muaj pov thawj tim khawv los qhia tias tus neeg ntawd ua dab tsi txhaum, los yog muaj qee zaus ces tseem raug neeg ntiav tua los yog tsoom fwv tau ua txhaum rau lawv txoj cai thiab.'
"Yeej muaj cov kev phom sij sib txawv rau tej neeg pej kum haiv thiab cov neeg Nplog uas ua hauj lwm hauv teb chaws Nplog. Yog tias koj yog ib tug neeg ua hauj lwm hauv lub teb chaws zoo li teb chaws Nplog no ces koj yuav tsum tau ceev faj thiab ua tib zoo xyuas tsam koj ho ua tej yam ua rau tej neeg Nplog koj nrog hauj lwm ua ke ntawd raug kev phom sij, vim tej neeg no yog cov yuav raug tau teeb meem ntau dua. Yog li tsis yog tias koj yuav tau nrog xyuas kom tau txais kev nyab xeeb rau koj tus kheej xwb, tab sis tej neeg koj nrog ua hauj lwm ua ke cov kev nyab xeeb nrog thiab.''
Dr. Kearrin Sims hais tias Nplog yeej yog ib lub teb chaws thaj yeeb, muaj kev ruaj ntseg thiab yeej muaj tej kab lis kev cai zoo, tab sis ua ke no los kuj yog ib lub teb chaws uas yeej coj nruj heev yog tej neeg pheej tham txog tej yam dab tsi uas tsoom fwv tsis xav kom tham rau lwm tus, thiab kuv xav tias tseem yog ib lub teb chaws uas tej neeg tseem ntsib raug nom tswv tsim teeb meem ntau yam cuam tshuam txog lawv tej cai. Thiab yeej muaj neeg cav tias, cov kev yuam kom ib tug neeg twg ploj yog ib lub tswv yim txhob txwm coj los tswj hwm kom tej neeg tsis txhob tham dab tsi txog tej teeb meem ntau yam uas tsis zoo tham.
Dr. Kearrin Sims hais tias 'txawm li cas los kuv yeej tsis xav muab tej no coj los ua ib cov kev qhau zog rau tej neeg xav mus ua hauj lwm hauv Nplog kom zoo rau lub teb chaws los yog tej ib puag ncig thiab. Kuv tsab ntawv teeb txheeb no tsuas xav qhia kom sawv daws paub txog tias tej neeg mus ua hauj lwm rau lub teb chaws coj tej kev tswj hwm zoo li cas, thiab lawv yuav tsum ua tib zoo ceev faj thiab xav kom ntxaws txog txhua ya lawv ua tias seb puas yuav ua rau lawv tus kheej los yog lwm tus tsis tau txais kev nyab xeeb xwb."
Yog nug txog tias tsoom fwv Nplog puas paub thiab puas muaj feem cuam tshuam txog Sombath Somphone cov kev ploj tsis paub ntab ntw no? Ces Dr. Sims kuj tau teev txog cov yeeb yaj kiab uas CCTV yees tau uas yeej qhia tias ''Mr. Somphone yeej raug tub ceev xwm hais kom nres ntawm tub ceev xwm qhov chaw tshawb neeg rau lub caij muaj tub ceev xwm ua tej hauj lwm no ntawm tuam ceeb Vientiane, ces nws mam li raug muab hloov rau lub tsheb tshiab thiab muaj neeg coj nws mus lawm."
"Thaum tej koom haum zejzog pej kum haiv yeej qhia tias lawv txaus siab yuav pab nom tswv Nplog mus tshuaj ntsuam los tsoom fwv tsis kam. Kuj tseem tau muaj xov xwm cej luam tias Nplog tej koom haum txhim kho raug yuam kom tsis txhob tham txog Sombath tej teeb meem ntawm lub rooj sab laj ASEAN People Forum thiab. Ntxiv ntawd los yeej tsis muaj Nplog tej chaw nthuav xov xwm yeej ntsiag to tsis tham txog nws cov kev ploj no li. Yog li tej pov thawj tim khawv uas muaj ntawd yeej yog tej yam nyuaj kawg nkaus yuav tsis ua rau peb ntseeg tias tsoom fwv tsis muaj feem cuam tshuaj ua rau Sombath Somphone tau ploj mus no.''
