Ntsiab lus tseem ceeb:
- Australia yeej yog lub teb chaws zoo caij tsheb mus ncig, tab sis vim yog ib lub teb chaws loj dav heev, muaj tej tsiaj qus, thiab tej chaw deb heev uas yus mus rau, ces thiaj yog tej yam tseem ceeb uas yus yuav tau xub npaj ua ntej.
- Nqe tej koom tseem ceeb li cov phau ntawv luaj chib lig (atlas), dej haus, zaub mov noj, first aid kit, thiab cov kev yuav tau ceev faj txog tej tsiaj hais tsi ntsees txog tej kangaroos.
- Koj yeej muaj peev xwm mus so me ntsis ntawm tej chaw ci mov mog ntawm tej zos toj siab, ntau cov zos me thiab tej national parks thiab siv caij nyoog kom koj lom zem nrog Australia tej toj rooj hauv pes hav zoov hav tsuag uas zoo nkauj heev, thiab tej kab lis kev cai ntau yam sib txawv.
- Cov kev caij tsheb mus ncig uas muaj neeg nyiam mus ces yog mus rau ntawm Great Ocean Road, Pacific Coast, Tasmania thiab yog tias kom xav ua tej yam kom tsis tau ua dua los yog xav mus adventure ces mus rau txoj kev Gibb River Road los yog mus los ntawm Cape York rau Cairns.
- Yuav tau npaj dab tsi ua ntej koj yuav mus ncig ib qho chaw qhov twg?
- Yuav tau kub siab txog tej tsiaj qus li cas thaum caij tsheb mus ncig ib qho chaw twg?
- Muaj tej kev phom sij dab tsi ntawm tej kev tsheb?
- Tej neeg mus ncig nyiam nres tsheb qhov twg thaum tseem mus ncig?
- Cov kev nkag siab txog lub teb chaws no tej kab lis kev cai ntau yam
Australia yog ib lub teb chaws loj dav, thiab tej zaum ces qhov zoo tshaj plaws uas yuav pab kom yus paub txog lub teb chaws no ces kuj yog cov kev tsav tsheb mus ncig xyuas.
Lara Picone uas yog ib tug neeg sau ntawv ntoj ncig tshab txhais tias "Yeej muaj tej hav zoo ntawm tej chaw sov, tej hav suab puam, tej chaw ntau yam raws tej ntug hiav txwv thiab tej pov txwv. Ces thiaj ua rau yus yuav pom ntau yam chaw thiab tej luaj puas sib txawv ntawm teb chaws Australia. Thiab kuv xav tias cov kev tau nrog tej neeg zejzog tham yuav pab kom yus nkag siab tias lub teb chaws Australia zoo li cas."
Thiab vim li ntawd ces lub teb chaws no thiaj muaj tej huab cua phem heev thiab muaj tej tsiaj qus ntau yam, ces thiaj yuav tau ua tib zoo npaj ua ntej yuav mus ncig xyuas.
Yuav tau npaj dab tsi ua ntej koj yuav mus ncig ib qho chaw qhov twg?
Ua tib zoo xyuas kom yus tshawb fawb txog txoj kev yus yuav mus, thiab teev zwm npe thov cov kev pab cuam raws kev ua ntej yus mus. Muaj qee thaj chaw ces yeej yog cov chaw uas nyob deb heev, uas siv tsis tau xov tooj, los yog muaj tej chaw sam roj nyob deb heev.
Cov kev npaj tej first aid kit, tej dej haus, zaub mov noj, tej pob sam xov tooj, tej log tsheb tsam tau hloov, thiab npaj ib daim luaj chib lig (map) los yog daim luaj chib lig qhia tag nrho tej kev (road atlas) nrog yus mus.
James Williams uas yog tus tswj tej policy ntawm RACV insurance hasi tias: "Tej neeg coob heev yeej tsis muaj tej ntawv qhia siv tej kev tsheb li lawm thiab lawv pheej tos siv xov tooj xwb, tab sis ntawm teb chaws Australia no ces tej zaum koj kuj yuav tsis muaj peev xwm siv tau internet thiab, ces thiaj kom xav txog qhov no thiab."
