Xov xwm luv tshaj tawm hnub zwj Feej (Wednesday news 30.07.2025):
Cov kev teeb txheeb txog kab mob Multiple Sclerosis (MS)
Kuj tau muaj ntiaj teb thawj co kev teeb txheeb uas siv cov DNA los txheeb txog tus mob MS (Multiple Sclerosis) uas yog ib co mob ua rau paj hlwb tsis ua hauj lwm zoo, ua rau yus tsis hnov ntxhiab, los yog tsis hnov mob, thiab muaj kev pauv hloov rau yus cov kev pom kev thiab yus cov kev xav los yog tej cim xeeb. Cov kev teeb txheeb no yuav txheeb tias vim li cas tej neeg thiaj tau tus mob no thiab ib txhia ho tsis tau txawm tias kis tau tib tug kab mob virus.
Australia cov kev txwv tej me nyuam yaus tsis pub siv YouTube
Tsoom fwv teb chaws tau qhia meej tias yuav txwv tsis pub tej me nyuam yaus siv YouTube uas yog lub chaw tso video rau tej me nyuam yaus saib. Thaum xub mas kuj tsis txwv tej hluas kom thiaj tau siv cov kev pab kho mob thiab siv ua kev kawm. Tab sis kuj raug coj los teev xyaw ntau cov social media platforms.
Xa zaub mov tsis txaus pab Gaza
UN lub koom haum Integrated Food Security Phase Classification (IPC) hasi tias txawm Israel tso cai xa tej khoom pab cuam mus pab rau tej neeg Palestinian ntawm Gaza Strip los tsuas xa tau tej khoom ib nrab mus pab lawv xwb, yeej pab daws tsis tau tej xwm txheej tuag tshaib tuag qhis ntawm Gaza, thaib ceeb toom tias ''yuav muaj neeg tas sim neej coob'' yog tias tsis kub siab ceev nrooj nrog xyuas.
Murdoch thiab Trump rooj plaub
Meskas tus President Donald Trump hais tias phau ntawv xov xwm Wall Street Journal tiab nws tus tswv tuam los pav Rupert Murdoch xav los sib khom nrog nws rooj plaub ua rau nws poob ntsej muag. Mr Trump tau foob phau ntawv xov xwm no thiab nws tus tswv tom qab tau tshaj ib zaj xov xwm tias Mr Trump lub npe yog ib lub uas muaj cov kev sib fi nrog rau Jeffrey Epstein uas yog tus neeg ua cov kev txhaum sex offend.
Tsim lub teb chaws Palestine
Ed Husic uas yog Labor tus nom MP hais tias tsoom fwv Albanese tsim nyog yuav lees paub lub teb chaws Palestine tam sim no thiab tsim nyog Australia rau txim rau Israel. Tab sis Australia tus thawj pwm tsav Anthony Albanese thiab Penny Wong uas yog Australia tus nom tswj dej num txawv teb chaws tau hais tias tshuav ntau yam yuav tau ua kiag tam sim no tso ua ntej yuav lees paub lub teb chaws Palestine thiab yuav tsis pub Hamas muaj feem, thiab kom tso tej neeg nws muab txhom rov qab. Albanese tau tawm tsam tias Australia yeej tau koom kos xyeem mem tes nrog 14 lub teb chaws uas yeej tau pom zoo, li yuav los pab nom tswv Palestinian hais kom Hamas txo riam phiam thiab tso tag nrho tej neeg nws txhom rov qab thiab muaj kev xaiv tsa rau lub sij hawm li 1 xyoos.
Cov kev txo kab theem paj
Tau muaj tej economists tau qhia hnub zwj Feej (Wednesday) no tias tej xov xwm txog cov Consumer Price Index lub 6 hlis ntuj no yuav ua kom Reserve Bank of Australia (RBA) txo kab theem paj. RBA lub rooj sab laj dhau los yeej tseem tswj tus kab theem paj li qub uas ua rau ib txhia kws ceeb thiab hais tias tseem xav tau tej xov xwm kom ntxaws ntxiv ua ntej tso seb puas yuav txo.
Ntiaj teb lub nroog ob uas tsis muaj neeg xav tsiv tawm
Ho Chi Minh City tau ras los ua ntiaj teb lub nroog ob uas tsis muaj tej neeg xav tsiv tawm txuas ntxiv ntawm Taipei ntawm pov txwv Taiwan raws li Tuoitre News qhia.
Muaj neeg tshaj 2 million tus tau mus ntoj ncig Nplog
Tau muaj tej neeg ntoj ncig txawv teb chaws tau mus ncig Nplog teb tshaj 2 million tus rau lub caij ib nrab xyoo ntawm xyoo 2025, uas Thaib yog lub muaj neeg mus ncig coob tshaj plaws tshaj 700,000 tus, thiab tej teb chaws feem ntau mus ncig Nplog yog cov ntawm cheeb tsam teb chaws Southeast Asia raws li the Laotian Times tau tshaj tawm.
Cambodia tsis ua raws tej lus cheem rog
Thaib tus kis tub rog tau qhia tias Cambodia tsis ua raws li tej lus tau cog tseg li Thaib thaib Cambodia ob tug coj tau sib tham, vim Cambodia tseem tua phom thiab txawb tej foob pob tes rau Thaib lub xeev Si Sa Ket raws li Bangkok Post tau qhia.