"Peb yeej paub tias nws tau ploj tom qab tau mus koom cov rooj sab laj 2012 Asian Europe Meeting thiab ASEAN-Europe People Forum uas yeej tau muaj Nplog tej neeg zejzog tau hais ntau yam lus tsis zoo txog neeg txawv teb chaws cov kev nqes peev thiab tsoom fwv cov kev muab av rau tej neeg txawv teb chaws coj mus ua lagluam uas ua rau tej neeg Nplog raug tshem ntawm lawv tej liaj teb kom tej lagluam no thiaj ua tau luam, Sombath Somphone los yeej yog ib tug koom ua tswv cuab tswj lub rooj sab laj no thiab, ces nws cov kev raug txhom thiaj cuam tshuam nrog tej hauj lwm nws ua no."
"Txawm li cas los kuj muaj ib cov kev xav ntxiv thiab, uas kuv los yeej xav tias tej zaum yuav yog thiab uas Sombath Somphone ploj tsis yog tim tej hauj lwm nws ua tab sis yog tim nws yog ib tug neeg muaj koob nto npe, ces tej xwm txheej no thiaj yog ib tsab xo muaj zog heev qhia rau Nplog tej neeg ua hauj lwm txhim kho tias, yog Sombath Somphone twb muaj peev xwm raug txhom lawm, ces leej twg los yeej yuav raug txhom tau tib yam thiab, ib qhov tseem ceeb ntxiv mas peb yeej paub tias tsis yog tib cov xwm txheej tej neeg raug yuam kom ploj nkaus xwb thiab," raws li Dr Sims tau qhia.
Yog tham txog cov kev txhim kho lawm ces tej zaum nom tswv Nplog kuj yuav cav tias yeej yuav tau txais txiaj ntsim ntau tshaj qhov pheej tseem muaj ib txhia neeg tsawg tsawg tsis pom zoo thiab pheej mus tawm tsam ntawd. Tab sis Dr Sims ho xav txawv thiab.
"Raws li kuv xav lawm mas, cov kev txhim kho teb chaws Nplog yeej yog ib co tseem ceeb, tab sis ib qho tseem ceeb ntawm cov kev txhim kho no mas yog tej neeg cov kev muaj peev xwm tawm tau tswv yim txog txhua yam uas lawv ntseeg thiab. Nplog cov lagluam zoo tuaj no los kuj muaj tej yam tsis zoo rau tej neeg coob heev lub neej thiab tej ib puag ncig thiab, yog li ntawd tsis hais cov kev txhim kho no tsis hais yog nyob hauv Nplog teb los yog nyob qhov twg li yeej yuav muaj ib cov teeb meem dab tsi xwb. Yeej yua ua rau plam los tau ntau yam txiaj ntsim los ntawm tej lagluam loj hlob huam vam sai no thiab kev vam meej, yog li ntawd peb yuav tsum tau los txiav txim siab luj tias cov kev txhim kho ntawd puas yuav ua rau peb tau los yog plam txiaj ntsim ntau dua thiab puas tsim nyog los tsis tsim nyog li cas," raws li Dr. Sims tau qhia.
Dr. Sims hais tias raws li kuv cov kev xav mas, tsis hais ib cov kev yuam kom ib tug neeg twg cia li ploj yam tsis paub ntab ntw yog tej yam yuav tsis nyog, thiab raws li kuv xav lawm mas Sombath Somphone cov teeb meem no yog tej yam txaus tus siab tshaj plaws thiab yog ib cov kev piam siaj loj heev vim nws yeej tau siv nws lub neej txoj sia los ua tej hauj lwm no pab txhim kho tej zejzog thiab yeej tau ua tau ntau yam zoo tiav. Thiaj yog tej yam tseem ceeb heev uas peb yuav tsum hais thiab txhawb nqa kom muaj cov kev pauv hloov thiab txhawb nqa kom muaj kev ywj pheej tshaj no ntxiv rau tej laj fai kum xeeb, kom tej neeg muaj txoj cai raws li tib neeg tsim nyog muaj, thiab los nrog xyuas tias peb yuav ceev faj ua li cas kom ua tau tej no, kom tsis txhob pom muaj tej xwm txheej phom sij li Sombath Somphone cov kev raug yuam kom ploj mus no tshwm sim ntxiv lawm.