Ib tug kangaroo dhia hla ib txoj kev av xim kab ntxwv ua ntej ib lub tsheb 4 wheel drive ntawm Kimberly ntawm Western Australia ntawm teb chaws Australia. Credit: Abstract Aerial Art/Getty Images
Yuav tau kub siab txog tej tsiaj qus li cas thaum caij tsheb mus ncig ib qho chaw twg?
Ntawm tej zos toj siab ces xav kom tsav tsheb qee me ntsis, thiab xav kom ceev faj txog tej tsiaj hla kev tas mus li hais tsi ntsees yog kangaroos, uas sawv daws yeej paub zoo tias yog cov uas pheej nyiam dhia paj paws hla kev yam tsis ceeb toom qhia leej twg li. Thiaj xav kom tsis txhob tsav tsheb rau thaum sawv ntxov thiab thaum tsaus ntuj, vim yog lub caij uas tej tsiaj no nyiam hla kev tshaj plaws.
Yog tias koj pom ib tug tsiaj ntawm kev, ces tsuj brake kom ruaj thiab tsis txhob hloov kiag lem rau txoj xub ke tshiab. Mr William tshiab txhais tias "Vim cov kev ua li no tej zaum yuav ua rau koj lub tsheb mus tsoo ib tsob ntoo twg los yog tej tsheb tom yus hauv ntej uas los tshuam yus, uas yuav yog ib co xwm txheej phem tshaj qub ntxiv rau yus."
Yog tias koj lub tsheb tsoo ib tug tsiaj, ces ua tib zoo nres kom yus tau txais kev nyab xeeb. Txheeb seb txhuas tus neeg puas ua li cas, thiab hu rau yus lub xeev tej koom haum pab cawm tej tsiaj yog tias tus tsiaj ntawd tau raug mob lawm.
Muaj tej kev phom sij dab tsi ntawm tej kev tsheb?
Australia tej huab cua yeej muaj peev xwm pauv hloov sai heev thiab hloov kiag tib npliag ntshis tau yooj yim heev uas tej zaum kuj ua rau yus ceeb thiab.
Mr Williams hais tias "Lub caij ntuj sov, ces qhov teeb meem tseem ceeb ces tsam ho muaj tej hav zoov kub hnyiab thiab muaj huab cua kub sov heev. Tej zaum tej huab cua kub sov no kuj ua rau muaj teeb meem rau tej batteries, hais tsi ntsees yog koj tsav tsheb siv hluav taws xob. Tab sis cov kev yuav raug kev phom sij ntawm tej hav zoov kub hnyiab yog ib co tseem ceeb heev. Thiaj xav kom txheeb tej huab cua ntawm lub app txheeb huab cua ntawm koj lub xeev."
"Hos lub caij ntuj no, ces kuj yeej ib txwm muaj tej teeb meem li muaj dej khov, tej dej khov rau ntawm kev tsheb tsam ua rau tsheb npleem thiab kev nplua, thiab ua rau tej huab cua no heev, thiab los nag, los yog ua rau yus tsis pom txoj kev tsheb zoo."
Yog tias koj lub tsheb tuag/puas rau ntawm ib thaj chaw nyob deb uas siv tsis tau xov tooj, ces xav kom nyob twj ywm hauv tsheb.
Mr Williams thiaj hais tias "Vim yuav nrhiav tau lub tsheb yooj yim dua nrhiav ib tug neeg uas ploj lawm."
Tos kom ib tug twg tsav tsheb los hla yus, ces co tes rau lawv, thiab thov kom lawv pab, thiab thov kom lawv hu rau emergency roadside assistance thaum lawv tsev tsheb mus uas siv tau xov tooj lawm.James Williams
Txawm tias yeej muaj tej cai tswj cov kev siv kev tsheb xwm yeem tib yam thoob teb chaws, los yeej muaj ib co cai ntawm qee cov xeev kuj txawv thiab, thiaj tsim nyog yus txheeb cov kev taw qhia ntawm yus lub xeev ua ntej yus mus ntoj ncig.
