Ntsiab lus:
- Tej poj niam yeej ntsib tej teeb meem nyuaj ntau yam txog tej paub ntug piv rau tej txiv neej, tsis hais tej kev raug faib cais ntawm tej chaw ua hauj lwm, tej teeb meem kub ntxhov hauv lub cuab yig thiab cov kev tsis tau vaj huam sib luag rau cov kev khwv nyiaj.
- Tej kev pab cuam cai lij choj rau tej poj niam no thiaj xub kub siab txog cov kev nyab xeeb thiab cov kev tsis coj lawv tej teeb meem mus qhia rau ib tug twg paub.
- Yeej muaj tej kev pab cuam cai lij choj pub dawb rau tej neeg muaj cai siv thoob plaws teb chaws no.
- Yeej muaj tej kev pab cuam tsi ntsees coj los pab rau tej poj niam neeg tsiv teb tsaws chaw, poj niam neeg thoj nam thiab poj niam neeg txum tim.
- Vim li cas tej poj niam thiaj xav tau ib co kev pab cuam cai lij choj tsi ntsees?
- Leej twg thiaj pab daws tej teeb meem kub ntxhov hauv lub cuab yig?
- Leej twg thiaj muaj peev xwm pab yus hais tau yus tej cai ntawm tej chaw ua hauj lwm?
- Puas muaj ib co kev pab cuam cai lij choj tsi ntsees coj los pab rau tej poj niam neeg tsiv teb tsaws chaw thiab thoj nam?
- Kuv puas thov tau neeg txhais lus pab?
- Tej xov tooj thiab xov xwm pab kom yus thov tau kev pab cuam
Yog tej yam nyuaj rau tej neeg feem coob yuav muaj peev xwm mus txheeb tau Australia cov legal system. Yog tham rau tej poj niam lawm ces haj yam ntsib teeb meem nyuaj ntau yam ntxiv thiab. Tsis yog tias tej poj niam yog cov uas yuav xav tau kev pab cuam cai lij choj ntau dua xwb, tab sis lawv tseem ntsib ntau yam teeb meem ntxiv ua rau lawv tsis muaj peev xwm thov tau cov kev pab cuam cai lij choj siv thiab.
Thiaj tau tsim ib co kev pab cuam cai lij choj tsi ntsees coj los pab tej poj niam kom muaj peev xwm nrhiav tau kev pab cuam thaum lawv xav tau kev pab tshaj plaws yog ib co uas thiaj yuav muaj peev xwm los daws tau tej teeb meem no.
Vim li cas tej poj niam thiaj xav tau ib co kev pab cuam cai lij choj tsi ntsees?
Adrianne Walters uas yog tus coj lub koom haum Women’s Legal Services Australia hais tias tej poj niam yeej ntsib tej teeb meem plaub ntug txawv tej txiv neej.
Walters hais tias "Tos zoo li ntawd los vim peb tej poj niam yog cov ntsib tej teeb meem kub ntxhov thiab raug faib cai ntau dua ntawm peb lub neej. Tej poj niam thiaj ntsib tej teeb meem kub ntxhov ntawm lub cuab yig, teeb meem ntawm tsev neeg, teeb meem raug lwm tus siv cov kev deev tsim kev kub ntxhov ntau dua. Tsis tas li ntawd los peb tej poj niam yeej tseem yog cov tu saib xyuas me nyuam ntau. Peb khwv tau nyiaj tsawg dua thiab peb yog cov neeg muaj tej peev txheej teej tug tsawg dua thiab."
Yog yus ho muaj teeb meem plaub ntug uas tsis muaj peev xwm ntiav kws lij choj pab, ces lub koom haum
Women’s Legal Service ntawm yus lub xeev yeej muaj cov kev pab cuam uas ua tib zoo pab thiab yeej lees paub tias tej kev pab no yuav tsis ua rau yus ntau ntshai rau sab cev ntaj ntsug, sab ntsuj plig thiab yus cov kev xav thiab yeej muaj ib co kev pab cuam tsi ntsees haum rau yus siv pab yus.