10 xyoo dhau los no Nplog tej lagluam kuj tau loj hlob huam vam zoo heev, tab sis nws yeej tseem tos pej kum haiv cov kev pab cuam los yog pej kum haiv cov kev nqes peev feem ntau xwb thiab. Nws tej nyiaj puas xyoo los yeej tseem poob peev, tseem tiv nuj nqes ntau, nrog rau cov kev tsis muaj tej neeg muaj txuj ci paub ua hauj lwm txaus siv thiab tsis tshua muaj cib fim ua lagluam thiab. Txawm tseem muaj tej teeb meem no los Nplog yeej muaj lub hom phiaj xav coj nws lub teb chaws kom dim thiab txhob raug teev zwm npe nrog rau cov teb chaws txom nyem uas tsis muaj kev txhim kho (Least developed countries - LDCs) rau xyoo 2024 thiab raws li nom tswv tej xov xwm tau qhia. Tab sis cov kev xav dim ntawm tej teb chaws tsis muaj kev txhim kho no puas yuav ua rau Nplog tau txais los yog yuav plam ntau yam txiaj ntsim?
"Dr. Sims hais tias, yeej muaj ntau yam (li Gross National Income, Human Asset Index, and Economic Vulnerability Index-UN-OHRLLS) yog cov yuav ua cov txiav txim tias seb Nplog puas dim ntawm cov teb chaws tsis muaj kev txhim kho. Tsis xav kom peb pheej lam xav tias cov kev coj Nplog kom dim thiab txhob raug teev npe nrog cov teb chaws tsis muaj kev txhim kho no txawm yuav pab kom tej pej xeem tau lub zoo neej thoob plaws teb chaws Nplog lawm, tab sis tsuas txhais tau tias thaum Nplog ua tau ntau yam lawm ces ua rau nws tsis raug teev nrog cov teb chaws tsis muaj kev txhim kho lawm xwb, yeej tau muaj ntau lub teb chaws uas tsis raug teev npe ua cov teb chaws tsis muaj kev txhim kho no yeej ntsib teeb meem ntau yam thiab. Tsis ntev los no, kuv yeej tau mloog ib tug neeg Fiji hais lus ntawm ib lub rooj sab laj yeej tau qhia tias, cov kev coj yus lub teb chaws tawm ntawm cov teb chaws tsis muaj kev txhim kho ntawd yuav tsis tau txais txiaj ntsim dab tsi li, thiab haj yam yuav ua rau yus ntsib ntau yam teeb meem ntau tuaj ntxiv xwb, vim yuav ua rau yus lub teb chaws plam ntau yam txiaj ntsim li yuav tsis tau txais cov kev pab cuam ntawm pej kum hais los yog lwm cov txiaj ntsim tau los ntawm kev ua lagluam lawm. Yog li ntawd thaum Nplog dim ntawm cov teb chaws tsis muaj kev txhim kho lawm ces nws yuav plam tsis tau txais tej txiaj ntsim no ntxiv lawm."
Dr. Kearrin Sis xaus lus tias txawm li cas los kuv xav tias teb chaws Nplog yeej muaj ntau yam zoo, thiab kuv tsis xav kom muab kuv cov kev teeb txheeb txog Sombath Somphone cov kev ploj, tej kev caij tsuj laj fai kum xeeb thiab cov kev ua txhaum leej tib neeg txoj cai ntawm lub teb chaws no los ntau nqe tsis zoo rau lub teb chaws no.
Mloog tau SBSHmong rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm SBS Hmong Facebook thiab subscribe los sis yog download thiab mloog tau ntau cov podcasts (xov xwm ua suab) ntawm google podcasts, spotify, thiab apple podcasts los yog download SBS Radio App kom koj mloog tau SBS Hmong.