Tej tsev tos qhua qub uas muaj keeb kwm tseem ceeb rau ib lub caij twg ntawm Victoria lub zos Rutherglen. Source: iStockphoto / Bruce Wilson Photography/Getty Images/iStockphoto
Tej neeg mus ncig nyiam nres tsheb qhov twg thaum tseem mus ncig?
Yeej muaj ntau txoj xub ke rau yus ua kev lom zem thiab noj tej khoom noj qab.
Tej zos me ntau lub yeej yog cov zoo li hais no thiab yeej muaj keeb kwm ntawm lawv tej zos thiab yeej muaj tej khoom pej thuam uas ''loj heev'' li txiv puv luj, cws (yaj, koala, kheb, magpie, etc) rau tej neeg yees duab ua kev lom zem thiab.
Thaum yus tshaib plab ces yus yeej muaj peev xwm nres tsheb ntawm ib lub zos twg tej chaw ci mov mog (noj ncuav qhwv nqaij (meat pie) thiab noj tej khoom qab zib txom ncauj li vanilla slice), ntawm ib lub pub, ntawm Suav ib lub khw noj mov, los yog ntawm ib thaj teb uas muaj lawv tej qoob loo sau tau los.
Yeej muaj tej chaw plob ntawm tej chaw muag thiab sam roj rau yus siv thiab tej chaw nres so taug kev tsheb. Hos yog xav pw hmo ces yeej muaj ntau cov camping grounds, tej tsev tos qhua rau yus tau so thiab.
Tab sis yog tham rau coob leej ntau tus lawm ces qhov tseem ceeb tiag yog cov kev tau mus pom tej toj roob hauv pes hav zoov hav tsuag thiab tau ua ntau yam li ua luam dej, nuv ntses, taug kev ntawm tej hav zoov, caij phiaj saum nplaim dej, los yog mus taug kev deb heev rau ib thaj chaw twg, nce ib lub roob twg ua si kom lom zem los yog ua exercise.
Ms Picone thiaj taw qhia tias "Caij tsheb mus rau txoj kev Gibb River Road (Kimberly), uas muaj tej qhov dej ntau thaj chaw li Bell Gorge uas yus muaj peev xwm ua tau luam dej rau ntawm tej pas dej pob zeb uas nyob deb heev no. Thiab tsis muaj kheb ntawm thaj chaw ntawd, txawm li cas los kuj yuav tau ceev faj thiab tsis hais ib qho chaw twg uas yus mus rau sab qaum teb ntawm teb chaws Australia."
Thaum uas Melissa Carbonell Fullerton tau xub tuaj ntawm Colombia tuaj nyob ntawm Australia no ces nws kuj tau ceeb tias muaj peev xwm caij tsheb mus ncig tau yooj yim heev thiab tau txais kev nyab xeeb rau yus.
Yeej tau txais kev nyab xeeb heev rau yus nres ib qho chaw qhov twg los tau; uas yus yeej nres tau txhua qhov chaw raws txoj kev yus mus mus txog rau cov chaw pw hmo (camping grounds).Melissa Carbonell
Tam sim no ces nws yeej yog ib tug neeg uas caij tsheb ntoj ncig raws tej caij, thiab nws yeej tau nrog nws tsev neeg uas tseem muaj tej me nyuam tseem yau nrog nws mus tas mus li.
Melissa hais tias "Pab kom yus tau koom tau nrog lub teb chaws no thiab tej neeg zoo tshaj qub ntxiv."
Lub khw ua rau ob hnub so ntawm lub pov txwv Coochiemudlo uas yog ib qho chaw tej neeg nyiam mus ncig xyuas tej chaw ntawm Moreton Bay ze nroog Brisbane xeev Queensland ntawm teb chaws Australia. Credit: chameleonseye/Getty Images
Cov kev nkag siab txog lub teb chaws no tej kab lis kev cai ntau yam
Cov kev caij tsheb mus ncig ib thaj chaw twg ntawm Australia kuj yog tej yam muaj fwj chim heev pab kom yus tau paub tau pom Australia tej kab lis kev cai ntau yam thiab.
