Ntsiab lus tseem ceeb:
- Lub tuam chav Registry of Births, Deaths & Marriages (BDM) ntawm yus lub xeev yog lub tswj cov kev hloov npe tshiab siv.
- Yeej muaj tej txheej txheem sib txawv tsuas nyob rau ntawm seb yus nyob qhov twg xwb.
- Nyob rau qee cov xwm txheej piv txwv li tom qab sib yuav ua txij nkawm tag lawm ces tsis tas yuav hloov yus lub npe nrog lub tuam chav BDM li.
- Thaum yus hloov yus lub npe lawm, ces yus yuav tsum tau qhia rau ntau cov koom haum paub suav qhia rau lub tuam chav Department of Home Affairs paub thiab.
- Vim li cas thiaj hloov yus lub npe?
- Puas muaj tej kev txwv dab tsi thaum hloov yus lub npe?
- Muaj tej txheej txheem thov hloov npe dab tsi?
- Yus puas yuav tau siv yus tus txiv lub npe/lub xeem?
- Muaj dab tsi tshwm sim tom qab yus thov hloov npe?
Yus lub npe siv raug cai ces yog lub muaj ntawm yus tej ntaub ntawv qhia yus lub cim thawj (identity) li ntawv teev yug yus, passport los yog visa.
Yog tias yus yog ib tug pej xeem Australia, los yog ib tug neeg nyob ruaj ntawm Australia, ces yus muaj ib txoj xub ke twb hloov tau yus lub npe tshiab siv raug cai ntawm lub tuam chav teev tej neeg yug tshiab, tas sim neej thiab sib yuav ua txij nkawm (Registry of Births, Deaths & Marriages - BDM).
Ib daim ntawv teev yug ib tug neeg uas tsom pom zeze ntawm Sydney (AAP Image/Paul Braven) Source: AAP / PAUL BRAVEN/AAPIMAGE
Vim li cas thiaj hloov yus lub npe?
Muaj ntau yam laj thawj ua rau tej neeg hloov siv npe tshiab uas siv tau raug kev raug cai.
Derise Cubin uas yog tus kis ntawm lub tuam chav BDM ntawm Acess Canberra hais tias:
"Muaj ntau yam laj thawj ua rau tej neeg hloov siv npe ntau yam sib txawv los siv siv npe hu ua si, los yog siv ib lub xeem tshiab tom qab lawv sib yuav txawv teb chaws, los yog xaiv ib lub npe kom qhia tau ib tug neeg twg cov gender itdentity zoo dua."
Ntxiv ntawd ces kuj muaj tej neeg uas hloov siv lawv tej npe tshiab tom qab tau tsiv teb tsaws chaw tuaj nyob teb chaws Australia li Elliott Fox uas yog ib tug visual artist thiab.
Nws tau tsiv ntawm teb chaws Czechoslovakia dhau los thaumt seem yog ib tug me nyuam yaus tuaj nyob ntawm teb chaws Australia.
Nws hais tias: "Thaum peb tuaj txog ces Australia lub tuam chav tswj dej num tsiv teb tsaws chaw yeej tau teev pev tej npe, uas tej suab lus saum toj ntawm ib tug ntawv twg yeej raug tshem tawm...Txhais tias ua rau lwm tus hu peb tej npe ua lub suab txawv lawm. Cov kev loj hlob ntawm Australia ua rau kuv pom tias yog tej yam nyuaj heev rau cov kev txheeb kuv lub npe thiab pheej ua rau kuv tsis tshua muaj kev ntseeg kuv tus kheej."
Thaum Elliott tiav neeg lawm nws thiaj hloov nws lub npe raws li nws nyiam, thiab tau pab kom nws muaj kev ntseeg siab rau nws tus kheej thiab qhia tau nws lub cim thawj zoo dua tam li yog ib tug visual artist.
Daim ntawv teev yug ib tug twg uas tsom pom zeze. Source: iStockphoto / Yau Ming Low/Getty Images
Mehrangiz Tabatabaei ces yog tus Settlement Case Manager uas ua hauj lwm nrog lub koom haum Migrant Resource Centre Tasmania. Nws kuj tau pab ntau tus neeg hloov lawv tej npe tshiab.
Nws hais tias: "Ib co teeb meem uas pom tas mus li rau tej neeg ntiag tug uas tuaj ntawm teb chaws Phabmab (Myanmar) thaum lawv tuaj nyob teb chaws Australia ces yog cov kev totaub yuam kev rau tej neeg no tej npe, uas pheej muab lawv lub npe kawg xam tias yog lawv lub xeem. Txawm li cas los neeg Phabmab yeej yog ib haiv neeg yeej ib txwm tsis siv lawv lub xeem li."
