Hauv paus xov xwm:
- Albanese ceeb toom kom lwm pab nom teb chaws tsis txhob txwv txiav nws.
- Australia tau koom nrog ntau caum lub teb chaws kom Israel xaus tsov rog ntawm Gaza.
- Suav yog lub teb chaws pab cov kev txhim kho rau Southeast Asia ntau tshaj plaws tom qab Meskas thiab Askiv txiv nyiaj pab.
Xov xwm luv tshaj tawm hnub zwj Quag (Weekly wrap for Tuesday 22.07.2025):
Australia tus thawj pwm tsav ceeb toom kom lwm pab nom hwm tej cai nws tsim siv
Thawj pwm tsav Anthony Albanese tau ceeb toom rau nws lwm pab nomt eb chaws ua ntej yuav rov qab pib ua hauj lwm hauv tsev tsoom fwv teb chaws hnub no. Tom qab tau xaiv tsa tsoom fwv teb chaws lawm ces tau ua rau pab nom Labor muaj tej nom ntawm tsev kis xeev qes txog li ob npaug ntawm plwm pab nom teb chaws. Nws thiaj hais kom lwm pab nom teb chaws thiab Green hwm tej nws ua. Sussan Ley uas yog tus coj lwm pab nom teb chaws hais tias nws yog pab nom sawv cev rau tej neeg xaiv nom thiab yuav txheeb xyuas Labor tej cai. Nick McKim uas yog ib tug nom ntawm pab nom Greens los yeej qhia tias yuav xyuas kom Labor ua raws li tej lus nws tau cog tseg.
Bangladesh lub dav hlau tua rog poob
Muhammad Yunus uas yog Bangladesh tus tsoom fwv uas tswj hwm ib ntus tam sim no tau los hais lus tu siab rau tej cuab yig uas muaj lawv tej neeg nruam sim cuam tshuam nrog tej xwm txheej uas tau muaj Bangladesh ib lub dav hlau tub rog tseem tab tom ya tawm xyaum tub rog tau poob rau ntawm ib lub teej kaw qib siab ua rau muaj tej neeg yam tsawg li 19 leeg tas sim neej thiab 164 tug raug mob.
Askiv tus nom tswj dej num txawv teb chaws hais tias Israel ua phem lim hiam rau neeg Palestinian
David Lammy uas yog Askiv tus nom tswj dej num txawv teb chaws tau piav tias Israel cov kev pab tej neeg Palestinian txom nyem ntawm Gaza yog 'ib cov kev ua phem lim hiam'. Askiv kuj yog ib lub teb chaws ntawm ntau lub suav Australia nrog tau nqua hu kom Israel cia li xaus tsov rog ntawm Gaza Strip kiag tam sim no. Fabkis, Italy, Japan, Australia thiab Askiv nrog rau lwm cov teb chaws thiaj hais tias twb tau muaj neeg Palestinian tshaj 800 raug tua tuag lub caij lawv ''thov kev pab cuam ces thiaj tau tsis pom zoo rau cov kev pab uas phem lim hiam thiab tua tej pej xeem no.''
Kev thaj yeeb rau Ukraine
Tshuav sai sai rau qhov uas Ukraine thiab Russia yuav pom zoo los rub rooj sib tham kom tau txais kev thaj yeeb ntawm Turkey limtiam no tom qab uas tau tso tseg cov kev tsis sib ntaus sib tua rau ntau limtiam dhau los no. Tau muaj tsoom fwv Russia lub chaw thuav xov xwm TASS tau qhia ib cov xov xwm uas tsis paub seb puas tseeb tiag tias Ukraine tau hais kom rov qab muaj cov kev sib khom tshiab ntawm Istanbul limtiam no rau ob hnub zwj Teeb (Thursday) thiab zwj Kuab (Friday).
Tsoom fwv teb chaws cov hauj lwm Universal Childcare
Thawj pwm tsav Anthony Albanese hasi tias nws txhawb nqa kom tsoom fwv muaj lub luag hauj lwm tshaj qub ntxiv rau cov hauj lwm universal affordable childcare, uas nws tau qhia rau lub caij tseem sib tw xaiv tsoom fwv teb chaws dhau los tias yog ib co hauj lwm tseem ceeb kom lwm tus nco tias yog tej nws kho. Tab sis kuj tau muaj tej lus iabliam ntau tuaj ntxiv txog tej hauj lwm no tom qab Joshua Brown raug liam 70 lu txim tias tau ua phem rau tej me nyuam yaus ntawm ib co childcare centres ntawm Melbourne ces thiaj ua rau muaj kev txhawj xeeb txog tej nyiaj tsoom fwv teb chaws coj mus pab rau tej childcare centres tias tsis ua tib zoo los txheeb seb puas tau txais kev nyab xeeb rau tej me nyuam.
Tej nyiaj pab rau cov kev txhim kho cheeb tsam Southeast Asia
Tau muaj ib tsab ntawv cej luam tshiab ntawm lub chaw teeb txheeb Lowly Institute tau ceeb toom tias yuav muaj teeb meem rau tej kev noj qab nyob zoo, kev kawm thiab tej ib puag ncig ntawm cov teb chaws txom nyem tshaj plaws ntawm Southeast Asia rau lub caij uas cov teb chaws vam meej li Meskas thiab Askiv tau thim tsis pab nyiaj. Thiaj pom tau tias txij xyoo 2023 los no Suav tuam tshoj yog lub teb chaws tau pab nyiaj ntau tshaj plaws rau ntau cov program txhim kho rau cheeb tsam no.
Khaub zeeb cua Wipha ntawm Cob Tsib teb
Nom tswv Cob tsib ntawm lub nroog Haiphong tau tshem tej neeg ntoj ncig txog 18,000 tus mus rau lwm qhov chaw tau txais kev nyab xeeb thaum tau muaj lub khaub zeeb cua Wipha los hla sab qaum teb ntawm teb chaws Nyab Laj raws li Tuoitre News tau qhia.
Xov xwm ntawm Nplog teb
Ntiaj teb lub txhab nyiaj (World Bank) tau qhia tias muaj Nplog tej pej xeem coob tuaj ntxiv tau mus qhib cov ntawv siv nyiaj (bank account) coj mus khaws nyiaj tseg cia lawm. Ua ke no los kuj muaj Cob tsib ib lub tuam txhab yuav nqes peev cob 3 yam qoob loo ntawm xeev Champasak li kasfes, txiv durian thiab cov txiv blue berry. Tib lub caij no los nom tswv Nplog tseem yuav sib khom nrog tej tuam txhab tsim hluav taws xob tom qab tsis ntev los no uas tau qhia tias yuav nce tej nqe hluav taws xob kom kim tuaj ntxiv uas ua rau zej tsoom Nplog tsis txaus siab raws li phau ntawv xov xwm The Laotian Times tau qhia.
Tej meem caws ntawm ciam teb Cambodia thiab Thaib teb
Tsoom fwv Thaib tsis txaus siab thiab tau xa ntawv mus tawm tsam nrog tus coj uas tswj tsab cai Ottawa Cenvention uas txwv tsis pub caws meem tom qab txheeb tau tias tau muaj ib co meem raug caws rau ntawm cia teb Thaib thiab Cambodia rau lub caij ob lub teb chaws no tsis muaj kev haum xeeb rau nkawv tej ciam teb, uas Thaib tau hais tias yog ib co kev yuam pej kum haiv cai thiab tawm tsam nrog Thaib txoj kev tswj hwm twj lij ywj pheej raws li Bangkoj Post tau qhia.
