Dr. Prayath Nanthasin los sis yog Dr. Xiong Yang, yog tus tswj lub koom haum Hmong Bangkok Network and Associate tau hais tias yuav muaj ntau yam ua rau lub koom txoos Hmong Bangkok Festival xyoo 2018-2019 no.
Thawj yam ces yog ua lub koom txoos no los qhia txog Hmoob tej kab lis kev cai, kev cai dab qhuas, Hmoob txoj kev ua lub neej thiab Hmoob keeb kwm teej tug rau lwm tus paub tias Hmoob yeej yog ib cov neeg muaj kev vam meej thiab tsis yog ib cov neeg poob qab li lwm tus xav.
Nqe ob tuaj yog cov kev sib tw ntxhais nkauj ntsuab Miss Hmong Thailand xyoo 2019. Tam sim no muaj tshaj 30 leej teev zwm npe mus sib tw lawm. Dr. Yang qhia tias tej zaum xyoo tshiab tom ntej no yog ua ntxiv ces mam sab laj seb pawg tim tseeb (Committee) puas pom zoo tso cai rau lwm lub teb chaws uas muaj Hmoob nyob mus koom tau li cas thiab.
Ntxiv ntawd kuj yuav muaj Hmoob cov neeg nqua yas suab ntau pab tsis hais hauv Thaib teb los sis txawv teb chaws tuaj koom thiab ua kev lom zem rau cov neeg mus koom kev lom zem ntawd thiab. Tab sis yuav tau tshwm dej siab teev npe kom tau ib lub rooj rau 8 leej zaum uas yuav muaj ntau yam zaub mov thiab dej rau sawv daws haus.
Thaum tham txog lub chaw teeb txheeb Hmong Study Center ntawm teb chaws Thaib lawm, ces Dr. Nanthasin tau hais tias yog ib qho tseem ceeb heev yuav tsum tau muaj thiab ua kom tau. Yuav yog ib lub chaw siv coj los teeb txheeb ntau yam teeb meem cuam tshuam txog Hmoob lub neej txhua tsav yam pib txij li kev ua lub neej, keeb kwm, kab lis kev cai dab qhuas, kab tshoob kev kos, los yog lwm yam kev cai mus txog rau Hmoob tej lus tej ntaub ntawv, tej keeb kwm tej tsoos ris tsoos tsho, Hmoob tej suab txuj paj nruag txhua yam paj huam lus txhiaj txhais mus txog rau kwv txhiaj los sis yog txhua yam txog Hmoob uas tej poj koob yawm txwv yeej tau tso tseg rau Hmoob tej xeeb leej txeeb ntxwv los tau ntau txheeb xyoo kom txhob plam txhob ploj mus, kom muaj peev xwm siv tau cov kev teeb txheeb no coj los pab tsim kom tau tej cai los pov puag txhawb nqa thiab kom tau txais txiaj ntsim rau tsev neeg Hmoob hauv Thaib teb.
Ib nqe lus tseem ceeb tshaj plaws uas Dr. Prayath Nanthasin xav hais rau ib tsoom Hmoob thoob qab ntuj yog los tias:
"Pav tsua kwv tij Moob suav dlawg tas, txawm mej ua dlab tsi nyob qhov twg los mej taab tom coj lub npe has tas yog Moob. Nyob ntawm mej tus khej has tas yog mej ua zoo tes luag kuj qhuas Moob, Yog mej ua tsis zoo tes luag kuj thuam Moob le hov xwb od. Tes txhua txhua leej Moob tsis has leej twg le yog tug sawv cev ntawm peb Moob no ntag nawb. Yog peb suav dlawg ua zoo tes peb lub meej mom has peb lub koob lub npe yeej los yuav zoo tuaj, tab sis yog peb muaj tej quas leej xwb, txawm tsawg tsawg leej los ua tsis zoo xwb tes yeej los ua tsua peb taag nrho yeej los xiam taag le, tes thov mej suav dlawg xaav has tas txhua txhua nub kws mej ua noj ua haus hab mej ua lub neej nyob yuav tsum xaav txug qhov nuav has tas yam kws mej ua mej has txhua txhua yaam tsis yog yuav muaj teeb meem tsua mej tib leeg xwb taab sis muaj tsua peb cov Moob taag nrho le nawb. Qhov nuav peb yuav tsum xaav txug qhov nuav."
