Xov xwm luv tshaj tawm hnub zwj Feej (Wednesday news 10.09.2025):
Israel cov kev tawm tsam Hamas ntau cov chaw ntawm Doha
Israel tau tawm tsam Hamas ntau thaj chaw ntawm Doha ntawm teb chaws Qatar tau ua rau muaj 6 tus neeg raug tua thiab tau ua rau ntau cov teb chaws phooj ywg pej kum thiab tej teb chaws nyob ze tsis txaus sib. Israel qhia tias nws yog tus tawm tsam, tab sis Badr Abdelatty hais tias yog tej yam qhia tias Israel yeej tsis kub siab thiab tsis xav siv kev nom tswv los kho kom xaus tau tsov rog.
Caroline Levitt uas yog tsev dawb tus neeg nthuav xov xwm tau qhia tias Pentagon yeej tau qhia rau tsoom fwv Trump paub txog tej xwm txheej no ua ntej Israel yuav tawm tsam tej chaw no, thiab Mr Trump yeej tau nrog Benjamin Netanyahu tham tom qab tau muaj tej xwm txheej no.
Tshuaj vaccine hno dais Koala
Lub koom haum Australian Pesticides and Veterinary Medical Authority tau tso cai pom zoo siv ib cov tshuaj vaccine uas tej kws teeb txheeb ntawm tsev kawm qib siab University of Sunshine Coast teeb txheeb los tau ntev tshaj 10 xyoo coj los pov puag Australia tej tsiaj uas muaj neeg nyiam heev uas tej zaum yuav tu noob.
Tej vaj tse muaj peev xwm yuav tau nyob
Tau muaj ib co kev tshuaj ntsuam tshiab tau txheeb tau tias tej neeg yuav tsev thawj zaug muaj ntau txoj kev xaiv yuav tsev thaum tsoom fwv nrog xyuas kom siv tau cov nyiaj zoj yuav tsev siv tau nthuav dav tuaj ntxiv, tab sis ib txhia kiab khw lagluam vaj tse hais tias ntshe cov program no yuav ua rau tej neeg no haj yam tsis muaj peev xwm yuav tsev nyob. Cotality tej xov xwm tau qhia tias ob feem peb ntawm tej tsev yuav laug txog li 5000 lub uas yog tej tsev thiab tej units tam sim no uas muaj peev xwm yuav tau raws cov Home Guarantee Scheme ntawd yuav pab kom tej neeg muaj cai yuav tsev tsuas tau zoj nyiaj 5 feem pua yuav tsev thiab tsis tau them cov lenders mortgage insurance.
ICC rooj plaub cuam tshuam txog Joseph Kony
International Crimminal Court - ICC (Pej kum haiv lub chaw hais plaub) tau tab tom hais ib rooj plaub txog Joseph Kony uas raug liam tias yog tus tau ua txhaum ntau cov kev txhaum war crimes uas tseem txhom tsis tau tau nws. Leonie von Braum uas yog ICC tus kws lij choj thiaj hais tias yuav coj tej pov thawj los qhia tau qhov tseeb tias Kony tau oj nws pab tub rog Lord's Resistance Army uas raug teeb tsa yav lig xyoo 1980s muaj hom phiaj ntxeev tsoom fwv tau ua phem rau neeg Uganda yuav laug txog 20 xyoo rau lub caij nws tseem sib ntaus sib tua thiab teeb tsa nws tej tub rog sab qaum teb ntawm lub teb chaws no.
Tej neeg kho mob ntawm NSW
Lub koom haum Bureau of Health Information tsab ntawv cej luam Healthcare Quarterly Report tau txheeb tau tias muaj tej neeg ntau tshaj 500,000 tus rau coj mus kho mob ntawm tej tsev kho mob txij lub 4 hlis ntuj txog lu 6 hli ntuj 2025, uas muaj tej neeg yuav laug txog li 65,000 tus yog cov elective surgeries thoob lub xeev no.
Australia tej nyiaj siv tsim cov nkoj siv hauv dej
Tsoom fwv teb chaws Australia tau kos xyem mem tes nrog lub tuam txhab Anduril Australia raug nyiaj txog $1.7 billion los tsim ib co nkoj thiab tsim ib co nkoj siv hauv dej hu ua Ghost Sharks. Lub tuam txhab no twb tau siv nyiaj txog li $140 million los tsim cov chaw Ghost Shartk platform, payloads thiab production facilities lawm.
Vingroup coj ntau caum lub koom haum thiab tej neeg ntiag tug mus hais plaub
Cob tsib lub tuam txhab Vingroup tau coj tej tuam txhab yuav luag txog 70 lub thiab tej neeg ntiag tug ntawm Southeast Asia mus hais plaub liam tias lawv tau nthuav tej xov xwm cuav txog nws lub tuam txhab tej khoom nws tsim, nws tej nyiaj txiaj nws tej legal status thiab tej xov xwm ntiag tug ntawm nws tus coj raws ku Tuoitre News tau qhia.
Ntsa thaiv ntuj dej Mekong ntawm tuam ceeb Vientiane
Nom tswv Nplog tau qhia tias nws ua tus ntsa thaiv ntug dej Mekong tiav ze txog li ntawm 90 feem pua lawm. Tau kwv yees thaum xub tias yuav ua kom tiav lub 6 hli ntuj xyoo 2025 raws li Vientiane Times qhia.
Thaksin raug kaw ib xyoos
Thaib lub tsev hais plaub Supreme Court tau txiav txim rov qab muab Thaib tus qub thawj pwm tsav Thaksin Shinawatra kaw tsev laj cuj 1 lub xyoos vim nws pom tias nws cov kev muaj mob rau lub caij raug kaw tsis yog ib cov kev muab nws kaw tiag raws li Bangkok Post tau tshaj tawm.