Tsis tas li ntawd los yog tias lawv tsis muaj peev xwm pab yus ces lawv yeej tseem taw qhia kom yus mus nrhiav lwm cov kev pab cuam pab rau yus thiab.
Leej twg thiaj pab daws tej teeb meem kub ntxhov hauv lub cuab yig?
Lub koom haum Women’s Legal Service yeej muaj ib co kev teem caij thiab muaj peev xwm npaj ib tug kws lij choj nrog yus mus hais plaub ntawm tsev hais plaub rau tej plaub ntaug ntau yam li teeb meem kub ntxhov ntawm lub cuab yig, cov kev txwv tsis pub tus neeg tsim kev kub ntxhov mus ze ntawm ib tug neeg twg thiab daws cov teeb meem cuam tshuam txog cov kev tsis haum xeeb rau tej cuab yig. Uas tej poj niam nyob ntawm tej zos cheeb tsam tuaj ntug nroog thiab nyob tej zos toj siab uas nyob deb yeej muaj peev xwm siv tau cov kev pab cuam no hauv online thiab.
Tej kev pab cuam no yeej pab dawb xwb, thiab yog cov kev pab uas yeej ua tib zoo xyuas kom tau txais kev nyab xeeb thiab yog cov kev pab uas tsis coj yus tej teeb meem mus qhia rau lwm tus paub coj los daws ntau yam teeb meem.
Ms Walters tshab txhais tias "Peb yeej ib txawm pab tsi ntsees rau tej teeb meem cuam tshuam txog tej cai tswj tej cuab yig, tej teeb meem kub ntxhov ntawm lub cuab yig, tej teeb meem siv cov kev yuam deev tsim kev kub ntxhov, thiab cov kev pov puag me nyuam. Tab sis peb tej kev pab feem ntau yeej muaj ib co kws paub zoo txog cov program pab tej neeg tsiv teb tsaws chaw thiab."
Peb yeej pab tej poj niam uas tau tej visa tuaj nyob ib ntus (Temporary visas) uas xav tsiv tawm ntawm tej teeb meem kub ntxhov kom, los yog pab kom muaj peev xwm txheeb tau Australia cov immigration system, tej cai cuam tshuam txog cuab yig thiab tej teeb meem kub ntxhov hauv lub cuab yig uas sib chab sib chaws heev thiab.Adrianne Walters
Yeej muaj tej neeg ua hauj lwm ntau yam uas tsis cuam tshuaj txog cai lij choj uas pab ntau yam rau yus, los yog pab tswj kom yus tsis txhob nyuaj siab ntxhov plawv thiab pab kom yus paub txog tej txheej txheem hais plaub ntug yeej muaj peev xwm nrhiav tau ib kws uas pab tsi ntsees rau tej neeg txum tim thiab pab tej teeb meem cuam tshuam txog cov kev ua hauj lwm thiab.
Leej twg thiaj muaj peev xwm pab yus hais tau yus tej cai ntawm tej chaw ua hauj lwm?
Cov kev txheeb txog yus tej cai tam li yog ib tug neeg ua hauj lwm mas tej zaum pheej ua rau yus mloog tau tias yuav cuam tshuam nrog tej cai lij choj ntau yam thaum muaj ib yam dab tsi yuam kev ntawm chaw ua hauj lwm lawm, tab sis yeej muaj ib co kev pab cuam tsi ntsees uas yeej raug tsim coj los pab rau tej poj niam ntawm tej chaw ua hauj lwm thiab.
Tej koom haum Working Women's Centres ces yeej ua hauj lwm thoob Australia, thiab yeej muaj tej kev pab cuam pub dawb, thiab muaj tej kev pab cuam cai lij choj uas tsis coj yus tej teeb meem mus qhia rau lwm tus paub.
Yog tias yus ntsib tej teeb meem sexual harassment ntawm chaw ua hauj lwm, yus raug faib cais, los yog cia li raug muab rho tawm hauj lwm yam tsis ncaj ncees ces yus lub koom haum WWC ntawm yus zos yeej yuav pab kom yus nkag siab txog yus tej cai thiab ntau txoj xub ke tias seb yuav tswj tej xwm txheej no li cas.
