Meskas tus coj uas yog President Donald Trump tau ncaim ntawm rooj sab laj G7 ntxov rov qab mus rau tuam ceeb Washington uas Fabkis tus coj Emmanuel Macron hais tias tej zaum nws yuav xyuas kom xaus tau tsov rog ntawm Israle nrog Iran, tab sis Mr Trump hais tias nws muaj hauj lwm tseem ceeb tshaj qhov Fabkis tus coj hais.
Ces thiaj tau muab cov kev yuav sib tham nrog Australia tus thawj pwm tsav Anthony Albanese ncua. Txawm li cas los Mr Albanese kuj tau nrog Meskas tej nom theem siab tham, uas Kavin Rudd uas yog Australia tus ambassador qhia tias tau tham txog lagluam, tariffs thiab tej minerals tseem ceeb.
Mr Albanese hais tias ''Peb yeej yuav tham txog ntau yam nrog President Trump li nom tswv Australia thiab Meskas tau tham txog ntau yam.''
G7 tej coj thiaj nqua hu kom loas daws tej kev tsis sib haum xeeb ntawm Iran thiab Israel kom tsawg tsam ras kis toj kis pes tuaj.
Thiaj ua rau Askiv tus coj uas yog Keir Starmer hais tias ''G7 tej coj yeej muaj kev txhawj xeeb txog tej xwm txheej tsis haum xeeb ntawm ob lub teb chaws no thiab txhawj txog Iran cov nuclear program thiaj xav kom kub siab daws tej xwm txheej no.''
Txawm li cas los raws li Reuters tshaj tawm ces Meskas kuj tau xa ib co dav hlau tua rog li F16, F22 thiab F35 mus ntxiv rau tej nws muaj ntawm Middle East lawm thiab. Meskas tus President hais tias ''lawv paub tias Iran tus coj nkaum qhov twg tab sis tseem yuav tsis tau tua nws tam sim no''. Ua ke no los Iran tus coj kuj sau ntawv hauv nws phau X account thiab yuav ''tsis txuag Israel'' tom qab ob lub teb chaws no sib tawm tsam yuav laug txog ib limtiam no.
Txawm li cas los Askiv yeej qhia tias Askiv thiab Meskas yuav los ua cov hauj lwm AUKUS nuclear submarine no txawm tias Askiv thiab Meskas tau los txheeb cov kev pom zoo no.
Mr Albanese thiaj hais tias ''Kuv yeej tau pom tej lus tawm tswv yim ntau yam ntawm Australia thiab Meskas thiab ntawm Askiv tias cov kev pom zoo AUKUS no tsis yog yuav tau txais txiaj ntsim theem ib xwb tab sis tseem yuav tau txais txiaj ntsim theem ob thiab.''
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follow los yog lwm cov podcasts platforms (iHeart, Amazon Music & Podcasts).
