Txheeb seb puas mob ntshav qab zib:
- Cov kev nqua hu kom mus txheeb seb puas mob ntshav qab zib thiaj tiv thaiv thiab kho tau thaum tseem ntxov.
- Kab mob ntshav qab zib yog hom mob ua rau neeg Australia tas sim neej coob ua zum 7 ntawm Australia.
- Yuav muaj lwm yam mob cuam tshuam li mob plawv, stroke, lim ntshav, mob raum, raug txiav tes txiav taw thiab qhov muag tsis pom kev.
- Ntshav qab zib yog tus mob raws caj ceg, roj ntsha, tej ib puag ncig thiab tej cwj pwm ua lub neej.
- Tau muaj kev nqua hu kom tsub se rau tej zauv mov dej haus daws ntsev daws zib kom neeg noj tsawg.
Tej kws paub zoo txog kev noj qab nyob zoo thiab kho mob tau nqua hu kom neeg Australia kub siab mus txheeb seb puas yog mob kab mob ntshav qab zib thaum tseem ntxov kom thiaj tiv thaiv thiab kho tau thaum tseem ntxov.
Justine Cain uas yog tus coj lub koom haum Diabetes Australia hais tias muaj ob hom mob ntshav qab zib li 'hom ib ces yog auto-immune uas tsis muaj xub ke kho; hom ob ces yog lub cev tsis tsim cov insulin vim muaj teeb meem cuam tshuam txog yus tej genes, caj cag keeb kwm mob, tej chaw ib puag ncig yus nyob thiab tej cwj pwm ua lub neej.'
Tab sis nws hais tias kuj muaj ntau yam cuam tshuam ntxiv dua ntawm tej zaub mov thiab tej cwj pwm ua lub neej. Nws thiaj koom nrog tej kws paub zoo tej mob nkeeg no qhua hu kom tsim dua tej xub ke tshiab los tiv thaiv Australia tej mob no.
Australian Bureau of Statistics tej xov xwm xyoo 2022 tau qhia tias tus mob ntshav qab zib yog tus mob zum 7 ua rau neeg Australia tuag coob tshaj plaws. Thiab tau 21 xyoo los no twb tau muaj neeg mob coob tuaj ntxiv yuav laug txog li 3 npaug (nce ntawm 460,000 tus mus ua 1.3 million tus) lawm.
Dr Michael Wright uas yog tus coj lub koom haum Royal Australian College of General Practitioners thiaj hais kom tej neeg kub siab mus txheeb thiab ntsuam tus mob no thaum tseem ntxov.
Dr Wright tau hais tias "Yeej muaj tej xub ke kho tus mob no ntawm Australia, thiaj tsis xav kom muab cov kev txheeb tus mob no ncua, vim yuav tsis muaj peev xwm lug tau ntau yam mob cuam tshuam uas ua rau mob ntev ntxiv tuaj.''
Nws hais ntxiv tias kom hloov tej cwj pwm ua lub neej thiab noj tej zaub mov muaj txiaj ntsim pab yus thiaj yuav tsis mob tus mob ntshav qab zib hom ob.
Nws hais tias ''nquag ua exercise, tswj yus tus ceeb thawj, hloov tej cwj pwm tsis tau txais kev noj qab nyob zoo los noj tej zaub mob pab kom yus tau txais kev noj qab nyob zoo tuaj ntxiv, tswj kom txhob mob ntshav siab, txhob mob ntshav kub roj, tsis txhob haus luam yeeb coj los ua kev tiv thaiv kom peb tsis txhob mob ntshav qab zib.''
George Institute for Global Health cov kev teeb txheeb tshiab yeej qhia tias yeej muaj qee yam cai pab kom tej neeg tsis txhob noj tej zaub mov daws ntsev daw zib ntau thiab txawb nqa kom tej neeg tig los noj tej zaub mov thiab txiv xyoob txiv ntoo de tau tshiab nrog rau noj tej noob qoob loo thiab noob txiv. Vim tej kws teeb txheeb tshawb tau tias lub caij 5 xyoos uas lawv teeb txheeb nrog Australia kaum txheeb yim ces pom tias tej nqe khoom noj kim ua rau lawv tsis xav yuav noj.
Ces Tasman Davies uas yog tus coj au cov kev teeb txheeb no thiab ua cov kev teeb txheeb no thiaj hais tias muaj peev xwm siv cov kev tsub se kim rau tej khoom noj khoom haum dawb ntsev daw zib thiab tsim tej cai txhawb nqa kom yuav tau tej khoom noj khoom haus tau txais txiaj ntsim pab rau lub cev ntau tuaj ntxiv.
Txawm tus mob no yeej mob tau rau txhua yam neeg nyob rau tej chaw sib txawv ntawm Australia, los neeg txum tim yeej yog cov mob coob tshaj plaws.
Lub koom haum Australian Institute of Health and Wellbeing hais tias Australia tej neeg txum tim muaj cib fim mob tus mob ntshav qab zib hom ob ntau dua 3 npaug piv rau tej neeg Australia uas tsis yog neeg txum tim thiab muaj cib fim txog 4 npaug yuav tas sim neej los ntawm tus mob no.
Thiaj ua rau Justine Cain uas yog tus coj ntawm lub koom haum Diabetes Australia tau taw qhia kom tej neeg sawv daws mus ntsib kws kho mob thiab ntsuam tus mob no kom ntxov npaum li cas ces haj yam yuav zoo npaum li ntawd rau yus.
Cain hais tias ''Peb xav txhawb nqa kom tag nrho txhua tus neeg Australia mus txheeb. Thiab muaj peev xwm txheeb tau ntawm lub koom haum Diabetes Australia lub vas sab seb yus puas mob thiab mus ntsib yus tus kws kho mob. Yeej txheeb dawb xwb thiab. Yog txheeb tau thaum tseem ntov ces kuj yuav muaj peev xwm tiv thaiv kom yus tsis txhob mob plawv thiab stroke yav lig ntawm yus lub neej. Peb thiaj xav txhawb nqa kom sawv daws kav tsij mus txheeb thiab nrog tej neeg kho mob tham.''
