Xov xwm luv tshaj tawm hnub zwj Teeb (Thursday news 25.09.2025):
Australia xav ua tswv cuab tswj lub rooj koom txheej COP31
Australia tus thawj pwm tsav Anthony Albanese yuav nrog Turkey tus coj tham rau hnub kawg uas nws mus koom UN lub rooj sab laj ntawm New York seb puas muaj peev xwm los koom nrog ntau lub teb chaws ntawm cheeb tsam hiav txwv Pacific los tswj lub rooj koom txheej COP31 no, vim tej teb chaws no yog cov yuav raug teeb meem tshaj plaws los ntawm tej xwm txheej huab cua phem thiab huab cua kub sov uas ua rau hiav txwv nce tshoom siab tuaj. Senator Sarah Hanson-Young thiaj hais tias cov kev ua tswv cuab no yuav pab kom Australia kub siab los ua tej hauj lwm no rau lub caij uas Meskas tso tseg tej hauj lwm no zuj zus lawm.
Suav tej hom phiaj txo tej greenhouse emission gas
Xi Jinping uas yog Suav tus thawj tsav meem (President) tau qhia txog nws tej hom phiaj yuav txo cov greenhouse gas emission (tej pa tsis huv) ntawm UN lub rooj sab laj tham txog huab cua pauv hloov. Xi tau hais ib co lus hauv video tias Suav uas yog ntiaj teb lub teb chaws tso tej pa no ntau tshaj plaws muaj hom phiaj los xyuas kom nws tej lagluam tso tej pa no tswv txog 7 feem pua txog rau xyoo 2035 li yuav siv khaub lig cua, phiaj ziab tshav tsim hluav taws xob siv thiab siv tsheb siv hluav taws xob siv.
Nws hais tias "Peb yuav tsum muaj kev ntseeg siab rau cov xwm txheej pab kom muaj tej pa tsis huv tsawg los yog txo kom muaj tsawg no rau lub caij uas muaj ntau lub teb chaws tau tawm tsam tsis pom zoo."
Goods and Services Tax (GST)
Xeev New South Wales tseem tab tom yuav los txiav txim siab tias seb nws puas yuav los txheeb cov kev sau cov GST tshiab li cas kom tau nyiaj rau nws lub xeev. Jim Chalmers uas yog tus nom tswj nyiaj txiaj rau tsoom fwv Albanese tau hais tias lub tuam chav Productivity Commission cov qauv uas siv coj los faib tej GST uas siv tam sim no thiab yuav los txheeb tej xeev cov kev txhawj xeeb txog tej cov kev sau se.
Australia xav kom ntiaj teb nrog Australia txwv tsis pub tej hluas hnoob nyoog qes dua 16 xyoo siv tej social media platforms
Australia tus thawj pwm tsav Anthony Albanese tau nqua hu kom ntiaj teb tsoom theej tswj ua li Australia ua uas los txwv tsis pub tej me nyuam hnoob nyoog qes dua 16 xyoo siv social media apps. Nws hais tias yog tej yam tsim nyog txwv los ntev lawm coj los pov puag tej me nyuam rau lub caij tseem ceeb uas lawv lub cev tseem loj hlob thiab lub hlwb tseem tab tom txhim kho.
Yuav txwv 10 tawm lub social media apps ntawm Australia
Yuav muaj ntau cov social media platforms yuav tau los txwv tej hluas siv lawv tej platforms. Lub koom haum eSafety Commissioner tau sau ntawv rau 16 lub tuam txhab social media taw qhia kom lawv tej platforms los txheeb thiab txwv tsis pub tej hluas hnoob nyoog qes dua 16 xyoo siv txij lub 12 hlis (2025) no mus. Ces thiaj yuav muaj tej social media app li Facebook, Instagram, TikTok, YouTube thiab X nrog rau tej gaming platforms li Roblox, Lego Play thiab Steam los kuj yog ib co uas yuav rau txwv thiab.
