Xov xwm luv tshaj tawm hnub zwj Quag (Tuesday newsflash 05.08.2025):
Siv cov artificial technology pab tej lagluam
Treasurer Jim Chalmers hasi tias tej zaum muaj peev xwm yuav siv tau cov artificial intelligence los pab txhawb nqa Australia tej lagluam thiab pab kom ua tau lub zoo neej tuaj ntxiv yog tias ua tib zoo xyuas kom siv tau tej technology no raws li qhov tsim nyog siv. (Txawm li cas los Sussan Ley uas yog tus coj ntawm lwm pab nom teb chaws hais tias yeej tseem tsis tau muaj tej cai coj los pov puag tej neeg tsim tej digital contents, tej artists rau lub caij tej technology no vam meej zujzus tuaj).
Kev xav tsa ntawm xeev Tasmania
Jeremy rockliff uas yog tus hau xeev Victoria tau ntsib Governor Barbara Baker thov kom tsoom fwv rov qab mus ua hauj lwm kom daws tau tej xwm txheej khuam daig rau cov kev xaiv tsa nom tswv xeev rau lub hli dhau los, vim zoo li tsis muaj ib pab nom loj ntawm ob pab yog tus yeej tej rooj nom feem coob thiab yuav tau tos cov kev pab ntawm cov pab nom me.
Paj pob zeb hiav txwv hloov xim
Raws li lub koom haum Australian Institute of Marine Science tau qhia ces lub caij 40 xyoo dhau los no vim tej hiav txwv kub sov tuaj ntxiv ces thiaj ua rau muaj tej paj pob zeb hiav txwv txog li ib feem peb ntawm Great Barrier Reef tau hloov xim ntawm ntau xim mus ua xim dawb lawm.
Israel cov kev siv tubrog tawmtsam Gaza ntxiv yuav puas tsuaj loj
Miroslav Jenca uas yog tus neeg ua hauj lwm pab UN lub tuam chav tswj kev ruaj ntseg hasi tias yog tseem muaj tseeb tias Israel yuav xa tub rog mus tawm tsam Hamas thoob plaws Gaza Strip li nws hais tiag ces ntshe yuav raug kev puas tsuaj loj. Nws thiaj tau tsis pom zoo nrog ib daim video uas Hamas muab ob tug neeg raug txhom yuag yuag khawb ib lub qhov tias yog cov kev ua txhaum war crimes thiab yuam pej kum haiv cai. Thiaj ua rau Gideon Saar uas yog Israel tus nom tswj dej num txawv teb chaws hais kom Hammas kav tsij cia li muab tej neeg nws txhom 50 tus uas tseem seem ntawd tso kiag tom qab tau pom daim video no thiab tau muab cov xwm txheej no piv tias tej Hamas ua no zoo li Islamic State thiab Nazis cov kev ua phem limhiam rau tej neeg.
Australia thiab Fabkis cov kev sib tham txog Middle East
Tom qab uas ib hmo dhau los uas Australia tus thawj pwm tsav Anthony Albanese tau hu xov tooj nrog Fabkis tus President Emmanuel Macron tham lawm ces ob lub teb chaws no tau pom zoo yuav sib tham ntawm UN lub rooj sab laj lub hlis tom ntej no txog lub teb chaws Palestine thiab tej xwm txheej ntawm Gaza.
Queensland tej leeskais cov kev tawm tsam
Tau muaj tej lees kais (Xibfwb qhia ntawv) txog li ntawm 50,000 tus tau mus tawm tsam tsis qhia ntawv hnub no ces thiaj muaj teeb meem rau tej chav kawm, muaj teeb meem rau tej tub kawm tshaj 500,000 tus thiab tej teej kawm tshaj 1,200 lub tom qab nom tej lees kais no tsis pom zoo yuav tej nyiaj hauj lwm them 8 feem pua rau tej lees kais rau 3 xyoos.
Foob pob nuclear tso rau Hiroshima txwm 80 xyoo
Japan kuj ua koom txoos nco txog tej xwm txheej Meskas tso ntiaj teb thawj lub foob pob nuclear rau nws lub nroog Hiroshima hnub tim 6 lub 8 hli ntuj xyoo 1945 uas txwm 80 xyoo uas tau ua rau muaj neeg coob tshaj 140,000 tus tas sim neej, thiab txawm tias caij nyoog dhau ntau caum xyoo lawm los tej nuclear radiation yeej tseem ua rau tej neeg muaj mob thiab tsim txom.
Meskas xa neeg Rwanda rov qab
Rwanda yog lub teb chaws 3 ntawm nrim av Africa uas tau pom zoo txais 250 tus neeg Rwanda uas raug Meskas xa rov qab rau lub caij uas tsoom fwv Trump xav tshem tej neeg tsiv teb tsaws chaw tawm ntawm teb chaws Meskas.
Australia tej teeb meem vaj tse
Tau muaj ib co kev teeb txheeb tshiab ntawm lub koom haum Cotality qhia tias txawm tso cai pom zoo kom sai rau cov kev tsim kom tau tej vaj tse sai los ntshe yuav daws tsis tau tej teeb meem tsis muaj vaj tse txaus rau tej neeg nyob ntawm Australia vim tseem yuav tau los kho tej chaw pub tsim vaj tse nyob, xyuas cov hauj lwm txhawb nqa kom tsim tej vaj tse thiab tej kab theem paj qes. Ua ke no los lub koom haum Homelessness Australia thiab National Aboriginal and Torres Strait Islander Housing Association kuj tau qhia tias lub caij no kuj tau muaj neeg txum tim tej cuab yig thiab tej me nyuam ras los ua cov neeg tsis muaj vaj tse nyob ntau tuaj ntxiv thiab.
Xov xwm ntawm teb chaws Southeast Asia
Nom tswv Cob tsib yuav pub tej neeg txawv teb chaws yog tau txog li 3 hlis ntawm nws lub teb chaws yam tsis tas thov visa siv yog tias tej neeg no yog tej muaj txuj ci, ua luam, nqes peev lagluam, yog tej kws tshawb fawb, tej neeg artists, tej neeg muaj fwm chim thiab paub kab lis kev cai zoo.
Nom tswv Nplog kuj npaj yuav roj ntawm teb chaws United Arab Emirates los siv thiab Suav lub tuam txhab tsim tsheb BYD kuj yuav qhib muag tej tsheb hauv tuam ceeb Vientiane.
Ua ke no los Thaib thiab Cambodia yeej tseem tab tom sab laj kom tsim tau kev thaj yeeb ntawm teb chaws Malaysia tom qab tau muaj cov kev sib tua tsis ntev los no vim tsis sib haum xeeb rau ntau cov chaw raws tej ciam teb ntawm ob lub teb chaws no.
