Russia tseem tab tom npaj ib co ntaub ntawv seb puas yuav tsim tau kev thaj yeeb xaus tsov rog ntawm teb chaws Ukraine, tom qab Meskas tus President Donald Trump tau qhia thaum ntxov lub hli no, thiaj ua rau Russia tus coj Vladimir Putin tau qhia tias Moscow twg naj txhij yuav koom tes nrog Ukraine los npaj tej ntaub ntawv los xyuas tej hauj lwm no.
Pawg neeg koom txiav txim Erin Patterson rooj plaub 3 lub txim tua neeg kuj tau pom ib cov interview tom qab ib pluas su uas muaj tej nceb muaj taug raug coj los rau lwm tus noj ntawm Ms Patterson lub tsev ntawm Gippsland.
Malaysia thiab Suav kuj tau kub siab txog tej cib fim ua luam thiab txhawb nqa kom muaj kev koom tes los pab kom tej lagluam loj hlob rau lub rooj sab laj uas Suav thiab ASEAN thiab lub koom haum Gulf Cooperation Council tau sib thawj thawj zaug. Ua ke no los Vientiane Times kuj tau qhia tias Nplog tus coj kuj tau mus koom lub rooj sab laj no thiab tau qhia tias muaj ib co hauj lwm tseem ceeb li cov kev pab kom cheeb tsam no ruaj ntseg thiab ntxeem dhau ntau yam nyuaj, muaj kev txhawb nqa lagluam, txhim kho peev txheej tib neeg thiab tsim tau tej lagluam uas pov puag tau tej ib puag ncig.
Tau muaj Meskas lub tuam txhab Cerberus tau qhia tias nws xav los yuav los sis ntiav Australia lub chaw nres nkoj Darwin Port raws li ib tug coj ntawm Suav lub tuam txhab Landbridge tau qhia ces tus coj Meskas lub tuam txhab no tau nrog tus coj Landbridge tham 2 limtiam dhau los, rau lub caij uas tsoom fwv Australia tseem xav ua tib zoo xyuas kom lub chaw nres nkoj no rov qab yog Australia li.
Nom tswv Thaib lub tuam chav tswj dej num ntiav dag zog thiab pov puag kom tej neeg ua hauj lwm tau qhia tias xav los xyuas seb puas pub Thaib tej poj niam so 3 hnub rau ib lub hlis twg thaum lawv coj khaub ncaws kom lawv tau txais kev noj qab haus huv raws li Nplog phau ntawv xov xwm The Laotian Times tau qhia.
Tau muaj Nyab laj lub tuam txhab THACO qhia tias nws xav tshwm nyiaj tshaj $61 billion los tsim txoj kev tsheb ciav hlau ntawm Ho Ci Minh City mus rau Hanoi, uas nws yuav tshwm nyiaj ntiag tug txog li 20 feem pua thiab 80 feem pua seem ces mam qe raws cov paj tsawg rau lub caij 30 xyoo. Nws kuj tseem yuav tsim ntau yam li tej tsev kho mob, teej kawm, tej kiab khw, parks thiab chaw nres tsheb ciav hlau raws txoj kev tsheb ciav hlau no. Tsis tas li ntawd los tsis ntev los no kuj tau muaj lub tuam txhab VinhSpeed kuj xav los nqes peev $60 billion los ua txoj kev tsheb ciav hlau no thiab raws li Tuoitre News qhia.
Thaksin Shinawattra uas yog Thaib tus qub thawj pwm tsav dhau los tau hais tias Thaib yuav tawm tsam nrog tej kev ua yaj yeeb txhaum cai, rau lub caij uas Phabmab tej tub rog Red Wa Army tawm tsam nrog Nplog tej tub rog ntawm Bokeo thiab yuav tau xa Nplog tej tub rog sab qab teb mus pab thiab RFA tau qhia tias tau muaj Nyab Laj tej tub rog yuav mus pab Nplog tawm tsam nrog tej xwm txheej yaj yeeb txhaum cai ntawm peb ceg xab xeeb kaum thaj chaw ua luam special economic zone. Thaib tus coj no hais tias ''tej yaj yeeb txhaum cai yuav tsim kev puas tsuaj rau ntau phaum neeg pem suab, ua rau tej zejzog ntshai rwg tsis paub ua neej, lagluam to tau tab sis yuav tsis tos rau cov kev daws teeb meem yaj yeeb txhaum cai, thiab yog leej twg tsim yaj yeeb txhaum cai ces yog Thaib tus yeeb ncuab, thiab yog Phabmab tsis muaj peev xwm tswj tau nws tej neeg pawg tsawg tej teeb meem ces Thaib mam li los ua tus tswj,'' raws li Bangkok Post tau qhia.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follow los yog lwm cov podcasts platforms (iHeart, Amazon Music & Podcasts).