Aira Firdaus uas yog tus tswj cov hauj lwm Advocacy and Policy uas ua hauj lwm nrog lub koom haum Working Women's Centre Australia (WWCA) hais tias cov kev pab cuam uas pab tsi ntsees rau tej poj niam yog cov kev pab cuam tsim nyog vim rau qhov tej poj niam nws ntsib nws ib cov teeb meem tsi ntsees twg ntawm tej chaw ua hauj lwm.
Nws hais tias "Lub hom phiaj ntawm tej koom haum Working Women’s Centres no ces yog zoo tam li ib cov kev pab cuam rau tej poj niam uas tsis muaj tej koom haum sawv cev rau tej neeg ua hauj lwm, los yog pab rau tej neeg ua hauj lwm non-binary uas tej zaum tsis muaj cib fim koom ua tub koom siab thiab tsis tau txais kev pab cuam cai lij choj."
Nws hais tias tej teeb meem cuam tshuam txog cov kev ua hauj lwm mas tej zaum kuj yuav yog cov sib chab sib chaws heev rau ib tug neeg ua hauj lwm tsiv teb tsaws chaw, ib tug neeg thoj nam los yog ib tug neeg txum tim thiab.
"Tej poj niam ntau heev uas tuaj thov kev pab cuam ntawm tej koom haum no ces yeej yog cov khwv tau nyiaj tsawg, ua hauj lwm nrog tej tuam txhab lagluam tsis tau ua hauj lwm ruaj, thiab ua hauj lwm ntawm tej chaw ua hauj lwm uas tsis muaj tej koom haum sawv cev rau tej neeg ua hauj lwm. Ces tej teeb meem uas tej poj niam no qhia rau peb thiaj yog ib co sib chab sib chaws heev, tsis yog tib yam teeb meem dab tsi nkaus xwb."
Tib tug poj niam uas tuaj ntawm peb lub koom haum uas ntsib cov xwm txheej sexual harassment tej zaum kuj tseem ntsib lwm yam teeb meem li raug muab rho tawm hauj lwm, los yog raug muab ntiab tawm hauj lwm vim nws hais txog ib yam dab tsi, los sis tej zaum kuj yog cov uas raug tej tswv lagluam nyiag lawv tej nyiaj hauj lwm thiab.Aira Firdaus
Koj lub koom haum WWCA ntawm loj zos yeej muaj peev xwm pab koj kom mus thov tau lwm cov kev pab cuam li nrhiav tsev nyob thiab nrhiav ntau yam kev pab cuam.
Puas muaj ib co kev pab cuam cai lij choj tsi ntsees coj los pab rau tej poj niam neeg tsiv teb tsaws chaw thiab thoj nam?
Tej poj niam neeg tsiv teb tsaws chaw thiab neeg thoj nam ces yog cov tseem ntsib lwm yam teeb meem ntxiv thaum lawv xav tau kev pab cuam los pab kom tau txais kev ruaj ntseg rau cov kev tsiv teb tsaws chaw, cov kev txom nyem nyiaj txiaj thiab cov kev ntsib tej teeb meem kub ntxhov hauv lub cuab yig.
Ms Walters hais tias yeej muaj tej koom haum Women's Legal Service Centres thoob Australia uas muaj peev xwm pab yus txheeb tau cov migration system.
Nws hais tias "Lawv yeej nias siab los pab tej poj niam uas tau cov visa nyob ib ntus (Temporary visas) siv uas ntsib teeb meem kub ntxhov thiab xav tau txais kev pab txheeb cov immigration system nrog tej teeb meem cuam tshuam txog tej cai tswj tej cuab yig los yog lwm yam teeb meem plaub ntug, kom lawv thiaj muaj peev xwm ncaim ntawm cov kev txij nkawm uas pheej tsim teeb meem kub ntxhov rau lawv kom lawv tau txais kev nyab xeeb."
Lub koom haum inTouch Women’s Legal Centre ces tau nyiaj ntawm tsoom fwv xeev Victoria thiab tsoom fwv teb chaws Australia pab. Thiab yog ib cov kev pab cuam cai lij choj rau tej zejzog uas pab tsi ntsees rau tej poj niam neeg tsiv teb tsaws chaw thiab poj niam neeg thoj nam uas nyob ntawm xeev Victoria no.
