Ntsiab lus:
- Roblox yuav tsim dua ob co accounts tshiab rau tej me nyuam yaus thiab tej hluas nyuam qhuav nto nkauj nto raug siv tab sis yuav muaj qee cov kev rau tej accounts no.
- Tsoom fwv Australia tautub nias lub tuam txhab video game Roblox no lub 2 hlis ntuj dhau los tom qab tau muaj ntau cov kev cej luam tias muaj neeg phem xav siv lub video game platform no haub ntxias tej me nyuam kom tau txais txiaj ntsim rau lawv los yog kom tsim tau cov teeb meem sexual abuse rau tej me nyuam yaus.
Lub tuam txhab video game Roblox no yuav tsim ob co accounts rau tej me nyuam haus hnoob nyoog txij 5 xyoos mus txog qes dua 16 xyoos siv.
Thawj cov hu ua Robox Kids uas tsim rau cov me nyuam hnoob nyoog txij 5-8 xyoo siv. Cov ob ces hu ua Roblox Select uas tsim rau tej me nyuam hnoob nyoog txij 9-15 xyoos siv.
Lub game platform no yuav siv ib co technology los txheeb tej me nyuam no tej cov hnoob nyoog, suav cov kev txheeb lawv tej ntsej muag, ces mam li pub lawv siv tej account kom phim rau lawv siv.
Cov Roblox Kids ces pub lawv siv tej game muaj cov rating 'minimal' los yog 'mild' uas tsis pub lawv chat nrog lwm tus.
Hos cov Roblox Select ces muaj cov game rateing 'moderate' thiab maj mam pub lawv siv cov chat function zuj zus kom lawv tau nrog lawv tsev neeg thiab nrog lawv tej phooj ywg hnoob nyoog tib yam tham.
Matt Kaufman uas yog tus coj uas tswj kev nyab xeeb ntawm lub video game platform Roblox no tau hais ib co ncauj lug tias "Yeej tsis muaj ib co system yuav siv tau zoo 100 feem pua li, tej accounts uas tsim kom siv haum raws li tej me nyuam tej hnoob nyoog no raug tsim coj los pab kom tej niam txiv pheej tsis txhob kwv yees thiab pab kom siv tau haum raws li tej me nyuam tej hnoob nyoog."
Txawm li cas los lub game platform no kum tseem tsis tau raug tsoom fwv Australia txwv nrog ntau cov social media platforms uas tau piv txwv txim lub 12 hlis ntuj 2025 dhau los.
Anika Wells uas yog Australia tus nom tswj cov dej num Communications hais tias nws yej tau qhia txog nws tej kev txhawj xeeb txog tej duab liab qab thiab tej content uas pheej ua rau tej me nyuam khwv tswv yim tua tus kheej uas tej chaw nthuav xov xwm tau cej luam qhia uas tau ua rau muaj teeb meem rau tej me nyuam.
Nws tau hais cov ncauj lug no hauv ib tsab ntawv xa rau lub tuam txhab Roblox tias ''Tseem muaj qhov txaus txhawj xeeb tshaj ntawd thiab uas yeej muaj tej xwm txheej no ua ntuv zus raws li tau muaj tej xov xwm cej luam qhia tias muaj tej neeg phem pheej mus haub ntxias tej me nyuam yaus, thiab pheem xav siv lawv cov kev xav paub xav pom thiab cov kev tsis paub tab kom tau txais txiaj ntsim rau tej neeg phem."
Raws li tsoom fwv tsab cai social media ban uas tau siv txij lub 12 hlis ntuj tsaib no los yeej tau teev tias yog tej tuam txhab social media twg tsis kub siab los nrog tswj lawv tej platform kom txwv tej me nyuam los yog kho kom tsis txhob raug teeb meem phom sij rau tej me nyuam ces yuav raug lub koom haum eSafety Commissioner muab nplua nyiaj yuav laug txog li AUD 50 million.
Txawm li cas los nyuam qhuav coj tsab cai txwv tej hnoob nyoog tsis pub siab tej duab liab qab thiab tej content uas yuav txov tus kheej coj los siv rau hnub tim 9 lub 3 hlis ntuj 2026 xwb, thiab kuj yuav siv tsab cai no rau Roblox thiab.
Tsis tas li ntawd los tseem hais kom tej tuam txhab game services yuav tau txwv thiab yuav tau nqe tes ua ib yam dab tsi los tswj kom tsis txhob pub coj tej duab liab qab ntawm ib tug neeg twg coj mus tso/faib rau lwm tus yam tsis tau txais kev tso cai, los yog tsis txhob pub lwm tus mus haub ntxias tej me nyuam, los yog kom lwm tus tsis txhob muaj peev xwm coj tej duab tej content no mus siv tawm tsam lwm tus.
Mloog tau xov xwm tshiab ntawm SBS Hmong, download SBS Adio app thiab caum SBS Hmong Facebook page thiab mloog tau SBS Hmong Youtube.
