Xov xwm luv tshaj tawm hnub zwj Quag (Tuesday news 23.09.2025):
Australia cov kev lees paub teb chaws Palestine thiab tej lus tawm tswv yim
Australia tau lees paub teb chaws Palestine ntawm UN rau lub ciaj uas Canada thiab Askiv tseem yuav nrog ntau lub teb chaws los lees paub ntxiv. Cov kev txiav txim siab no thiaj ua rau Australia yog ib lub teb chaws ntawm 140 ntawm 193 lub uas tau lees paub lub teb chaws no. Thawj pwm tsav Anthony Albanese tau qhia cov kev lees paub no ntawm New York hnub zwj Hnub (Sunday) tim 21 lub 9 hli ntuj dhau los tias:
"Tsoom fwv Australia lees paub teb chaws Palestine. Peb yeej tau qhia los ntev tias peb ob pab nom tseem ceeb yuav pab tsim ob lub teb chaws. Ua yog teb chaws Israel thiab Palestine, thiab cov kev lees paub uas tau qhia hnub no uas koom nrog peb tej teb chaws phooj ywg pej kum haiv, li Askiv thiab Canada, txhais tias yog peb lub teb chaws ntawm lub koom haum Five Eyesuas tab tom txiav txim siab hnub no.''
Australia tus coj kuj tau koom nrog Fabkis los qhia tias lees paub lub teb chaws Palestine ntawn UN thiab caw kom Fabkis tus coj tuaj xyuas Australia.
Txawm li cas los kuj muaj 25 tug nom Republicans hais tias yuav siv ib co tswv yim rau txim rau tej teb chaws lees paub teb chaws Palestine. Pab nom no kuj muaj Ted Cruz uas yog tus neeg sib tw ua US President dhau los thiab uas hais tias tej teb chaws no cov kev lees paub Palestine ces yog cov kev pub khoom plig rau tej neeg phem xwb. Sussan Ley uas yog tus coj ntawm lwm pab nom teb chaws tau sau ntawv rau Meskas ib co nom thaib hais tias cov kev txiav txim siab lees paub Palestine tsis yog cov kev xav feem coob ntawm teb chaws Australia, thiab tau qhia rau lub chaw nthuav xov xwm tshooj 9 tias yeej muaj cov kev ntsuam zej tsoom cov kev xav August Resolve poll pom tias 44 feem pua ntawm tej neeg ntseeg tias tsis tsim nyog lees paub Palestine uas qhia tias Albanese cov kev txiav txim siab no yuam kev lawm.
"Nws (Albanese) niam tham muaj ceem kawg, tab sis ua tsis tau dab tsi, tsuas ua rau muaj teeb meem rau neeg Australia xwb. Nws cog lus tias yuav sib khom kev ruaj ntseg nrog Vanuatu twb ua tsis tau. Tau cog lus tias yuav tsim kev pom zoo tug rog nrog PNG twb ua tsis tau. Tsam no lws cav tias cov kev lees paub Palestine yuav pab tso tej neeg raug txhom thiab tsim kev thaj yeeb rau tsheeb tsam (Middle East) no. Peb sawv daws yeej xav kom xaus tsov rog, tab sis cov kev lees paub no ua rau xaus tej txheej txheem tsim kev thaj yeeb xwb."
Askiv ceeb toom kom tsis txhob txeeb tej av ntawm West Bank
Askiv tus nom txawv teb chaws tau ceeb toom rau Israel tias kom tsis txhob txeeb tej av nws tswj ntawm West Bank coj los ua kev pauj rau Askiv cov kev lees paub teb chaws Palestine. Benjamin Netanyahu uas yog Israel tus thawj pwm tsav tau tsis pom zoo nrog Keir Starmer uas yog Askiv tus thawj pwm tsa cov kev lees paub lub teb chaws no thiab muaj tej teb chaws ntau tshaj 150 lub lees paub suav Canada, Australia, Portugul nrog.
