Angpao Somsouk Vangxuexa yog ib tug tub kawm uas tau cov Australia Awards Scholarship tuaj kawm project management ntawm tsev kawm qib siab RMIT University ntawm Melbourne ntawm teb chaws Australia.
Nws hais tias cov kev tau tsoom fwv Australia tej scholarship tuaj kawm no yog ''ib co txheej txheem tseem ceeb heev rau nws, vim nws tau sib tw nrog cov scholarship uas muaj neeg sib tw coob heev hu ua 'Australia Awards Scholarship', ua yog ib co scholarship rau tej coj yav pem suab ntawm cov teb chaws tseem tab tom txhim kho. Ces kuv thiaj yuav tau teev txog kuv tej kev kawm thiab tej kuv tau ua coj los pab teb chaws rau hauv kuv daim ntawv thov cov scholarship no.''
''Kuv xav tias kuv yeej kub siab heev uas yuav siv kuv tej txuj ci uas kuv kawm tau no no los pab txhim kho kuv lub teb chaws.''
Thaum tham txog qhov sib txawv ntawm cov kev kawm ntawv ntawm teb chaws Nplog thiab kawm ntawm teb chaws Australia ces Mr Vangxuexa hais tias ''Yog ib co ua rau muaj kev pauv hloov zoo tshaj plaws ntawm kuv lub neej, cov kev kawm ntawm tsev kawm qib siab RMIT ces yog cov yuav tau nqes tes ua kiag. Tsis yog kawm hauv tej ntaub ntawv xwb tab sis kuj tau coj tej kawm tau mus siv ua lub neej tiag. Tsis tas li ntawd los kuv kuj tau kawm kom paub ua lub neej ywj pheej, vim rau qhov yus ntiag tug yuav tau ua txhua tsav yam kheej xwb.''
Angpao Somsouk Vangxuexa at SBS Office, Federation Square, Melbourne, Australia (2025) Source: SBS
''Ua rau kuv ua tib zoo xyuas kom kuv ntseeg kuv tus kheej thuam nrog lwm tus tham los yog sab laj, thiab kuj tau pab kuv txhim kho kuv ntiag tug thiab kuv cov kev ua hauj lwm''.
Yog tham txog tias vim li cas nws thiaj kawm project management ces nws teb tias ''Project management ces yog ib co tseem ceeb tshaj plaws ntawm txhua yam uas kuv kub siab txog. Tsis hais yog cov kev tsim community campaigns, cov kev txhim kho tej zejzog kom ceev txuag tau tej ib puag ncig, los sis tsim cov digital transformation projects. Vim yog ib co txuj uas pab kom tej neeg tau sib cuag raws li tej tswv yim npaj tseg yuav ua raws thiab cov kev ua tau ib co txiaj ntsim dab tsi rau tej zejzog.''
Mr Vangxuexa qhia tias ''cov kev tuaj kawm ntawm teb chaws Australia no pab txhim kho rau kuv ntiag tug thiab pab kom kuv ua tau hauj lwm zoo tuaj ntxiv. Ua rau kuv muaj txuj ci, ua rau kuv paub txheeb tshuaj ntsuam thiab daws tau teeb meem, thiab pab kom kuv muaj kev ntseeg siab tawm tsam nrog ntau yam teeb meem nyuaj, thiab pab kom kuv muaj peev xwm txiav txim siab tau zoo. Tsis tas li ntawd los kuj tau kawm txog tej neeg ntawm lub teb chaws no seb lawv ho ua lawv lub neej zoo li cas thiab, ua ke no los kuv kuj tau ntoj ncig thiab tau kawm txog lawv tej kab lis kev cai thiab.''
Nws hais ntxiv tias qhov zoo tshaj plaws nws kawm tau ntawm teb chaws Australia no ces yog ''tej neeg cov kev xav. Yeej muaj peev xwm ntsib thiab cuag tau lawv yooj yim, thiab yog ib co neeg qhib siab hlo nrog yus tham. Thiab yog yus xav tau xov xwm dab tsi los lawv yeej txaus siab nrhiav rau yus. Ces thiaj tsis yog tias kuv kawm tau ib co txuj ci xwb tab sis tseem paub txog tej neeg cov kev xav ntau yam sib txawv uas yog tej yam yuav tau txais txiaj ntsim zoo rau kuv lub teb chaws, vim rau qhov tseem yog ib lub teb chaws tab tom txhim kho thiab tseem yuav khoov kho ntau yam tshiab.''
Yog tham txog tias ib tug twg ho xav thov cov scholarship no ces nws hais tias yeej muaj tej scholarship no rau sawv daws suav cov neeg pawg tsawg nrog thiab.
''Kuv xav kom mus teeb txheeb txog cov scholarship no, thiab txheeb kom paub txog yus tus kheej zoo thiab li paub tias yus xav tau dab tsi, xav ua dab tsi thiab paub tias cov scholarship ntawd xav tau tej neeg zoo li cas.''
Txawm li cas los nws kuj hais ntxiv tias tom qab kawm tag lawm yus yuav tsum tau rov qab mus rau yus lub teb chaws thiab mus pab txhim kho teb chaws.
Lo lus kawg uas Angpao Somsouk Vangxuexa hais ces yog ''yuav tau kub siab txog yus tus kheej, tsis txhob ntau nqe dab tsi ntau rau tej yus tau ua tiav, yuav tau kub siab txog yus cov kev coj taug ua zoo, thiab yus tej zejzog thiab seb yus ho muaj tej zeem muag yus xav ua dab tsi rau yav pem suab.''
''Kev kawm yog tej yam tseem ceeb heev, thiaj xav kom rau siab kawm, xav paub xav pom thiab xav kawm, tsis tas li ntawd los koom thiab poo xyaw nrog tej neeg uas pab thiab txhawb nqa yus.''
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follow los yog lwm cov podcasts platforms (iHeart, Amazon Music & Podcasts).
