Tau muaj ib tsab ntawv cej luam ntawm lub koom haum Climate Council tau kwv yees tseg tias dej hiav txwv siab tuaj yuav ua rau raug kev phom sij rau Australia tej vaj tse yuav laug txog 270,000 lub rau lub caij 100 xyoo ntxiv no, uas yuav ua rau Australia poob nyiaj ntau tshaj AUD 855 billion, suav tej vaj tse raug kev puas tsuaj, thiab dej nyab rau tej liaj teb. Tej xwm txheej no yuav raug thoob plaws rau txhua lub xeev ntawm Australia, tab sis Queensland tej ntug hiav txwv hais tsi ntsees rau tej ntawm Gold Coast yog cov yuav raug teeb meem ntau tshaj plaws.
Zeskais Andrew Watkins uas qhia ntawv ib ntus ntawm Monash University lub teej kawm ntiaj teb, huab cua thiab tej ib puag ncig hais tias '100 xyoo dhau los twb tau muaj tej dej hiav txwv siab tuaj txog 22cm tab tom ua rau Australia thiab ntiaj teb ntau cov zejzog nyob raws ntug hiav txwv lawm.' Tsis tas li ntawd los tej kws tshawb fawb ntseeg tias txog rau xyoo 2050 ces tej hiav txwv yuav nce siab tuaj ntxiv yam tsawg li 14cm thiab.
Watkins hais tias ''Tos tej npoo hiav txwv ho nce siab tuaj ntxiv los vim tej hiav txwv tab tom sov tuaj, tej daus ntawm Antartica thiab Greenland yaj lawm''.
Nws hais tias ''Gold Coast yog Australia lub nroog yuav raug teeb meem loj tshaj plaws vim yog thaj chaw nyob qes dua npoo hiav txwv, muaj tej kwj deg ntau tshaj plaws, ces thiaj ua rau muaj cib fim raug kev puas tsuaj."
Mark MacCabe uas yog tus neeg ua hauj lwm principle licensee thiab real estate auctioner hais tias ''Tej nqe yuav nyiaj tuav pov hwm tsev ntawm Gold Coast kim tshaj ob npaug rau lub sij hawm 5 xyoos dhau los lawm.
Watkins hais tias muaj ntau cov zos li ''Lancelin (Western Australia), Robe (South Australia), Byron Bay (New South Wales), Gold Coast rau lbu caij raug khaub zeeg cua tropical cyclone Alfred, thiab Inverlock (Victoria) yog cov chaw uas raug cov xwm txheej npoo dej hiav txwv siab tuaj ntxiv lawm.''
Lub koom haum Climate Council kwv yees tias ntshe yuav muaj tej xwm txheej txog tej npoo hiav txwv tsawg tam sim no tab sis yuav muaj ceem tshaj qub ntxiv thiab muaj ntau zuj zus tas mus li ntxiv tom ntej no lawm txawm tias tsis muaj dab tsi tam sim no.
UN yeej tau qhia thaum ntxov lub hli no tias txog xyoo 2030 ces ntshe ntiaj teb cov huab cua yuav kub sov tshaj 1.5°C lawm.
Anthonio Guterres uas yog UN tus Secretary General hais tias ''Tib neeg twb ua rau tej huab cua kub sov tshaj qhov tau pom zoo ntawm Paris 10 xyoo dhau los uas yuav lug kom tsis txhob muaj kev puas tsuaj rau tej huab cua lawm."
Nws hais ntxiv tias ''Peb yuav tsum kub siab ua kom tau tiag tiag raws li tej hom phiaj tau teeb tseg. Maj los tso tseg tsis txhob siv tej fossil fuels thiab hloov kho dua cov renewable energy tshiab siv, txo kom muaj tej methane pollution tsawg, pov puag tej av, hav zoov thiab hiav txwv. Tej tsoom fwv yuav tsum tau npaj thiab ua tej hauj lwm national climate plans, kub siab rau cov hauj lwm net zero thiab rau siab ua kom zoo tshaj ntawd."
Mr Watkins thiaj nqua hu kom Australia yuav tsum tau los nqes tes tswj tej xwm txheej huab cua pauv hloov kiag tam sim no thiab yuav tau npaj tswv yim los hloov tej xwm txheej no.
Nws hais tias "Peb yuav tau txheeb tej xwm txheej huab cua pauv hloov thiab tej theem npoo hiav txwv uas siab tuaj no thiab yuav tau xyuas kom peb hloov tig tau haum raws li tej xwm txheej no uas peb yeej paub lawm tias yuav tshwm sim rau thaum xaus tiam no (xyoo 2100). Tsab ntawv cej luam no yeej tau qhia lawm tias yog peb tsis kub sib los tiv thaiv thiab txo tej greenhouse gases ces ntshe peb yuav tsis muaj peev xwm ntxeem."
Mloog tau xov xwm tshiab ntawm SBS Hmong Thursday 6 pm, Sunday 11 am; saib tau ntawm digital TV tshooj 302 (SBS Radio 2), download SBS Adio app, Facebook, Youtube, Spotify, Podfollow, iHeart Radio, Google Podcast thiab Apple Podcast.
