COV LUS THEEJ LOS NTAWM ZAJ XOV XWM NO:
Txhua xyoo twg, ces yeej muaj Australia tej hluas uas kawm tiav xyoo 12 mus holiday thiab ntoj ncig txawv teb chaws, li lo lus sawv daws paub tias yog ''schoolies''.
Nws yog caij pib ua tej yam tshiab rau tej hluas, uas tej niam txiv yuav tau thov tswv ntuj pab kom lawv tau txais kev nyab xeeb.
Yog hais txog Michelle Jones, uas nws tus ntxhais Bianca yeej tsis tau rov qab los tsev thaum tau mus ntoj ncig tebchaws Nplog, ces kuj yog tej yam ua rau nws zoo siab thiab tu siab thiab.
"Zoo li tseem yog tej yam xwm txheej tshwm sim tshiab tshiab xwb, tshwj xeeb yog thaum lub caij kuv tus ntxhais mus rau ntawm qhov chaw tawm mus txawv teb chaws uas peb tau hais sib ntsib dua. Yog mas, tseem yog ib co xwm txheej tshwm sim tshiab heev, thiab ua rau peb tu siab kawg nkaus li."
Bianca Jones thiab nws tus phooj ywg Holly Bowles tau tas sim neej tom qab haus ib co cawv uas muaj cov taug methanol xyaw ntawm ib lub tswv tos qhua tej neeg ev hnav ncig teb chaws so ntawm lub zos Vang Vieng uas tej neeg nyiam mus ntoj ncig heev tsaib no lub 11 hlis ntuj. Lub caij ntawd ces nkawv tsuas muaj hnoob nyoog 19 xyoos xwb.
Tam sim no nkawv niam thiab txiv thiaj xav kom lwm cov tub ntxhais hluas paub txog tej kev phom sij uas cuam tshuam nrog kev mus ncig - thiab haus cawv txawv teb chaws.
Samantha Bowles uas yog Holly niam hais tias lawv xav kom muaj kev sib cuag tau nrog lwm cov niam txiv thiab.
"Yog tej yam ua rau peb zoo siab thiab tseem ceeb rau peb. Qhov peb tab tom ua yog xav kom xa tau tsab xo qhia rau lwm cov neeg ntoj ncig kom lawv tau txais kev nyab xeeb rau lawv."
Cov tsev neeg no thiaj yog cov ntaus thawj hlos los tsim ib cov kev taw qhia tshiab coj mus qhia tej hluas uas kawm tiav xyoo 12, thiab tsoom fwv teb chaws tau qhia txog cov kev taw qhia no ntawm Melbourne airport qhov chaw tos caij dav hlau ya mus txawv teb chaws.
"Bianca thiab Holly yeej zoo siab heev rau nkawv cov kev yuav mus ntoj ncig txawv teb chaws ua ke. Thaum uas Bianca xub tau qhia rau Mark thiab kuv ces, peb thiaj yuav tau ib nyuag ceev faj me ntsis, tab sis peb kuj tau paub tias cov kev mus ntoj ncig txawv tebchaws nrog Holly kuj yog tej yam uas nkawv xav ua thiab peb yeej ntseeg siab rau nkawv cov kev mus ntoj ncig ua ke. vim nkawv yog neeg tshaj lij thiab nkawv yeej paub saib xyuas nkawv tus kheej lawm."
"Thiaj yuav tau ceev faj txog cov kev haus tej dej cawv uas tov xyaw dej khov, tej dej cawv ntau yam tov thiab tsau rau hauv tej thoob thiab tej cawv uas haus ib khob ib khob."
Tsis tas li ntawd los kuj tseem muaj cov kev taw qhia tias yuav nrhiav kev pab cuam li cas thaum ntsib teeb meem.
Thiab lub koom haum SmartTraveller thiab Drinkwise uas yog ib lub nkoom haum not-for-profit yog ob lub uas txhawb nqa cov kev taw qhia no.
Cov kev taw qhia no yuav qhia tej xov xwm ntau yam rau tej hluas thiab tej niam txiv txog cov kev haus dej cawv hauj sim, cov kev nrog saib xyuas lawv tej phooj ywg thiab tej kev phom sij yuav muaj tau los ntawm tej dej cawv tsis muaj ntaub ntawv lo qhia rau tej fwj cawv, tej dej cawv pheej yig los yog tej dej cawv yus tsis paub tias yog dab tsi.
