Xov xwm luv tshaj tawm hnub zwj Feej (Wednesday news 18.06.2025):
Ukraine tau nqua hu UN Security Council tias kom npaj ib lub rooj sab laj sai los tham tom qab Russia tau tua foob pob rau nws lub nroog Kyiv thiab lwm cov nroog ua rau muaj 12 tug neeg tas sim neej. President Volodymyr Zelenskyy thiaj muab ib hnub ua hnub tu siab rau tej xwm txheej no thiab qhia tias yuav tsis kam sib khom nrog Russia tsuas yog Russia xaus tsov rog xwb. Mark Carney uas yog Canada tus coj thiaj cog lus yuav pab nyiaj yuav laug txog li AUD 3 billion rau Ukraine tej tub rog. Meskas kuj tau koom nrog G7 tej coj yuav tsub nias Russia.
Australia tus thawj pwm tsav Anthony Albanese tau ntsib nom tswv Meskas theem sib ntawm rooj sab laj G7 tom qab Meskas tus President Donald Trump tau ncua tsis nrog nws tham thiab tau ncaim lub rooj sab laj no ntxiv vim tej xwm txheej kub ntxhov ntawm Middle East. Txawm li cas los Mr Albanese tau ntsib Meskas tej nom tseem ceeb uas Kevin Rudd uas yog Australia tus qub thawj pwm tsav dhau los thiab yog Australia tus ambassador ntawm Meskas hais tias yeej tau tham txog lagluam, tej tariff thiab tej peev txheej minerals tseem ceeb. Thiab nws kuj tseem yuav nrog Germany, Japan, UK thiab EU tus coj tham txuas ntxiv.
Penny Wong uas yog Australia tus nom tswj dej num txawv teb chaws tau txwv lagluam rau Russia 60 lub nkoj ua thawj zaug. Senator Wong hais tias tej nkoj no siv tej chij txawv kom tsis txhob raug txwv thiab siv tej system kom tsis txhob nrhiav tau lawv. Tej no thiaj yog ib feem ntawm Canada, UK thiab EU ua kom Russia tsis txhob tau nyiaj muag rog thiab ua kom nws cov lagluam tsis muaj zog lub caij nws tseem ua rog. Tsoom fwv Australia thiaj nqua hu kom Russia cia li xaus rog thiab tsim kev thaj yeeb.
Reuteurs tau qhia tias Meskas tau xa ib co dav hlau tua rog li F16, F22, thiab F35 mus rau Middle East mus pab tej twb muaj ntawm cheeb tsam no rau lub caij tseem ua tsov rog ntawm Israel thiab Iran muaj ceem tuaj ntxiv no.
Jim Chalmers uas yog tus nom tswj nyiaj txiaj rau tsoom fwv tau qhia txog nws 5 co hauj lwm tseem ceeb (1) tsis tso pa tsis huv ntxiv, 2) tsim tau cov kev kho mob zoo siv, 3) xyuas kom tswj tau tej data zoo, 4) xyuas kom khwv tau nyiaj puag xyoo tsam, thiab 5) xyuas kom tej lagluam ntxeem dhau tej xwm txheej nyuaj) yog cov hauj lwm tseem ceeb uas nws tus tsoom fwv yuav ua thaum nws los nrog lub koom haum National Press Club tham hnub no (18.06.2025) tham kom muaj peev xwm pab tau tej lagluam loj hlob rau lub caij uas tau kwv yees tias ntshe nws tej nyiaj puag xyoo yuav poob peev. Txawm li cas los nws hasi tias cov kev kho Australia tej se yog ib co tseem ceeb yuav pab daws tau ntau yam teeb meem nyuam muaj rau Australia tej lagluam.
Nom tswv Nplog lub chaw kwv yees huab cua tau muaj kev ceeb toom rau lub limtiam no tias kom zej tsoom Nplog xyuam xim ceev faj tsam muaj nag xob nag cua thiab dej nyab. Ua ke no los ntiaj teb lub txhab nyiaj kuj pom zoo tshwm nyiaj yuav laug txog li USD 40 million dollars pab Nplog lub tuam ceeb tswj tej khoom seem txheej, tej roj hmab thiab tej cua tsis huv.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follow los yog lwm cov podcasts platforms (iHeart, Amazon Music & Podcasts).