Raws li Ajsela Siskovic uas yog tus tuam kws lij choj hais ces "Ib co teeb meem tseem ceeb uas muaj rau tej poj niam neeg tsiv teb tsaws chaw thiab neeg thoj nam ces yog cov kev tsis totaub txog Australia tej legal system, tsis paub tias peb tej nom tswv tej tuam chav ua hauj lwm li cas los yog lawv cov system ua hauj lwm li cas."
"Thiab tej no kuj tsis yog tej ua rau peb ceeb dab tsi vim muaj tej neeg tuaj siv peb cov kev pab cuam txog ib feem peb yog cov nyuam qhuav tuaj rau lub teb chaws (Australia) no rau lub caij tsawg dua 5 xyoos xwb."
Dua ntawm tej teeb meem tsis paub lus no ces cov kev nrhiav kom tau kws lij choj sawv cev rau yus haj yam nyuaj tshaj ntxiv thiab, ces thiaj yuav ua rau hais tsis tau raws li tej poj iam thiab tej me nyuam xav tau.
Ms Siskovic hais tias lub koom haum inTouch Women’s Legal Centre yeej muaj cov kev txhais lus pub dawb rau yus siv, thiab muaj cov kev sab laj taw qhia txog tej cai lij choj uas siv tau haum raws li yus tej kab lis kev cai, thiab muaj tej kws lij choj sawv cev rau yus yog tias yus cuam tshuam txog tej teeb meem kub ntxhov hauv lub cuab yig, tej cai tswj tej cuab yig thiab cuam tshuam txog cov kev tsiv teb tsaws chaw.
Nws hais tias "Peb yog thawj lub koom haum uas muaj ntau yam kev pab cuam rau tej neeg uas ntsib teeb meem kub ntxhov hauv lub cuab yig ntawm Australia."
Yog tias koj nyob ntawm xeev Victoria ces koj muaj peev xwm nug nrog lub koom haum inTouch no seb koj puas muaj cai siv cov kev pab no.
Kuv puas thov tau neeg txhais lus pab?
Ms Walters hais tias tej kws lij choj ntawm lub koom haum Women’s Legal Services kuj yog cov neeg muaj peev xwm pab tej poj niam uas tsis paub lus zoo thiab.
"Yus muaj peev xwm thov ib tug neeg txhais lus pab yus cov kev teem caij, los yog pab txhais lus rau yus ntawm tsev hais plaub. Thiab yog tias yus muaj cai siv cov kev pab cuam cai lij choj no los yog tsis muaj nyiaj them kom siv tau ib tug neeg txhais lus ces yeej muaj tej xub ke ntau yam pab kom yus muaj peev xwm siv tau cov kev txhais lus dawb thiab."
Tej xov tooj thiab xov xwm pab kom yus thov tau kev pab cuam
Women's Legal Services (state or territory)
Working Women's Centre Australia (state or territory) or phone the listed 1800 number
inTouch Women’s Legal Centre (Victoria only) or phone 1800 755 988
Tej kev pab rau tej neeg nyob tej zos cheeb tsam nroog los yog nyob tej zos toj siab uas nyob deb
Yeej muaj cov kev pab cuam ntawm tej Community Legal Centres los yog Legal Aid Commissions uas pab tim ntsej tim muag, cov kev pab cuam hauv online, los yog cov kev pab cuam hauv xov tooj uas koj muaj peev xwm txheeb tau raws li hauv qab no:
Subcribe los yog caum mloog tej xov xwm kaw ua suab Australia Explained kom paub txog ntau yam xov xwm tseem ceeb thiab tej lus taw qhia koj koj pib tau lub neej tshiab ntawm teb chaws Australia.
Yog tias koj muaj ib co lus nug dab tsi los yog muaj ib co tswv yim dab tsi? Ces xa email rau peb rau ntawm australiaexplained@sbs.com.au
Mloog tau xov xwm tshiab ntawm SBS Hmong, download SBS Adio app thiab caum SBS Hmong Facebook page thiab mloog tau SBS Hmong Youtube.
