Xov xwm luv tshaj tawm hnub zwj Quag (Tuesday news 16.09.2025):
Yog tsis kub siab txo cua tsis huv raws tej hom phiaj 2035 ces neeg Australia yuav raug kev phom sij
Lub cej uas tsoom fwv teb chaws Australia los txheeb nws tej hom phiaj txo tsis tso pa tsis huv rau xyoo 2035 tau muaj tej kws paub zoo txog tej ib puag ncig taw qhia tias yog tej huab cua kub siab txij li 1 txog 3 degree celsius ces yuav ua rau muaj tej neeg Australia tshaj 500,000 tawm txheeb tus uas nyob nrug ntawm tej ntug hiav txwv txog li 10 km yuav raug dej nyab rau lub sij hawm 5 xyoos ntxiv no.
Cov kev ua raws Australia tsab cai age restiction laws
Anika Wells uas yog tus nom tswj dej num Communications thiab Julie Inman Grant uas yog tus coj lub koom haum eSafety Commissioner tau los qhia txog tej ntsiab cai age restriction laws rau tej tuam txhab social media platforms kom txheeb tsis txhob pub Australia tej me nyuam hnoob nyoog qes dua 16 xyoo qhib account siv. Txawm li cas los kuj tsis qhia kiag tias yuav tau siv tej technologies li cas coj los txwv tsis txhob pub tej me nyuam no siv (ua Senator Sarah Hanson Young ntawm pab nom Greens hais tias yog ib tsab cai ntxhov quav niab uas tsis pov puag tej me nyuam yaus uas yuav coj los siv txij tim 10 lub 12 hlis ntuj xyoo 2025 no mus).
Australia tus thawj pwm tsav lub rooj nom qhov chaw ua hauj lwm
Thawj pwm tsav Anthony Albanese tau los teb tej lus tib txog cov kev muab nws lub rooj nom Marrickville ntawm Sydney kaw tom qab uas tus tswv lub tsev teev hawm Anglican Church tau tso tseg tsis pub ntiav siv ntxiv tom qab tau ntiav siv lub chaw ua hauj lwm no los tau 30 xyoo vim txhawj xeeb txog tej neeg rwg npoj tawm tsam pab tej neeg Palestinians.
Meskas cov tub rog tswj kev ruaj ntseg haiv
Donald Trump uas yog Meskas tus President tau kos xyeem memtes rau ib tsab executive order xa cov tub rog tswj kev ruaj ntseg haiv mus rau Memphis thiab Tennessee. Mr Trump hais tias tseem muaj cov kev ua txhaum cai ntawm Memphis ntau tshaj tej neeg ua txhaum cai xam raws tus zauv nrab ntawm teb chaws Meskas lawm thiab.
Victoria cov Hamer Scholarship Program thiab Suav tuam tshoj
Jacinta Allan uas yog tus hau xeev Victoria tau qhia tias rov qab coj cov Hamer Scholarship Program rau tej tub kawm tertiary education tau mus kawm ntawm Suav tuaj tshoj txog 6 hli ua cov exchange program tom qab nws tau mus xyuas Suav tuam tshoj thawj hnub uas yog ib feem ntawm tej tswv yim npaj tseg yuav ua raws coj los txhawb nqa kom muaj kev sib raug zoo tuaj ntxiv nrog Suav tuaj tshoj.
Muaj neeg mob kab mob kas cees ntau tuaj ntxiv ntawm Australia 10 xyoo dhau los no
Dr Skye McGregor ntawm tsev kawm qib siab University of New South Wales lub chaw teeb txheeb Kirby Institute hasi tias vim cov kev tsis tau txais vaj huam sib luag rau tej nyiaj khwv tau, vaj tse ces thiaj ua rau tej neeg tsis tau siv cov kev sim, txheeb thiab kho cov mob kascees ces thiaj ua rau tej neeg kis tau tej kab mob kas cees ntau yam li siphilis, ghonorea thiab Clamydia ntau tuaj ntxiv rau lub caij 10 xyoo dhau los no uas yog ib co muaj peev xwm tiv thaiv thiab kho tau. Thiab kuj pom tias muaj tej neeg txum tim yog cov kis tau tej mob no 2 txog 5 npaug ntau dua lwm cov neeg Australia.
Nom tswv Cob tsib xav thov tsim cai tswj kom nqe kub nyob tus
Tau muaj xov xwm qhia tias nom tswv Cob tsib xav thov tsim kom tau ib tsab cai coj los tswj tej neeg ntiag tug uas pheej muag kub kom tau nyiaj tsam (profits) kom yuav tsum tau them se (tam li yog personal income tax) kom thiaj muaj peev xwm tswj tau tej nqe kub kom nyob tus raws li Tuoitre News tau qhia.
Tsoom fwv Thaib hais kom tswj tsis txhob pub xa kub tawm ntau
Thaib tus thawj pwm tsav Anutin Charnvirakul tau hais kom nom tswv Thaib xyuas kom tsis txhob pub xa kub tawm mus rau Cambodia ntau rau lub caij uas Thaib tej nyiaj Baht poob nqe. Tib lub caij no los nws kuj tau npaj tau nws tej nom cov npe uas yuav coj mus rau huab tais Thaib pom zoo kom lees nws tus tsoom fwv los ua nom tswv raws li Bankok Post tau tshaj tawm.
Asian Development Bank pab USD$ 41 million rau Nplog cov hauj lwm kho mob
The Laotian Times tau tshaj tawm tias lub txhab nyiaj Asian Development Bank tau pab nyiaj Meskas 41 million coj los ua cov hauj lwm kho mob primary health care pab rau Nplog ntau cov xeev.
