Cov ntsiab lus xov xwm:
- Hais txog cov kev xaiv tsa nrhiav ib co nom tshiab los hloov tej nom uas tawm tsis ua nom lawm ces tsoom fwv xeev NSW kuj tau swb lub rooj nom Bega lawm. Ua ke no ces kuj muaj tej neeg ntawm cov rooj nom li Bega, Monaro, Strathfield thiab Willoughby tau hloov siab tig mus xaiv lwm pab nom coob heev ces thiaj ua rau tus tsoom fwv Perrotet ntawm pab nom koom tswj muaj cov nom tsawg lawm.
- Australia tus thawj pwm tsav tau lees paub txog tej neeg tawm tsam tsis pom zoo txog cov kev yuam kom yuav tsum hno tshuaj COVID-19 vaccine cov kev txhawj xeeb. Tab sis nws hais tias tej nom tswv xeev yog cov siv tej cai no. Txawm li cas los nws hais tias 'Australia yeej yog lub teb chaws ywj pheej uas tej neeg yeej muaj cai tawm tsam, tab sis xav kom ua raws li tej cai uas lawv muaj peev xwm ua xwb, yuav tsum hwm lwm tus neeg txoj cai thiab.'
- America tus coj Joe Biden tau hais kom Russia thim nws cov tub rog ntau tshaj 100,000 uas nyob ze ntawm Ukraine cov ciam teb tawm. Thiab yog tias Russia tseem nam nias teb chaws Ukraine ces nws yuav 'raug rau txim hnyav tshaj plaws'.
- Vientiane Times tau tshaj tawm tias nom tswv Nplog tau kho nws tej cai cais cov neeg Nplog thiab neeg txawv teb chaws uas xav mus rau teb chaws Nplog ntawm 14 hnub los ua 7 hnub lawm xwb.
- The Laotian Times tshaj tawm tias Thaib tus Transport Minister tau qhia tias yuav siv nyiaj USD tshaj 1 billion dollar coj los tsim dua ib tug choj tshiab hla dej Naj Khoom txuas ntawm Nongkhai rau Nplog kom thiaj tau kev tsheb siv thiab tau txoj kev tsheb ciav hlau ntawm Bangkok hla Nongkhai rau Nplog mus rau Khunming, uas cia siab tias yuav ua kom tiav rau xyoo 2028.
Mloog tau SBSHmong rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm Facebook, Google podcasts, Spotify, thiab Apple podcasts los yog download SBS Radio App kom koj mloog tau SBS Hmong.
