Xov xwm luv tshaj tawm hnub zwj Feej (Wednesday news 11.06.2025):
Lub koom haum North Australian Aboriginal Justice Agency tau nqua hu kom muaj kev raus tes rau tsoom fwv Northern Territory tej justice system tom qab tau muaj ib tug txiv neej hnoob nyoog 68 xyoo tau tas sim neej ntawm Royal Darwin Hospital rau ob hnub so dhau los tom qab raug tub ceev ntawm lub xeev no muab txhom thiab ceev tseg cia.
Barbara Baker uas tus governor Tasmania tau qhia tias nws tseem yuav xyuas seb ho muaj tej xub ke twg los pab tus hau xeev Jeremy Rockliff uas xav muaj cov kev xav tsa ntxov tom qab lwm pab nom xeev (Pab nom Labor) tau tawm suab tsis tso siab rau nws txoj kev ua tus coj.
Thawj pwm tsav Anthony Albanese tau qhia rau hnub Tuesday los yog zwj Quag dhau los tias yuav caw tej koom haum sawv cev rau tej neeg ua hauj lwm, tej koom haum lagluam tej koom haum zej tsoom los sib pauv hloov tswv yim mus koom lub rooj sab laj Productivity Forum lub 8 hli ntuj xyoo 2025. Thiaj ua rau Innes Willox uas yog tus coj lub koom haum Australia Industry Group thiaj hais tias yuav pab kom muaj cov kev nqes peev lagluam ntiag tug ntau tuaj ntxiv. Hos Andrew Meckellar uas yog tus coj lub koom haum Australia Chamber of Commerce and Industry tau hais tias yog tej yam tseem ceeb yuav pab haiv neeg no lub neej pem suab.
Monash IVF tseem tab tom raug tshuaj ntsuam tom qab tau muaj cov xwm txheej tso cov embryo yuam kev rau ib tug poj niam ntawm Melbourne tom qab tau tso yuav kev thawj zaug dhau los uas ua rau ib tug poj niam yug lwm tus poj niam tus me nyuam. Ces nws thiaj tau los thov txim rau nkawm niam txiv no.
Greta Thunberg kuj tau rov qab mus txog rau ntawm Paris tom qab raug Israel tej tub rog nruab deg tiv thaiv thiab txwv txiav tsis pub nws thiab ib cov neeg tawm tsam txhawb nqa teb chaws Palestine xa khoom pab cuam coj mus pab tej neeg ntawm Gaza strip. Ms Thunberg kuj tau liam tias Israel tau muab nws thiab nws tej neeg tawm tsam nyiag txhom ntawm pej kum haiv tej nrim dej.
Israel kuj npau taws heev rau 5 lub teb chaws uas muaj Australia nrog suav cov teb chaws Canada, Norway, New Zealand thiab Askiv tau txwv tsis pub Israel ob tug nom tseem ceeb siv lawv tej nyiaj txawv teb chaws thiab tsis pub ntoj ncig, uas yog tus nom tswj kev ruaj ntseg haiv li Itamar Ben Gvir uas yog ib tug neeg nyob ntawm West Bank thiab tus nom tswj dej num nyiaj txiaj uas yog Benzalel Smortrich.
Argentina lub Supreme Court kuj tau txiav txim siab muab nws tus qub president dhau los ua yog Cristina Kirchner kaw tsev laj cuj 6 xyoo liam tias nws tau ua tsis ncaj rau ib co contract nrog tej lagluam txij xyoo 2007 txog 2015 tab sis nws tsis lees paub tej lus iab liam no.
Meskas tus President Donald Trump tau hais tias Los Angeles raug tej neeg txawv teb chaws nias tsam thiab cog lus tias yuav daws tso lub nroog no tom qab tau ntau hnub uas tau muaj tej neeg mus rwg npoj tawm tsam cuam tshuam txog cov ICE mus txhom tej neeg tsiv teb tsaws chaw tsis muaj ntaub ntawv raug cai. Trump thiaj tau hais tej lus no ntawm lub teb chaws no lub yeej tub rog loj tshaj plaws thiab piav tias tej neeg tawm tsam yog ib co tsiaj thiab txhawb nqa kom tej tub rog qw tsis pom zoo nrog Garvin Newsom uas yog tus hau xeev California thiab Joe Biden uas yog Meskas tus qub President dhau los.
Raws li cov Corruption Index hauv ntiaj teb uas tau teev ntawm 180 lub teb chaws ces Nplog tsuas tau cov zauv 33 ntawm 100 xwb, thiaj ua rau Nplog tseem yog ib lub teb chaws uas tsis muaj kev dawb huv rau tej teeb meem lwg noj lwg haus ntawm cheeb tsam Southeast Asia.
Vientiane Times tau qhia tias Suav tuam tshoj lub tuam txhab China Airline Corporation xav yuav Nplog lub tuam txhab Lao Airlines thiab lwm cov tuam txhab muag hluav taws xob thiab roj thiab ib lub txhab nyiaj tej share.
Bangkok Post tau qhia tias Thaib tus thawj pwm tsav Paetongtarn Shinawattra tau nrog Cambodia tus thawj pwm tsav Manet Husen thiab nws txiv uas yog Hun Sen uas yog Cambodia tus coj qub dhau los tham kom siv tau kev nom tswv los sib kho cov kev tsis haum xeeb ciam teb nrog Thaib.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follow los yog lwm cov podcasts platforms (iHeart, Amazon Music & Podcasts).
