Tub ceev xwm yeej muaj ntau yam fwj chim uas lawv muaj peev xwm siv tau raws kev raws cai, suav cov kev nug lus nug, cov kev taw kev kom zej tsoom mus los yog tsis txhob mus rau ib qhov chaw qhov twg thiab muaj peev xwm tshawb ib tug twg. Ntxiv no yog tej tsim nyog koj paub txog koj tej cai thiab tej luag hauj lwm koj tsim nyog ua thaum muaj kev cuam tshuam nrog tub ceev xwm.
Ntsiab lus:
- Tub ceev xwm muaj tej fwj chim sib txawv thoob plaws ntawm tej xeev.
- Cov kev tsis kam nres tshuab cawv yog ib co kev ua txhaum cai.
- Tej cai yeej teev tseg tias yog tub ceev xwm nug ces koj yuav tau qhia koj tej ID (Identification Card) tab sis koj kuj muaj peev xwm tsis teb tej lus nug ntau yam ntxiv tau thiab.
- Nrhiav kev sab laj nrog tej kws lij choj yog tias koj muaj kev txhawj xeeb txog ib co kev cuam tshuam nrog tub ceev xwm twg.
- Thaum twg tub ceev xwm thiaj muaj pev xwm siv fwj chim tswj kuv?
- Kuv muaj cai dab tsi thiab muaj tej luag hauj lwm kuv yuav tau ua thaum tub ceev xwm cheem kuv?
- Move-on orders yog dab tsi?
- Thaum twg tub ceev xwm thiaj muaj peev xwm hais kom muab kuv daim ID (Identification Card) rau lawv saib?
- Kuv puas muaj peev xwm yees yeeb yaj kiab txog tub ceev xwm?
- Yog tias kuv ho muaj kev txhawj xeeb txog ib co kev sib cuam tshuam nrog tub ceev xwm ne yuav ua li cas?
Koj puas paub tias koj muaj cai dab tsi yog tias tub ceev xwm cheem kom koj nres ntawm teb chaws Australia?
Raws li Samantha Lee uas yog tus thawj coj kws lij choj ntawm lub koom haum Redfern Legal Centre hais ces yeej muaj tej neeg coob heev, tsis hais yog tej yug ntawm Australia los yog tej tuaj tshiab rau Australia no li yeej tsis tshua paub tias tub ceev xwm tsuas muaj tej fwj chim ua tau dab tsi xwb.
Thaum twg tub ceev xwm thiaj muaj pev xwm siv fwj chim tswj kuv?
Ib qho uas pom muaj cov kev totabu yuam kev tas mus li txog tub ceev xwm tej fwj chim ces yog cov kev txhawj xeeb txog lawv cov kev siv lawv tej fwj chim.
"Yog tej yam tseem ceeb uas tej neeg paub tias txawm lawv yog tub ceev xwm los lawv yeej tsis muaj cai yuav cia li lam tau lam siv lawv tej fwj chim thiab."
Lawv (Tub ceev xwm) muaj peev xwm yuav siv fwj chim rau ib co xwm txheej twg tsi ntsees, tab sis tsuas yog cov uas muaj laj thawj tsim nyog siv xwb.Samantha Lee
Cov kev siv 'tej fwj chim raws li qhov muaj laj thawj tsim nyog siv' no tsuas yog cov fwj chim kawg uas yuav tsum tau ua tib zoo siv raws li qhov tsim nyog siv xwb thiab; tsis yog yuav siv dhau nom nrim ntawm qhov tsim nyog siv.
Tsis tas li ntawd los yeej tseem muaj tej cai muaj ntsis sib xws li no thoob teb chaws uas teev tias thaum twg tub ceev xwm thiaj muaj peev xwm siv tau lawv tej fwj chim raws kev raws cai thiab.
Txawm li cas los txhua txhua lub xeev ntawm Australia nyias yeej muaj nyias tej cai siv coj los tswj tub ceev xwm tej fwj chim.
"Yog li ntawd koj thiaj yuav tau mus txheeb tej cai ntawm koj lub xeev."
Kuv muaj cai dab tsi thiab muaj tej luag hauj lwm kuv yuav tau ua thaum tub ceev xwm cheem kuv?
Txawm tias muaj qee cov xm txheej ces yeej muaj cai teev tseg tias kom yus yuav tsum tau qhia yus tej ntaub ntawv teev cim thawj kom tub ceev xwm paub tias yus yog leej twg los yeej tsis teev tias yog ib lub luag hauj lwm uas yus yuav tsum tau nqa daim ID nrog yus ntawm Australia xwb.