Dr. Prayath Nanthasin kuj tau qhia txog tias Dr. Mai Na Mee Lee ntawm University of Wisconsin yeej tau qhia rau nws tias tam sim no muaj neeg Suav muab Hmoob cov paj ntaub coj mus teev zwm hauv ntiaj teb kub koom haum teej tug ntawm ib cov neeg twg lawm. Ntev ntxiv mus yog tsis kub siab los teeb txheeb thiab teev zwm txog Hmoog teej tug, ces txhua yam yuav raug mab suab txeeb mus thiab yuav lam rau luag tag. Yuav tsis muaj cai siv tau, txawm siv tau los ntshe yuav tau poob nyiaj txiag rau tej khoom uas twb yog yus ntiag tug li tab sis vim yus tsis kub siab khws thiab coj mus teev zwm hauv ntiaj teb kom yus muaj cai siv tau thiab txhob muaj neeg txeeb coj mus ua lawv li ces ntshe thaum ntawv yuav hnav yuav nqua yas suab xwb los yuav tau them luag ua ntej tso txawm tias yam ntawd twb yog yus li tiag tiag yog yus tsis kub siab los pov puag yus teej tug tiag. Tsuas tshuav tib txoj hauv kev lawm xwb uas yuav tau mus nrog ntiaj teb lub tsev txiv txim plaub ntug sib hais thiab siv cav tias yam mab sua muab coj los ua lawv tug tias lawv muaj cai (copy rights, patent) ntawd yeej yog yus li thiab muaj peev xwm muab tau tej ntaub ntawv teeb txheeb txog qhov tseeb coj los qhia tias yeej yog Hmoob tug tiag mas thaum ntawd luag mam txiav txim seb yus puas muaj cai yuav siv tau los ua Hmoob tug ntxiv lawm xwb.
Tab sis Hmoog yuav tsum tau muaj ib cov nom sawv cev rau pej xeem (Member of Parliament) mus nrog nom tswv Thaib ua nom hauv tsev tsoom hwv (Parliament) thiab, mas luag thiaj kub siab txog yus thiab luag thiaj mloog yus cov kev txhawj xeeb thiab paub tias Hmoob xav tau txais kev pab cuam pov puag dab tsi los sis tej cai tsim tau los ntawd puas haum rau Hmoob siv li cas kom muaj tus nrog hais nrog txheeb nrog xyuas. Tam sim no ces Hmoob tab tom npaj ib cov neeg yuav mus ua nom li hais no lawm thiab raws li Dr. Yang tau qhia.
Thiab lub koom haum Hmong Bangkok Network and Associate yeej tau xa cov MOU (Memorandum of Understanding) mus rau txhua Hmoob lub koom haum hauv teb chaws Thaib tsis hais Hmong Missionary Christian, Hmong Trade Union, Hmong Thailand Association thiab Hmong 18 clans Society nrog rau lwm cov koom haum kom los sib pab nrog xyuas cov kev teeb txheeb no. Kom thiaj li muaj peev xwm tsim tau Hmoob tej neeg txawj txeeg muaj txuj ci thiab muaj neeg ua luam ua tuam los pav muaj txiaj nplua nuj li lwm tsav neeg hauv tebchaws Thaib mas luag thiaj yuav saib Hmoob rau nqe. 2 nqe lus no yog 2 lub hom phiaj tseem ceeb heev ntawm lub koom haum Hmong Bangkok Network and Associate raws li Dr. Xiong Yang tau qhia rau SBS Radio Hmong Program.
Yog li ntawd dua ntawm cov kev koom tes ntawm Hmoob tej koom haum hauv Thaib teb ua ke lawm tseem yuav tau koom tes nrog ntau lub teb chaws li Suav tuam tshoj, America thiab Germany los teeb txheeb txog Hmoob teej tug ntxiv thiab.
