Xov xwm luv tshaj tawm ntawm limtiam rau hnub zwj Quag (Weekly wrap for Tuesday 09.09.2025):
Australia cov kev pom zoo Nakamal Agreement nrog Vanuatu
Hnub no ces thawj pwm tsav Anthony Albanese yuav mus rau Vanuatu mus ntsib thawj pwm tsav Jotham Napat ua ntej mus koom lub koom txoos Pacific Islands Forum ntawm Solomon Island. Ob tug coj yuav sab laj txog cov kev kho kev ruaj ntseg thiab kev sib raug zoo lagluam raws cov kev pom zoo Nakamal Agreement uas tau sib khom tau ntau hli uas Australia yuav nqes peev $500 million los tsim cov data centres thiab security infrastructure rau lub caij Suav tuam tshoj xav kom nws muaj fij chim ntau tuaj ntxiv rau cheeb tsam Pacific.
Cov kev teeb txheeb txog qub tub rog
Lub koom haum Australian Institute of Health and Welfare cov kev teeb txheeb qhia tias tau muaj Australia tej qub tub rog cov kev txov txo tus kheej txoj sia ib nyuab tsawg zog. Raws li tej xov xwm tshiab tau qhia hnub no pom tias xyoo 2023 muaj 73 tug qub tub rog txov txo lawv txoj sia ces thiaj ua rau muaj tej qub tub rog txov txo lawv tus kheej txoj sia tshaj 1,800 tus txij xyoo 1997 uas tau teev tej xwm txheej no los.
Cov kev nqua hu kom Fabkis tus thawj tsav meem tawm nom
Tau muaj cov kev nqua hu ntau tuaj ntxiv kom Fabkis tus thawj tsav meem (President) Emmanuel Macron tawm nom tom qab tau muaj cov kev tawm tsuab tsis tso siab rau nws tus thawj pwm tsav Francois Bayrou, ces thiaj tau ua rau muaj teeb meem laj fai kum xeeb tuaj ntxiv thiab ua rau nws yuav tua nrhiav ib tug thawj pwm tsav zum 5 los ua nom rau lub caij tsawg dua 2 xyoos.
Cov kev tu tsom kom tej laus ntawm tsev
Mark Butler tau qhia rau lub chaw nthuav xov xwm National Press Club tias tau pom zoo tsim 20,000 cov kev pab tu tsom kwm tej laus ntawm tsev txij tam sim no txog tim 31 lub 10 hli ntuj no uas tej zaum yuav ua rau muaj teeb meem rua nws tej nyiaj puag xyoo.
Israel cov kev tawm tsam nroog Gaza City
Benjamin Netanyahu uas yog Israel tus thawj pwm tsav tab tom ceeb toom kom neeg Palestinians ntawm Gaza City tsiv tawm rau lub caij nws yuav tawm tsam lub nroog no kom hnyav tuaj ntxiv rau ntau hnub ntxiv no.
Kab mob raws plab
Nom tswv Cob tsib lub tuam chav tswj dej num noj qab haus huv ceeb toom tias tsam muaj tus kab mob raws plab kis tau txawv teb chaws rau nws lub teb chaws tom qab ntiaj teb lub koom haum tswj dej num noj qab haus huv tau qhia tias txij xyoo 2025 los no twb muaj tej neeg tshaj 400,000 tus ntawm 31 lub teb chaws thoob ntiaj teb tau tus mob no raws li Tuoitre News tau qhia.
Kaus Lim lub chaw ntoj ncig ntawm Phonghong
Nplog phau ntawv xov xwm The Laotian Times tau tshaj tawm tias nom tswv Nplog tau muab 500 hectares av rau Kaus Lim qab teb ib lub tuam txhab yuav tsim ib qho chaw ntoj ncig ntawm Phonghong ntawm xeev Vientiane uas yuav siv nyiaj txog li ntawm $USD 3 billion thiab ua tiav rau xyoo 2045 coj los txhawb nqa lagluam thiab kev ntoj ncig.
Txheeb seb Thaib tus thawj pwm tsav tshiab puas muaj cai ua nom
Tau muaj Thaib lub koom haum tawm tsam cov kev lwg noj lwg haus tau liam tias Thaib tus thawj pwm tsav tshiab muaj feem rau cov kev sib txeeb av thiab cuam tshuam nrog tsev kis xeev siab tej txheej txheem xaiv nom tom qab uas Anuthin Charnvirakul raug xaiv los ua Thaib tus thawj pwm tsav tshiab tom qab uas Thaib lub tsev txiav txim plaub ntug txhooj cai tshwj haiv tau rho Paetongtarn Shinawatra tawm tsis pub ua nom raws li Bangkok Post tau qhia.
