Koj tej lus teb tej lus nug txheeb pej xeem yuav tsis muaj teeb meem dab tsi rau koj tej visa, koj tej me nyuam cov kev kawm los yog koj tej cai ntawm Australia — tab sis yog tej lus teb uas yuav qhia txog tej xov xwm tseem ceeb pab kom totaub txog koj lub zejzog.
Cov kev txheeb pej xeem yog ib cov kev khaws tej xov xwm loj tshaj plaws thoob teb chaws (Australia), thiab yog ib co hauj lwm uas txhua tus neeg ntawm Australia yuav tsum tau sau.
Koj yuav teb tej lus nug txog koj tej kab lis kev cai, tej yam ntxwv, tej nyiaj koj khwv tau, tej hauj lwm koj ua thiab tej tsev/chaw koj nyob.
Emily Walter ces yog Census tus kis uas nthuav xov xwm thiab nrog tej neeg nthuav xov xwm tham tau qhia rau SBS Examines tias:
"Yog tej neeg ntiag tug tej yam ntxwv uas pab kom peb pov nthuav dav txog ib lub zejzog twg ... hais tsi ntsees rau paub txog tias seb tej zejzog ntawm puas yog cov muaj ntau cov neeg coj ntseeg ntau yam kab lis kev cai thiab hais ntau hom lus, kom peb muaj cib fim los tsim tej kev pab cuam rau tej zejzog ntawd."
Tej kev txhawj xeeb txog cov kev teb tej lus nug no tsim nyog paub tias tej xov xwm yus qhia ntawd yeej yuav tau txais kev pov puag thiab yuav tau txais kev ruaj ntseg.
Walter tau hais tias "Tsab cai Privacy Act thiab tsab cai Secrecy Provision of the Census and Statistics Act yeej teev tias peb tsis muaj peev xwm yuav muab tej neeg tej xov xwm coj mus faib qhia rau lwm tus raws tej xub ke uas yuav muaj peev xwm txheeb tau tias lawv yog leej twg los sis lawv yog tsev neeg twg,"
"Peb yeej tsis khaws tej neeg tej npe thiab tej chaw nyob nrog tej xov xwm ntawd li. Thiab tsuas khaws tej xov xwm no cia ntawm ABS (Australian Bureau of Statistics) xwb thiab yeej yuav tsis coj tej xov xwm no coj mus qhia rau tsoom fwv lawm cov tuam chav, suav cov kev tsis qhia rau lub tuam chav tswj dej num tsiv teb tsaws chaws (Immigration Department) paub."
Toom xov xwm SBS Examines no ces peb nrog Australian Bureau of Statistics tham thiab txheeb kom paub ntxaws ntxiv txog cov kev txheeb pej xeem tshiab (Census 2026) no, thiab los qhia txog ntau yam xov xwm yuam kev uas yuav tshwm sim rau koj tej lus teb.
Mloog tau xov xwm tshiab ntawm SBS Hmong, download SBS Adio app, caum SBS Hmong ntawm Facebook,mloog tau Youtube, Spotify, Podfollow, iHeart Radio, Google Podcast thiab Apple Podcast.