Simon Strahan uas yog tus coj lub koom haum DrinkWise thiaj tshab txhais tias tej xo yuav qhia ntawd muaj cov kev txhawb nqa tej koom txoos ntau yam ntawm qhov chaw tos yuav caij dav hlau ya mus txawv teb chaws, yog ib co kev haub tau yaum uas tsim coj los qhia tsi ntsees rau ib thaj chaw twg kom tej neeg txheeb tau tej xov xwm no hauv lawv tej xov tooj tes.
Nws hais tias "Thiaj ua rau lawv yuav pom tej xo ntau yam thaum lawv mus rau ntawm tshav dav hlau los yog ib puag ncig tej chaw no. Tsis tas li ntawd los lawv kuj tseem yuav pom tej xov no ntawm tej social media thaum lawv mus tshawb nrhiav ntawm qhov chaw nrhiav thiab. Thiab yeej yuav pom tej xov xwm no thaum lawv mus tshawb ib yam dab tsi. Hos ntawm Australia no ces peb yeej yuav qhia tej xo no rau ntawm tej chaw muag cawv thiab. Peb yeej yuav txhawb nqa kom zejtsoom paub txog tej xov xwm no, tsis hais ntawm tej tshav dav hlau, thiab ib feem ntawm tej peb ua no ces yog uas tib zoo xyuas kom qhia tau rau tej hluas kawm tiav xyoo 12, thiab muaj tej khoom qee yam rau lawv, los yog siv tej xwm txheej muaj tam sim no los ceeb toom qhia rau lawv thiab nrog lawv tham txog tej no tiag tiag."
Thiab tsis ntev no ces twb yuav xaus xyoo no lawm, ces thiaj tab tom npaj tej xov xwm no coj lso qhia rau tej hluas kawm tiav xyoo 12 uas yuav mus koom tej koob tsheej ua kev zoo siab ntau yam los yog mus ntoj ncig.
Yeej tau kwv yees tias yuav muaj ntau txheeb tus tub kawm no mus ntoj ncig ntawm Australia thiab mus ntoj ncig txawv teb chaws rau tej chaw uas tej neeg nyiam mus ncig heev li Bali, Fiji, Gold Coast thiab Southeast Asia.
Jason Clare uas yog tus nom tswj dej num kev kawm thiaj hais tias cov kev taw qhia no yeej yog ib co uas xav kom xa tau tej xov xwm (tej xo) tseem ceeb mus kom txog rau tej hluas nyuam qhuav nto nkauj nto nraug no tsis hais lawv yuav nyob rau qhov twg li.
"Peb xav kom lawv lom zem thiab kom tau txais kev nyab xeeb. Peb xav kom lawv rov qab los tsev yam nyab xeeb thiab, ntawd yog tej tseem ceeb heev ntawm peb cov kev taw qhia no - uas peb yeej muaj qhia hauv online, hauv dav hlau, hauv tshav dav hlau, hauv tej text message, thiab social media, tsis tas li ntawd los kuj qhia ntawm tej teej kawm thiab."
Txawm tias tub ceev xwm ntawm teb chaws Nplog yeej tau muaj cov kev tshuaj ntsuam ntev loo thiab yeej raug Australia tej nom tswv tsub nias, los yeej tseem tsis tau muaj cov kev raug txim rau tej neeg muaj feem ua rau Bianca thiab Holly tas sim neej li.
Michelle Jones thiab Sam Bowles yeej tseem nco tau nkawv tej ntxhais cov kev zoo siab heev uas yuav tau ua ntau yam tshiab, tab sis kuj tau nqua hu rau tej niam txiv kom nrog lawv tej me nyuam ub tib zoo tham kom yuav tau ua zoo xyuam xim ceev faj thiab.
Michelle Jones hais tias: "Tsim nyog tej niam txiv yuav tau zaum tsaws nrog lawv tej me nyuam tham ua ntej uas lawv yuav mus."
Samantha Bowles hais tias: "Ua tib zoo xyuas kom lawv paub tias lawv yuav tau ua dab tsi thaum lawv muaj mob lawm - vim tsuas yog tib txoj xub ke nkaus xwb uas yuav pab cawm tau lawv txoj sia."
