Xov xwm luv tshaj tawm hnub zwj Feej (Wednesday news 25.06.2025):
Zoo li kuj xaus tsov rog ntawm Iran thiab Israel lawm txawm tias tsis paub tseeb tias xyov yuav zoo li cas thaum xub. Meskas tus President Donald Trump tau qhia txog nws cov kev meem txom nrog ob lub teb chaws no tias tau sib tua ntev thiab kuj tsis paub tias xyov nkawv tab tom ua dab tsi. Txawm li cas los Benjamin Netanyahu uas yog Israel tus thawj pwm tsav hais tias nws lub teb chaws cov kev ua rog nrog Iran tau tsim kev puas tsuaj rau Iran cov nuclear program vim Israel tau tua Iran tej chaw teeb txheeb nuclear Natanz, Isfahan thiab Arak.
Tau muaj 32 tug coj ntawm lub koom haum NATO (North Atlantic Treaty Organisation) tau sib ntsib ntawm lub rooj sab laj 2 hnub ntawm Netherlands lub nroog Hague coj los qhia rau Russia paub tias NATO tseem muaj kev koom npoj. Volodymyr Zelenskyy uas yog Ukraine tus coj thiaj hais tias yog tias tej teb chaws tub koom siab ntawm Europe tsis pab Ukraine ces tej zaum yauv raug Russia tawm tsam thiab.
Tau muaj 5 tug neeg ua hauj lwm rau tsoom fwv New South Wales thiab tus nom tub ceev xwm Yasmin Catley tsis kam mus teb ib co lus nug uas tsoom fwv tau hais kom lawv mus ntsib limtiam dhau los hnub zwj Kuab (Friday) tom qab tau hawv tias yuav muab law txhom yog lawv tsis mus koom. Thiaj tau muaj cov kev nug txog tej xwm txheej ntxub ntxaug tsis nyiam cov neeg Jews tom qab lub 2 hlis ntuj uas tsev tsoom fwv NSW tau tsim tau tsab cai hate speech laws siv thaum tub ceev xwm tau txheeb tau ib lub caravan ntawm Sydney lub zos Dural lub 1 hlis ntuj dhau los tias muaj ib co nplaum thiab tej khoom tsis nyiaj neeg Jews uas ntseeg tias yog neeg phem li.
Meskas lub chaw zoj xwm qab rooj hais tias Meskas cov kev tua Iran peb thaj chaw ua cov nuclear program limtiam dhau ntawd yeej tsis tsim kev puas tsuaj dab tsis loj rau lub teb chaws Iran cov nuclear program. Meskas lub tuam chav tiv thaiv teb chaws ceg tuam chav soj xwm qab rooj tej kev txheeb tej xwm txheej no thiaj raug CNN coj los tshaj tawm.
Antoinette Lattouf uas yog ib tug neeg nthuav xov xwm rau ABC kuj tau yeej rooj plaub hais nrog lub chaw nthuav xov xwm no ntawm Federal Court tom qab uas nws raug muab rho tawm hauj lwm vim nws tau faib lub koom haum Human Right Watch cov kev cej luam tias Israel tau siv cov kev tuag tshaib tuag nqhis los ua tsov rog ntawm Gaza. Nws thiaj hais tias ''Txog kiag tam sim no lub 6 hli ntuaj 2025 no los peb yeej tseem niaj hnub pom Palestinians tej me nyuam yaus tseem tuag tshaib tuag nqhis. Yeej pom lawv tej duab mob yuag yuag tshuav txha, thiab mus tshawb qhov ub qhov no kom tau khoom noj. Lawv cov kev raug tsim txom loj heev tsis yog lam tshwm sim xwb tab sis yog txhob txwm. Thiab hnub no tsev hais plaub yeej hais tias cov kev raug txim rau ib tug twg uas qhia qhov tseeb txog tej war crimes no yog ib cov kev ua txhaum cai thiab.''
Muaj Australia tej pej xeem tshaj li 100 tus raug Australia tej dav hlau tub rog thauj tawm ntawm Israel tom qab tau rov qab qhib tej tshav dav hlau. Thiab Jim Chalmers uas yog tus nom tswj nyiaj txiaj rau tsoom fwv hais tias yeej muaj neeg coob cia siab tias tsoom fwv tseem yuav pab tshem lawv tawm ntawm cheeb tsam Middle East uas tseem muaj kev tsis haum xeeb no thiab.
Mark Butler uas yog Australia tus nom tswj dej num noj qab haus huv hais tias cov kev hloov rau cov kev kho mob ntiav yuav tsis ua rau tej nqe premiums kim tuaj ntxiv. Tsoom fwv thiaj tau tsub nias kom tej tuam txhab muag nyiaj tuav pov hwv tswj kev kho mob ntiag tug tsis txhob nce tej nqe kho mob thiab kom lawv them nyiaj rau tej neeg mus kho mob ntawm tej tsev kho mob ntiav ntau tuaj ntxiv.
Iran tus nom ambassador Ahmad Sedeghi ntawm Australia tau tib tsis pom zoo nrog Donald Trump tej lus tawm tswv yim tias tej zaum yuav hloov tau tus tsoom fwv Iran, tab sis txij ntawd los nws kuj tau rov qab hais tias nws tsis xav kom hloov thiab vim tsam haj yam ua rau ntxhov quav niab tuaj ntxiv.
Nom tswv Cob tsib kho nws tsab cai pub neeg thov ua pej xeem tshiab thiab teev tias tej neeg thov ua tau pej xeem yuav tsum yog neeg raug cai, tej me nyuam yuav tsum muaj ib tug leej niam leej txi yog neeg Cob tsib, paub tej cai, hwm tej txhooj cai tswj haiv, paub lus Cob tsib, nyob lub teb chaws no yam tsawg li 5 xyoos thiab yuav tsum tau siv ib lub npe Cob tsib txuam nrog lawv lub npe thaum xub yog tias lawv yog neeg txawv teb chaws.
Nom tswv Nplog tau qhia tias tau txwv txhua cov kev khawb kub ntawm xeev Huam phan yog tias tej chaw khawb ntawd tsis yog cov chaw teev zwm raug kev raug cai ces cov kev kho tej peev txheej no yuav yog ib cov kev ua txhaum cai raws li The Laotian Times nthuav tawm.
Nom tswv Nplog kuj qhia ntxiv tias xav thov tsim seb puas tau ib tsab cai uas tsuas tsub se 5 feem pua rau tej lagluam me xwb thiab yuav tsis tsub se raws tej nyiaj ntiag tug uas khwv tau lawm. Tsis tas li ntawd los lub koom haum MAG kuj tau nyiaj USD tshaj 1 million los khaws tej foob pob tsis tau tawg ntawm xeev Khammuane thiab raws li Vientiane Times hais.
Tau muaj ib tug kis ntawm ntawm pab nom BhumjaiThai tau qhia tias tseem tab tom npaj yuav los koom tes nrog lwm pab nom ntawm teb chaws Thaib ntxiv tom ntej no los tawm suab tsis tso siab rau Thaib tus thawj pwm tsav Paetongtarn Shinawatra txoj kev ua tus coj raws li Bangkok Post tau tshaj tawm.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follow los yog lwm cov podcasts platforms (iHeart, Amazon Music & Podcasts).
