Xov xwm luv tshaj tawm hnub zwj Feej (Wednesday news 24.09.2025):
ABC raug Federal Court plua $150,000
Zej tsoom Australia lub chaw nthuav xov xwm kuj rau Australia lub tsev hais plaub teb chaws Federal Court nplua $150,000 rau cov kev muab nws tus neeg nthuav xov xwm Antoinette Lattouf uas ua hauj lwm nrog ABC Radio Sydney's Morning program rho tawm xyoo 2023 vim nws tau share lub koom haum Human Rights Watch ib qho post txog Gaza. Ces thiaj muaj sij hawm 28 hnub rau nws them, thiab tau muaj tej kev nplua no ntxiv rau tej $70,000 uas twb xub them rau Ms Lattouf ua ntej lawm.
Australia ob tug kws kho mob ntawm Gaza raug hawv
Dr Nada Abu Alrub uas yog ib tug kws kho mob ntawm Gold Coast thiab Dr Saya Ayiz uas yog ib tug kws kho mob uas hnob tshuaj loog rau tej neeg mob ua ntej yuav phais thiab tus tej neeg mob ua ntej yuav phais thiab tom qab phais tas uas tseem tab tom ua hauj lwm ntawm Gaza hais tias nkawv yeej raug neeg phem hawv thiab ua rau nkawv ntshai tsam tsis tau txais kev nyab xeeb ntawm Gaza rau lub caij nkawv tseem ua hauj lwm ntawm lub tsev kho mob Al Shifa hospital nrog Palestinian Australian NZ Medical Association.
UN lub tuam chav tswj kev ruaj ntseg thiab cov kev pab cuam neeg Palestinians
Palestinian tus nom uas ua hauj lwm ntawm United Nations (UN) tau nqua hu kom UN nrhiav kev pab cuam rau tej neeg Palestinian txom nyem ntawm Gaza rau lub caij nws hais ib co lus rau UN lub tuam chav tswj kev ruaj ntseg. Riyad Mansour tau qhia rau lub tuam chav no tias tej poj niam me nyuam yog cov pheej rau Israel tej tub rog tua thiab yog cov yuav raug tau teeb meem yooj yim tshaj plaws.
Australia tej me nyuam hnoob nyoog 10 xyoo twb pom duab/video liab qab hauv online lawm
Lub koom haum eSafety Commissioner hais tias nws cov kev teeb txheeb tshiab hu ua Keeping Kids Safe Online txheeb tau tias muaj 32 feem pua ntawm Australia tej me nyuam yaus tseem yau heev hnoob nyoog li 10 xyoo twb tau pom tej duab/video liab qab hauv online lawm, thiab tau pom tej xwm txheej no hauv online thiab muaj 12 feem pua ntawm tej me nyuam tau pom cov sexual violence hauv internet.
Tus mob Autism, Meskas thiab Australia
Australia tus nom tswj dej num noj qab haus huv tau tib Donald Trump cov kev cav uas ua rau tej neeg muaj kev txhawj xeeb txog tej lus cav cuam tshuam txog tus mob Autism thiab tej tshuaj vaccines uas Meskas tus nom tswj dej num noj qab haus huv Rober F Kennedy Jr tau cav tias muaj feem cuam tshuam ntawm cov tshuaj noj paracetamol thiab autism thiab Meskas tus thawj tsav meem (President) Donald Trump hais kom txheeb tej kev taw qhia rau cov kev siv tej tshuaj no tshiab thiab tej tshuaj vaccine hno rau tej me nyuam.
Khaub zeeg cua Ragasa
Ntiaj teb lub khaub zeeg cua chaw sov uas muaj ceem tshajplaws xyoo no tseem tab tom ua rau yuav muaj cua hlob thiab ntuj los nag hlob ntawm Hong Kong. Ces thiaj muaj lub chaw tshuaj ntsuam thiab kwv yees huab cua ntawm lub nroog no hais tias lub khaub zeeg cua no yuav ua rau muaj cua hlob muaj ceem txog 200 km/hr hauv plawv khaub zeeg cua thiab 100 km/hr raws cov ntug nroog sab qab teb.