Tej koom haum pab tej neeg txom nyem
Tej cuab yig txom nyem tig mus qev tej nyiaj ntawm tej koom haum pab cuam coj los yuav tej khoom siv ua neejt xhua hnub rau lub tsam thawj nqe siv ua lub neej kim txuas ntxiv. Lub koom haum Goo360 Australia cov kev teeb txheeb txheeb tau tias 82 feem puas ntawm tej koom haum pab cuam qhia tias muaj tej neeg xav tau kev pab ntau heev, thiab muaj 69 feem pua hasi tias lawv muaj tej khoom tsis txaus pab rau tej neeg raws li qhov lawv xav tau.
Tshuaj Paracetamol thiab tus mob Autism
Robert Kennedy Jr uas yog Meskas tus nom tswj dej num noj qab haus huv ntau cav tias muaj feem cuam tshuam ntawm cov kev noj tshuaj paracetamol (Tylenol) rau lub caij muaj me nyuam ua rau mob Autism thiab Meskas tus President los kuj tau hais kom hloov cov kev taw qhia rau cov kev noj tej tshuaj no tshiab. Txawm li cas los TGA (Theraputic Goods Administration) tau qhia tias no me ntsis tswj ua npaws xwb yeej tsis muaj teeb meem dab tsi raws li ABC News tshaj tawm.
Australia cov kev tsis tau ntsib Meskas tus coj tsis tshua tseem ceeb dab tsi
Tsoom fwv Australia hasi tias Australia tus thawj pwm tsav Anthony Albanese cov kev tsis tau ntsib Meskas tus coj Donald Trump ntawm UN ntawm New York tsis tseem ceeb dab tsi. Thawj pwm tsav yeej npaj ntsib Trump thaum mus koom G7 summit ntawm Canada tab sis tau muab ncua vim tej teeb meem kub ntxhov ntawm Israel nrog Iran ntawm Middle East.
Optus tej xwm txheej siv tsis tau cov emergency services
Optus raug lub koom haum tswj tej cai tswj cov tuam txhab telecommunication txheeb tau tias tau rov qab muaj cov xwm txheej uas muaj 7 tus neeg tsis muaj peev xwm siv tau tus xov tooj triple-zero (000) limtiam dhau los no thaum siv tsis tau nws cov network. Phau ntawv xov xwm the Guardian tau qhia tias pab neeg no tau qhia txog tej xwm txheej no tom qab txheeb Optus cov reviewed call logs.
Cob tsib tej lagluam yav pem suab
Raws li RMIT university ntawm Cob Tsib tau qhia ces yuav tsum tau ua cov lagluam start up kom ntau tuaj ntxiv thiaj pab tau Nyab Laj tej lagluam kom zoo tuaj ntxiv. Ua ke no los kuj muaj lub khaub zeeg cua Ragana ntawm Philippines yuav los rau teb chaws Nyab laj qaum teb mus rau Nplog ntawm tuam ceeb Vientiene rau sab qaum teb thiab raws li Tuoitre News qhia.
Kawm qib siab thiab hluav taws xob siv
Xyoo no ces muaj Nplog tej tub kawm yuav laug txog li 3,400 tus kawm tiav qib siab, tshaj 60 tawm tus kawm tias PhD, txog li ntawm 400 tus kawm tiav Master thiab yuav laug txog 3,000 tus kawm tiav Bachelor degree.
Ua ke no los Nplog lub tuam txhab muag hluav taws xob Electricity du Laos (EDL) tau qhia tias npaj yuav hluav taws xob kom tau 500 megawatt kom thiaj txaus rau tej neeg cov kev xav siv hluav taws xob ntau tuaj ntxiv thiab raws li Vientiane Times tau tshaj tawm.
Khaub thuas thiab kab mob npaws yoov
Thaib lub tuam chav tswj dej num noj qab haus huv tau ceeb toom txog cov kab mob khaub thuas ua tsis taus pa thiab tej kab mob npaws yoov tshaj cum kom sawv daws ceev faj rau lub caij huab cua kub sov thiab ntuj los nag raws li Bangkok Post tshaj tawm.