Lub qhov saus ntawm ib txoj kev hauv Bangkok
Muaj ib lub qhov loj heev cia li saus ntawm ib txoj kev hauv ntawm Thaib lub tuam ceeb Bangkok uas tau ua rau muaj ntau lub tsheb puas tsuaj, thiab ua rau tej ncej hluav taws xob puas thiab yuav tau tshem tej neeg tawm. Muaj tej yeeb yaj kiab (videos) uas pom ib txoj kev cia li maj mam sau zujzus rau hav av thiab rub tej ncej hluav taws xob thiab tej raj dej puas rau hauv lub qhov ntawd. Chadchart Sittipunt uas yog tus hau nroog Bangkok thiaj qhia tias muaj peb lub tsheb puas tab sis tsis muaj neeg nruam sim. Thiab nws qhia tias nom tswv Thaib ntseeg tias vim tseem khawb cov qhov kev tsheb ciav hlau hauv qab nroog ces thiaj ua rau muaj tej xwm txheej no.
Tej xwm txheej tua meskas cov tub ceev xwm tswj dej num tsiv teb tsaws chaw
Tau muaj ob tug neeg raug tua tuag thiab ib tug raug mob sab tom qab tau muaj ib co xwm txheej sib tua ntawm ib lub chaw ua hauj lwm tswj neeg tsiv teb tsaws chaw ntawm Dallas. Joseph Rothrock uas yog FBI ntawm Dallas thiaj hais tias nom tswv ntseeg tias tej xwm txheej no yog ib co xwm txheej tsim kev kub ntxhov xwb. Thiab Kash Patel tau sau ib co lus hauv X tias yeej muaj ib tsab xo tawm tsam Meskas cov neeg I.C.E.
Australia tus nom tswj dej num pej kum qhia txog Australia tsab cai txawv tswj dej num teb chaws
Penny Wong uas yog Australia tus nom tswj dej num txawv teb chaws tau qhia txog Australia tus tsoom fwv tej cai txog cheeb tsam Middle East thaum tau nrog SBS World News tham, Senator Penny Wong thiaj tau qhia meej tias Australia yeej yog ib lub teb chaws ntawm ntau lub uas tau xa tej khoom siv coj mus tsim cov dav hlau F-35s rau Lockheed Martin uas tej technology tub rog no yog tej uas Australia tej kws kho mob ntawm Gaza hais tias tau ua rau muaj teeb meem heev rau Gaza tej pej xeem.
AI data thiab Australia tej neeg ua hauj lwm
Lub koom haum Atlassian cov kev teeb txheeb tshiab uas tau mus teeb txheeb nrog neeg Australia ua hauj lwm tshaj 12,000 tus ces pom tias muaj Australia tej neeg ua hauj lwm no txog li peb npaug yeej tau siv cov artificial intelligence (AI) tools los pab kom lawv txuag tau sij hawm.
Australia lub fwj chim ntawm cheeb tsam Southeast Asia
Raws li Lub chaw teeb txheeb Lowly Institute cov kev teeb txheeb hu ua Asia Power Index 2025 qhia ces Australia yog lub teb chaws zum 4 uas muaj fwj chim ntawm cheeb tsam Southeast Asia tom qab uas Meskas lub fwj chim tsuag zujzus lawm.
ABC tus managing director cov kev thov txim
Hugh Marks uas yog ABC tus managing director tau thov txim rau nws tej neeg ua hauj lwm thiab zej tsoom tom qab lub chaw nthuav xov xwm no raug Federal Court nplua $150,000 vim tau muab nws tus neeg nthuav xov xwm ABC Radio's Sydney's Morning program rho tawm hauj lwm vim nws tau share lub koom haum Human Rights Watch ib qho post txog Gaza.
Tshuaj kho mob Alzheimers
Therapeutic Goods Administration (TGA) uas yog Australia lub koom haum tswj tej tswj kho mob thiab tshuaj kho mob tau pom zoo muab cov tshuaj Lecanameb uas kho tus mob Alzheimers uas mob thaum tseem ntxov coj los muag rau tej neeg siv. Tab sis tus tshuaj no yuav muag raws lub npe Leqembi.
Thaib cov kev xiab nyiaj rau cov txheej txheem teev pej xeem
Thaib pawg rooj saib xyuas tej nom tswv zos tau qhia tias nws tab tom mus tshuaj ntsuam xyuas ib co xwm txheej uas tau muaj lub iab liam tias tau muaj neeg muab nyiaj xiab nyiaj rau tej txheej txheem teev pej xeem raws li Bangkok Post qhia.