Raug txim txhaum vim tawm tsam ntxub ntxaug neeg Jews
Tau muaj ib tug tub hluas hnoob nyoog 16 xyoo raug coj mus hais plaub hnub no raug liam tias tau tsim cov xwm txheej ntxub ntxaug cov neeg Jews ntawm Sydney ib lub tsheb ciav hlau thaum ntxov limtiam no. Nws thiaj rau teem txim ntaus neeg, hawv kom lwm tus ntshai, hawv tsim kev kub ntxhov rau lwm tus vim tus neeg raug teeb meem ntawd coj ib co kev ntseeg twg, ces nws thiaj raug muab txhom ntawm lub zos Padstow uas yog lub zos sab qab teb ntawm Sydney.
NSW lub AI chat hu ua NSWEduChat
Tej tub kawm ntawm xeev New South Wales (NSW) yuav muaj cai siv tau cov artificial intelligence pab lawv ua lawv tej homework rau cov kev pub Australia tej zej tsoom tej teej kawm siv cov AI chatbot no. Thiaj tso cai rau tej tub kawm txij xyoo 5 los yog siab tshaj ntawd muaj peev xwm siv tau NSW lub tuam chav tswj kev kawm lub app hu ua NSWEduChat txij term 4 mus.
Cov kev ntsib tim ntsej tim muag ntawm Australia thiab Meskas tus coj
Kuj tau muaj cov kev pom zoo tom qab tau tsis muaj peev xwm sib ntsib ntawm Australia thiab Meskas tus coj. Hnub tim 20 lub 10 hli ntuj (2025) no ces Australia tus thawj pwm tsav Anthony Albanese thiab Meskas tus thawj tsav meem (President) Donald Trump yuav sib ntsib tim ntej tim muag uas Mr Albanese yuav ntsib Meskas tus coj thaum nws tseem koom UN lub rooj sab laj ntawm New York.
Neeg thoj nam Afghan
Tau muaj ib co kev soj ntsuam tshiab ntawm lub koom haum AMES Australia uas tau txheeb txog tej neeg thoj nam Afghan uas nyob ntawm Melbourne, Sydney thiab Adelaide uas tau tsiv tawm Kabul ntawm teb chaws Afghanistan tuaj nyob Australia thaum Taliban tswj hwm teb chaws tau hais tias ua rau lawv mloog tias lawv raug tos txias zoo thiab ntseeg tias lawv muaj peev xwm ua tau lub neej ntawm teb chaws no.
Kev koom tes txhim kho ntawm Cob tsib thiab Askiv
Tau muaj cov kev koom tes txhim kho ntawm Cob tsib thiab Askiv rau cov hauj lwm txhim kho tej nroog thiab kho kom tej nroog yog cov siv tau ntev tsis tsim teeb meem rau tej ib puag ncig rau thiab cov kev tsim tej haus paus txhim kho raws li Tuoitre qhia.
Nplog 3 lub tswv yim rau tiam digital age
Nplog npaj yauv xyuas kom siv tau digital technology rau tiam digital age no li los ua ntau cov hauj lwm tseem ceeb li muaj kev loj hlob rau sab lagluam digital, tsim tau tej hluav taws xob huv siv thiab sib cuag tau nrog lwm lub teb chaws. Thiaj ua rau muaj Nplog ib lub tuam txhab nqes peev nyiaj $100 million rau cov kev cog qoob loo tiam tshiab, ua ke no los Nplog kuj tau ua tswv cuab tswj cov carbon market kom nrhiav tau nyiaj thiab kev nqes peev los txhawb nqa tej lagluam cog qoob loo thiab pov puag tej ib puag ncig thiab tau hluav taws xob huv siv uas tau muaj nom tswv Nplog tej tuam chav tswj ib puag ncig tsoom fwv Australia raws lub koom haum Global Green Growth Institute nrog lwm cov tuam txhab los koom lub rooj sab laj no raws li Vientiane Times qhia.
Thaib lub tsev kis xeev siab tsis pom zoo siav tsab cai twv txiaj thiab ua kev lom zem
Thaib lub tsev kis xeev siab tsis pom zoo nrog tsoom fwv tsab cai xav tsim tej chaw twv txiaj yuam pov thiab chaw ua ke lom zem vim qhia tias nws txhawj xeeb tsam tej lagluam no ua rau muaj teeb meem rau teb chaws, tej lagluam thiab cuam tshuam nrog haiv neeg no cov kev ruaj ntseg. Tus tsoom fwv Paetongtarn dhau los yog tus tsim tsab cai no raws li Bangkok Post tau qhia.