Txawm li cas los ntawm Australia tej xeev feem ntau ces yus yuav tsum tau nqa ib daim ntawv tsav tsheb uas tseem siv tau tsis hais lub caij twg li uas yus tseem tab tom tsav tsheb. Ntawm qee lub xeev ces nom tswv kuj pub lub caij ob hnub rau yus nqa yus daim ntawv tsav tsheb mus qhia rau tub ceev xwm ib lub chaw ua hauj lwm twg thiab yog tias lub caij tub ceev xwm hais kom yus muab yus daim ID rau lawv saib tab sis tsis nco qab nqa nrog yus es ho muab tsis tau rau lawv saib.
Yog tias tub ceev xwm nug yus npe thiab chaw nyob, ces lawv yuav tsum qhia rau yus tias tim tej laj thawj dab tsi lawv thiaj cheem kom yus nres thiab xav saib yus daim ntawv qhia yus lub cim thawj (Identification Card - ID).
Ms Lee hais tias tsis hais ib co xwm txheej twg li uas muaj kev cuam tshuam nrog tub ceev xwm ces xav taw qhia kom yus nug tub ceev xwm kom lawv taw lub koob yees duab (camera) uas lawv sia ntawm lawv lub cev tso.
"Thaum taws lawm, ces yus mam nug tias vim li cas lawv thiaj cheem kom yus nres."
Klaire Coles uas yog tus coj kws lij choj ntawm lub koom haum Brisbane’s Caxton Legal Centre tshab txhais tias yeej muaj qee cov kev zam thiab tab sis yeej tsis muaj cai los yuam kom yus yuav tsum tau teb tub ceev xwm tej lus nug ntau yam dua ntawm qhov uas yus muab yus daim ID rau lawv saib xwb.
"Tsim nyog tej neeg yuav tau koom tes npaum li qhov tsim nyog lawv ua tau ... thiab xav kom hwm thiab ua raws li tub ceev xwm tau hais kom yus ua, tab sis tsis xav kom yus qhia tej xov xwm ntau tshaj qhov tsim nyog qhia rau tub ceev xwm kom lawv ua tau lawv tej hauj lwm thiab.
"Yus yeej muaj cai nyob ntsiag to thiab tsis hais dab tsi hlo li vim tej zaum tej lus yus hais kuj yuav ua rau yus txhaum plaub thiab," raws li Ms Coles hais.
Move-on orders yog dab tsi?
Tub ceev xwm yeej muaj cai hais kom yus tawm ntawm zej tsoom ib thaj chaw twg mus los yog kom tsis txhob mus rau ib thaj chaw twg rau ib lub caij luv luv twg rau lub sij hawm li ntawm ib hnub (24 teev).
Tej cai ntawm txhua txhua lub xeev yeej yuav tsum muaj ib co laj thawj tsi ntsees uas tso cai rau tub ceev xwm siv lawv luv fwj chim move-on powers.
Tej fwj chim no ces suav tej laj thawj uas lawv ntseeg tias tej zaum yus mus thaiv ib thawj chaw twg ua rau tej tsheb daig los yog tej neeg mus tsis tau, cov xwm txheej mus thab zes ib tug neeg wg los yog ib co xwm txheej uas yuav ua rau lwm tus tsis tau txais kev nyab xeeb.
Thiab yus yeej muaj cai nug tias vim li cas tub ceev xwm thiaj hais kom tej neeg mus rau ib qho chaw twg raws li lawv hais kom mus.
''Yog tias tub ceev xwm hais kom yus tawm ntawm ib qho chaw twg mus, los yog kom mus rau ib qho chaw twg, ces ua tib zoo xyuas kom yus totaub tias vim li cas thiaj ua li ntawd, yuav ntev npaum li cas, thiab yuav mus rau qhov twg, thiab tej uas tub ceev xwm hais kom yus ua ntawd thiaj yog tej yam tseem ceeb heev,'' raws li Ms Coles hais.
Thaum twg tub ceev xwm thiaj muaj peev xwm hais kom muab kuv daim ID (Identification Card) rau lawv saib?
Tub ceev xwm yuav tsum muaj ib co laj thawj zoo txaus los nug kom yus muab yus daim ID rau lawv saib raws li ib co xwm txheej tsi ntsees twg uas ib lub xeev twg tej cai tau teev tseg.
Marlene Dixon uas yog tus coj kws lij choj ntawm lub koom haum Inner Melbourne Community Legal qhia txog tej xwm txheej tseem ceeb ntau yam li no:
- Yog tub ceev xwm ntseeg tias ib tug twg tau ua txhaum los yog tab tom yuav ua ib cov kev ua txhaum cai.
