Ntsiab lus:
- Muaj xov xwm tshiab qhia tias muaj ntau yam ntawm tej zej zog yog cov tseem ceeb yuav pab kom ib tug twg tau txais kev noj qab nyob zoo rau lub caij laus dua ntawm tus neeg ntawd cov kev noj zaub mov thiab ua exercise.
- Muaj tej neeg koom ib co kev teeb txheeb yuav laug txog li 70 feem pua qhia tias lawv muaj ib yam mob dab tsi, tab sis tej neeg feem coob qhia tias lawv muaj peev xwm tswj tau lawv cov kev ua lub neej ntawm ib hnub rau ib hnub.
Raws li tej xov xwm tau los ntawm ib co kev teeb txheeb nrog tej neeg Australia hnoob nyoog tcij 65-98 xyoo uas coob tshaj 700 leej thoob plaws teb chaws no no ces muaj 7 yam uas pab kom tej laus neeg no ua tau lub zoo neej rau yav laus thiab ua tau lub neej txoj sia nyob ntev qhawv li ua tau lub neej ywj pheej, muaj hom phiaj ua lub neej, tau txais kev ywj pheej, muaj peev xwm tswj tau yus kom tau txais kev noj qab nyob zoo thiab tswj tau yus tej mob nkeeg raws li qhov tsim nyog ua tau, muaj cov kev xav rau kis zoo, kub siab ua lub neej thiab muaj feem koom muaj kev sib cuag tau nrog lwm tus thiab mloog tau tias yog ib feem ntawm tej zejzog.
Raws li Treasury hais ces 40 xyoo ntxiv no Australia yuav muaj tej laus neeg hnoob nyoog tshaj 65 xyoos txog 2 npaug thiab muaj tej neeg hnoob nyoog tshaj 85 xyoos coob tuaj ntxiv tshaj 3 npaug lawm. Yog li ntawd lub caij uas muaj Australia tej pej xeem hnoob nyoog ntau zuj zus tuaj ntxiv no thiaj yog tej yam tseem ceeb uas yuav tau nkag siab tias yuav pab tej neeg no li cas rau yav lig ntawm lawv lub neej.
Dr Chloe Waddel uas yog ib tug psychologist uas sau cov kev teeb txheeb no qhia rau SBS News tias ntau yam ntawm tej zejzog yeej tseem ceeb tib yam li ib tug twg tej zaub mov uas nws noj thiab nws cov kev ua exercise thiab.
Nws hais tias ''Yav tag los mas cov kev ua tau lub zoo neej rau thaum laus yog cov kev tsis muaj mob, tab sis tam sim no cov kev teeb txheeb no tshawb tau tias cov kev sib cuag tau nrog lwm tus, cov kev muaj hom phiaj ua neej thiab cov kev muaj peev xwm tswj tau yuav cov kev ua lub neej los yeej yog ib co tseem ceeb tib yam thiab."
Professor Luigui Fontana uas yog ib tug kws paub zoo txog kev noj qab nyob zoo thiab cov kev ua tau lub neej siav ntev ntawm tsev kawm qib siab University of Sydney hais tias tej genes thiab tej cwj pwm ua lub neej muaj feem cuam tshuam txog cov kev yuav qhia tias seb yus puas ua tau lub zoo neej thaum laus thiab.
Nws tau qhias rau SBS News tias tej uas Waddell txheeb tau kuj yog ib co tseem ceeb pab kom yus ua tau lub zoo neej thaum laus thiab, tab sis qhov tseem ceeb tshaj plaws mas yog yuav tsum xyuas kom tej laus neeg lub cev muaj nqaij thiab lub cev tsis txhob khub tej roj tsis zoo.
Lindsay Wu uas yog ib tug Scientia associate professor uas paub txog cov kev tshawb fawb ntawm tsev kawm qib siab NSW hais tias muaj peev xwm ua tau tej yam yooj yooj yim li ''tswj kom yus tsis txhob ntog, los yog mus ua kab (weight training) ntawm ib lub gym los yog ntawm tsev kom yus lub cev muaj nqaij, nrog rau cov kev tau noj tej zaub mov zoo muaj txiaj ntsim, tau pw txaus, tau txais kev kaj siab, cov kev tswj yus tej cwj pwm thiab tswj yus cov kev xav kom tus yog ib co yuav pab kom yus ua tau lub neej txoj sia nyob ntev qhawv thiab.
Lus tim tsum:
Zaj lus no tsuas qhia ua kev paub thiab kev kawm xwb tsis tsim nyog yuav siv coj los ua kev taw qhia hloov tej neeg kho mob cov kev taw qhia. Thiaj xav kom koj mus sab laj nrog ib tug neeg kho mob uas muaj ntaub ntawv tso cai thiab paub txog tej hauj lwm no tsim cov kev taw qhia tsi ntsees kom thiaj pab tau haum raws li qhov koj xav tau.
Mloog tau xov xwm tshiab ntawm SBS Hmong, download SBS Adio app thiab caum SBS Hmong Facebook page thiab mloog tau SBS Hmong Youtube.