Ms Picone hais tias "Yog tias koj mus rau Darwin, ces yog ib lub nroog uas muaj ntau tsav neeg coj ntseeg kab lis kev cai ntau yam nyob, thiab yeej muaj ntau yam fwj chim ntawm tej zejzog Asia, vim rau qhov zoo li twb yuav laug yog neeg Asia ib lub nroog lawm. Hos yog koj mus rau Mindil Beach Market thaum tsaus ntuj thiab mus saib hnub poob ces koj yeej yuav tau noj tag nrho tej zaub ntau yam uas qab heev thiab."
"Yog thaum mus txog tej zos toj siab lawm ces yeej yuav pom tej neeg Australia thiab yeej muaj tej pubs zoo nkauj ntau yam, thiab kuj yog ib txoj xub ke zoo rau yus tau mus koom ntau yam kab lis kev cai sib txawv ntawm tej zos toj siab thiab."
Tsis tas li ntawd los ho mus txheeb thiab koom nrog neeg txum tim cov kev coj tej neeg ntoj ncig thaum koj mus rau tej chaw ib qho qhov twg thiab kom thiaj pab koj sib cuab tau nrog lub teb chaws no thiab tej kab lis kev cai.
Cov kev tsav tsheb mus ncig ib thaj chaw twg ntawm teb chaws Australia. Source: iStockphoto / Handemandaci/Getty Images/iStockphoto
Tsim nyog koj mus ncig qhov twg?
Ms Picone qhia tias yog koj tseem yog tus neeg uas tseem nyuam qhuav pib caij tsheb mus ncig ib thaj chaw twg xwb ces yeej muaj ntau cov kev xaiv no rau koj mus tau thiab.
"Koj muaj peev xwm mus tau rau ntawm Great Ocean Road ntawm xeev Victoria uas muaj tej chaw ntoj ncig zoo nkauj heev raws tej ntug hiav txwv. Tsis tas li ntawd los kuj musj mus rau ntawm Pacific Coast pib ntawm Brisbane rau Sydney uas yeej muaj tej zos ntau heev nyob raws tej ntug hiav txwv raws txoj kev no thiab. Xeev Tasmania (Tassie) los kuj yog ib lub xeev uas zoo tsav tsheb mus ntoj ncig vim rau qhov tsis yog ib lub xeev loj, thiab tsuas zoo li yog ib lub teb chaws me me ntawm nrim av Europe xwb, uas yus tsuas tsav tsheb txog li 2 teev ib zaug twg xwb ces yeej mus pom qee thaj chaw txawv lawm."
Los sis yog tias koj yog cov neeg uas nyiam mus adventure, ces nws qhia kom mus caij tsheb ntawm Cairns mus rau Cape York ntawm Far North Queensland, mus caij tsheb ntawm txoj kev tsheb Gibb River Road (Kimberly) ntawm Western Australia los yog caij tsheb mus rau tus dej Murray uas yeej ntws hla ntawm New South Wales lub roob snowy mountains hla Victoria mus rau sab hnub poob tawm ntawm lub xeev South Australia mus rau hiav txwv sab qab teb ntawm teb chaws Australia lawm.
Yog koj xav paub txog tej tswv yim ntau tshaj no ntxiv ces muaj peev xwm mus txheeb tau ntawm lub koom haum Tourism Australia los yog txheeb koj lub xeev tej tuam chav tswj cov hauj lwm ntoj ncig tej vas sab; uas tej vas sab no ntau lub yeej muaj ntau cov kev taw qhia rau yus thiab muaj tej twj pab yus npaj cov kev ntoj ncig.
Subcribe los yog caum mloog tej xov xwm kaw ua suab Australia Explained kom paub txog ntau yam xov xwm tseem ceeb thiab tej lus taw qhia koj koj pib tau lub neej tshiab ntawm teb chaws Australia.
Yog tias koj muaj ib co lus nug dab tsi los yog muaj ib co tswv yim dab tsi? Ces xa email rau peb rau ntawm australiaexplained@sbs.com.au