- Yog ib tug twg tab tom tsav ib lub tsheb, ib lub nkoj los yog lwm yam tsheb.
- Thaum uas yus tseem siv public transport (Thaum tseem caij tsheb me (bus) los yog tsheb ciav hlau).
- Ntawm ib thaj chaw uas muag dej cawv.
- Yog tub ceev xwm ntseeg tias lawv muaj tej xov xwm uas yuav pab lawv tshuaj ntsuam ib cov kev ua txhaum cai loj.
Thoob Australia no ces yeej muaj cai teev tseg tias tej neeg tsav tsheb yuav tsum nres yog thaum tub ceev xwm tso lub suab tsheb tub ceev xwm nrov uas taws teeb liab thiab xiav los yog thaum lawv mus thaiv ib txoj kev twg tshuab tej neeg cawv.
"Tub ceev xwm yeej muaj fwj chim ntau yam thaum cheem kom tej neeg nres thiab nug kom tej neeg yeem tshuab cawv."
Koj yuav tsum tau tshuab cawv. Yog koj tsis koom tes ces tej zaum koj kuj yuav raug teem ib lub txim txhaum.Marlene Dixon
Kuv puas muaj peev xwm yees yeeb yaj kiab txog tub ceev xwm?
Yus yeej muaj cai yees yeeb yaj kiab rau ib co xwm txheej cuam tshuam txog tub ceev xwm ntawm zej tsoom ib thaj chaw twg thoob Australia no, yog tias yus/tus neeg ntawd tsis raus tes dab tsi rau tej tub ceev xwm ntawd tej dej num.
"Tej neeg yeej muaj peev xwm yees tub ceev xwm, tab sis lawv yuav tsum tau ua tib zoo xyuas kom yees kom ib nyuag nrug me ntsis thiab muaj kev hwm lawv, kom yus cov kev yees ntawd tsis txhob thaiv los yog cuam tshuam nrog tub ceev xwm tej hauj lwm uas lawv tab tom ua ntawd,'' raws li Ms Dixon hais.
"Lawv yuav tsum tau ua raws li tej txheej txheem tsim nyog ua tso yog tias lawv xav txeeb yus lub koob thaij duab los sis yus lub xov tooj uas tseem tab tom yees tej yeeb yaj kiab."
Yog tias kuv ho muaj kev txhawj xeeb txog ib co kev sib cuam tshuam nrog tub ceev xwm ne yuav ua li cas?
Police are mandated to follow legislation and procedures.
Ms Lee ntawm lub koom haum Redfern Legal Centre hais tias:
"Yog yus xav tias tub ceev xwm tau ua tsis raug cai, ua tsis raws li qhov tsim nyog ua los sis tau hais lus thuam saib tsis taus vim yus yog yus ib tsav neeg, ces tsim nyog yus sau teev tseg cia kiag tam sim ntawd los yog thaum yus mus txog tsev ces mam teev tseg tias tau muaj dab tsi tshwm sim."
Thiab tsim nyog koj:
- Khaws daim video (yeeb yaj kiab) uas koj tau yees txog tej xwm txheej cuam tshuam nrog tub ceev xwm cia
- Kom ib tug kws kho mob sau ib daim ntawv cej luam thiab yees tej duab uas raug teeb meem rau koj lub cev ntaj ntsug tsis hais ib cov kev raug mob twg (to, pob txha dam, doog, kos etc)
- Nrhiav kev pab cuam cai lij choj.
* Tej xov xwm no tsuas yog ib co qhia ua kev paub raws sab seem dav dav xwb thiab tsis kuav txhua yam xwm txheej thiab tej cai sib txawv ntawm tej xeev. Thiaj tsim nyog koj sab laj nrog tej kws lij choj kom thiaj tau tej xov xwm tsi ntsees haum raws li koj tej xwm txheej uas raug rau koj.
Subcribe los yog caum mloog tej xov xwm kaw ua suab Australia Explained kom paub txog ntau yam xov xwm tseem ceeb thiab tej lus taw qhia koj koj pib tau lub neej tshiab ntawm teb chaws Australia.
Yog tias koj muaj ib co lus nug dab tsi los yog muaj ib co tswv yim dab tsi? Ces xa email rau peb rau ntawm australiaexplained@sbs.com.au
Mloog tau xov xwm tshiab ntawm SBS Hmong, download SBS Adio app, caum SBS Hmong ntawm Facebook,mloog tau Youtube, Spotify, Podfollow, iHeart Radio, Google Podcast thiab Apple Podcast.