Muaj ib tug ntxhaus hluas nyuam qhuav nto nkauj uas tuaj ntawm teb chaws Phabmab tuaj yeej muaj ob lub npe ua nws lub npe thiab tsis yog lub xeem.
Nws lub teej kawm, nws lub txhab nyiaj thiab lub tuam chav sau se (Australia Taxation Office - ATO) - cov koom haum no ib lub twg yeej siv nws lub npe sib txawv, ces thiaj ua rau muaj kev yoob rau nws lub npe.
"Muaj ib txhia ces siv nws lub npe thawj lo tam li yog nws lub xeem, hos lwm cov ces siv nws lub npe lo tom qab ua nws lub xeem, thiab muaj ib txhia ces siv nws ob lo lus ntawm nws lub npe uas nws lub xeem. Thaum kawg ces nws thiaj tau sau ntawv mus rau lub tuam chav BDM thov hloov nws lub npe kom thiaj siv tau nws lub npe thiab lub xeem kom txhua cov system thiaj lees paub nws."
Puas muaj tej kev txwv dab tsi thaum hloov yus lub npe?
Tej txheej txheem hloov npe yeej sib txawv tsuas nyob rau ntawm seb koj nyog qhov twg xwb. Thawj kauj ruaj ces xav kom yus mus txheeb nrog lub tuam chav Resitry of Births, Deaths & Marriages (BDM) lub vas sab ntawm yus lub xeev.
Hos tej neeg yus ntawm Australia no ces yog ib qho yooj yim tshaj rau yus thov hloov npe nrog lub tuam chav BDM uas teev tej ntaub ntawv yug yus. Thiab tej zaum yus kuj muaj cai thov hloov npe tau ntawm lwm lub xeev thiab yog yus muaj peev xwm qhia tau tias yus nyob ntawm lub xeev ntawd tam sim no lawm.
Tsis tas li ntawd los yeej muaj cov kev txwv tej hnoob nyoog sib txawv thiab, tsuas nyob ntawm seb yus nyob rau qhov twg xwb. Derise Cubin hais tias piv txwv li ntawm ACT (Australian Capital Territory) ces yeej ib txwm yuav tau txais kev tso cai ntawm yus niam yus txiav yog tias yus hnoob nyoog qes dua 18 xyoo.
Cubin hais tias "Txawm li cas los kuj muaj ib co xwm txheej uas ib tug hluas twg tsis tas thov kev tsi cai ntawm lawv niam lawv txiv los yog tsis tas muaj feem cuam tshuam ntawm lawv niam lawv txiv thaum hloov npe tshiab kom muaj peev xwm qhia tau lawv cov gender identity haum zoo tshaj qub rau lawv thiab."
Tam li yog ib tug neeg paub tab (Hnoob nyoog nto 18 xyoo) lawm, ces yus muaj peev xwm hloov tau yus lub npe ntau kawg nkaus txog 3 zaug. Tab sis kuj tsis suav cov kev sib yuav ua txij nkawm, kev sib nrauj los sis tej xwm txheej kub ntxhov hauv lub cuab yig.
Cov kev txiav txim siab hloov yus lub npe yog ib co uas yuav tau ua tib zoo xyuas tiag tiag, thiab yeej muaj cov kev txwv ntau yam tias yus muaj peev xwm xaiv tau lub npe twg siv xwb. Piv txwv li yus tsis muaj cai siv ib tug nom twg lub npe, los sis yog lub npe ntawd muaj lub ntsiab lus tsis zoo.
Yog tias koj yog ib tug pej xeem Australia los yog ib tug neeg nyob ruaj ntawm Australia, ces koj muaj tej xub ke xaiv hloov koj lub npe tshiab tau raug kev raug cai nrog lub tuam chav Registry of Births, Deaths & Marriages (BDM). Credit: Zero Creatives/Getty Images/Image Source
Muaj tej txheej txheem thov hloov npe dab tsi?
Koj yuav tau sau ib daim BDM application form thiab qhia koj tej ntaub ntawv qhia koj lub cim thawj tias koj yog leej twg piv txwv li daim ntawv teev yug koj los yog koj daim ntawv tsav tsheb. Uas koj yeej muaj peev xwm sau tau dai ntawv no hauv online (ntawm BDM lub vas sab).
Tsis tas li ntawd los tej zaum lawv yuav nug kom yus qhia tias tim laj thawj dab tsi yus thiaj xav hloov npe tshiab siv, tsis hais yus nyuam qhuav hloov npe tsis ntev los no los yog seb yus ho puas tau ua txhaum plaub ib yam dab tsi.
