Raws lub koom haum Australian Institute of Health and Welfare (AIHW) tau ua ib co kev teeb txheeb tshiab ces nws tau qhia tias lub caij ntau tshaj 20 xyoo dhau los no tej poj niam kum mob cancer mis tsawg zog thiab tas sim neej tsawg zog lawm. Tab sis kuj muaj tej poj niam ntawm tej nroog thiab tej zos cheeb tsam tuaj ntug nroog yog cov tau mus txheeb mis thiab mob cancer plab hnyuv ntau tuaj ntxiv, txawm li cas los tej poj niam neeg txum tim thiab hais ntau hom lus coj ntseeg ntau yam kab lis kev cai yog cov mus txheeb tsawg dua. Tab sis tej poj niam hluas tseem yog cov uas ntsib kev ntxhov siab thiab kev nyuaj siab ntau tuaj ntxiv thiab.
Tej poj niam los kuj ua tau lub neej ntev ntxiv tuaj txog 85 xyoos piv rau tej txiv neej uas tsuas nyob ntev txog 83 xyoos xwb. Tab sis tseem muaj ntau yam ua rau tej poj niam tsis tau txais kev noj qab nyob zoo li khwv tau nyiaj hauj lwm tsawg dua, ntsib teeb meem nyuaj siab ntxhov plawv thiab ntsib teeb meem kub ntxhov hauv lub cuab yig (2.7 million tus). Txawm li cas los cov mob dementia suav cov Alzheimer nrog yog cov ua rau tej poj niam tas sim neej coob yuav laug txog ob npaug tib yam li tej txiv neej xyoo 2023 thiab.
Tsab ntawv cej luam no kuj qhia tias muaj tej poj niam tau siv cov kev txheeb thiab pab tu thiab pab yug me nyuam ntau tuaj ntxiv txog 79 feem pua uas pab lawv thiab lawv tej me nyuam ntau tuaj ntxiv kom tsis txhob raug teeb meem loj.
Lub koom haum Royal Australian College of General Practitioners tseem hais tias tej poj niam pheej tsis kub siab txog lawv tus kheej cov kev noj qab nyob zoo thiab pheej xub kub siab tu thiab saib xyuas lwm tus ntawm lawv tsev neeg ntau dua tu thiab saib xyuas lawv tus kheej, ces thiaj nqua hu kom tej poj niam kub siab mus ntsib kws kho mob ua kev tiv thaiv thaum tseem tau txais kev noj qab nyob zoo thiab kom tsis txhob poob nyiaj ntau ntev ntxiv tuaj thiab kom tej mob nkeeg tsis txhob ras los ua tej mob uas twb mob loj tuaj lawm.
Txawm li cas los lub koom haum AIHW yeej zoo siab tias tsoom fwv kuj tau pab nyiaj los pab tswj tej kev tsis coj khaub ncaws, cov kev noj tshuaj kom tsis txhob muaj me nyuam, kev tiv thaiv kom tsis txhob raug teeb meem kub ntxhov hauv lub cuab yig thiab yuav nrog xyuas kom txhuas tus poj niam thoob teb chaws Australia tau siv tej kev pab cuam no.
READ MORE
Poj niam cov kev noj qab haus huv