Elliott Fox thiaj muaj ib co kev taw qhia sai sai rau sawv daws uas thov hloov npe ntawm ACT Registry tias:
"Ib yam uas kuv tseem tsis tau xav txog thaum kuv tau tuaj txog ces yog xa kuv daim ntawv thov hloov npe uas kuv yuav tsum tau siv ib tug xyeem mem tes tshiab (signature), ces kuv thiaj yuav tau xyaum siv tus tshiab rau lub caij nom tswv tseem tos kom kuv siv tus tshiab."
Yus puas yuav tau siv yus tus txiv lub npe/lub xeem?
Ntawm teb chaws Australia ces yeej tsis xav tias yuav hloov yus lub xeem mus siv lub tshiab thaum yus sib yuav ua txij nkawm, tab sis yeej muaj ib txhia xaiv siv lawv tus txiv lub xeem. Hos muaj ib co txij nkawm ces ho koom siv nkawv ob lub xeem ua ke.
Derise Cubin thiaj tshab txhais tias "Yog tias koj xav siv koj tus txiv lub xeem tom qab neb sib yuav ua txij nkawm ntawm Australia lawm, ces raws li ib txwm pom ces koj tsis tas yuav teev zwm npe kom thiaj hloov siv tau ib lub npe tshiab li,"
"Koj tsuas nqa koj daim ntawv sib yuav uas ib lub koom haum Australian Registry of Births, Deaths & Marriages twg ua rau koj coj mus siv pab hloov koj lub npe rau tej ntaub ntawv tseem ceeb uas teev txog koj lub cim thawj xwb."
Thiab yeej siv tib co txheej txheej no yog tias koj xav rov qab hloov mus siv koj lub npe qub thaum xub thawj uas koj siv tom qab uas koj sib nrauj, sib cais los yog koj xav rov qab xaiv siv lub npe qub.
Yog tias koj sib yuav ua txij nkawm txawv teb chaws, los yog tias koj yug txawv teb chaws tab sis ho sib yuav ua txij nkawm ntawm Australia ces tej zaum koj tej ntaub ntawv (daim ntawv sib yuav) yuav tsis raug lees paub ntawm Australia thiab tej zaum koj yuav tau thov hloov npe tshiab ntawm BDM.
Muaj dab tsi tshwm sim tom qab yus thov hloov npe?
Yeej muaj tej sij hawm txheeb koj daim ntawv thov hloov npe tshiab sib txawv thiab, uas tej zaum yuav ntev txog ntau limtiam diam, tsuas nyob ntawm seb koj thov qhov twg xwb, thiab koj yuav tau them nqe hloov npe txog li ntawm $200 - $300.
Thaum uas lub tuam chav no txheeb kom daim ntawv thov hloov npe lawm ces lawv yuav xa ib daim ntawv pov thawj hloov npe tshiab rau koj.
Thiab koj yuav tsum tau qhia koj lub npe tshiab rau ntau cov koom haum.
Elliot Fox thiaj tau xub pib hloov nws daim ntawv tsav tsheb thiab daim passport ua ntej.
"Ntxiv ntawd ces kum thiaj tau maj mam hloov siv kuv lub npe tshiab ntawm txhua cov koom haum lagluam thiab nom tswv tej tuam chav uas feem ntau yeej hloov tau yooj yim tshaj plaws xwb, txawm li cas los yeej muaj ib txhia txhab nyiaj ces kuj nyuaj heev thiab kuv pom tias yuav tau kaw tsis txhob siv yus phau ntawv siv nyiaj qub thiab mam li qhib ib phau tshiab rau yus lub npe tshiab siv."
Puas muaj tej kev txwv dab tsi thaum hloov siv koj lub npe tshiab? Credit: Unspalsh - Chuttersnap
Yog li ntawd tsis hais yus yuav poob rau tej xwm txheej zoo li cas li, lub tuam chav Registry of Births, Deaths & Marriages (BDM) ntawm yus lub zos/xeev yeej yuav taw qhia kom yus paub txog tej txheej txheem hloov npe tshiab no.
Subscribe los yog caum mloog tej xov xwm kaw ua suab Australia Explained kom paub txog ntau yam xov xwm tseem ceeb thiab tej lus taw qhia kom koj pib tau lub neej tshiab ntawm teb chaws Australia.
Yog tias koj muaj ib co lus nug dab tsi los yog muaj ib co tswv yim dab tsi? Ces xa email rau peb rau ntawm australiaexplained@sbs.com.au
