Xov xwm luv tshaj tawm hnub zwj Teeb (Thursday news 22.05.2025):
David Littleproud uas yog tus coj pab nom Nationals qhia tias tos nws tsis kam koom nrog Liberals los tsim pab nom koom tswj los vim lwm pab nom teb chaws tsis pom zoo nrog nws tej cai tsim hluav taws xob siv, tej nyiaj pab tej neeg toj siab, thiab tej supermarket tej fwj chim ces nws thiaj tsis xav koom tsim pab nom koom tswj tom qab uas John Howard uas yog Australia tus qub thawj pwm tsav dhau los ntawm pab nom Liberals tau hais kom ob pab nom no rov qab los koom ua tib pab nom kom sai. Ua ke no los pab nom Nationals kuj tseem yuav los xaiv nws tej nom los tswj tej hauj lwm tseem ceeb li nyiaj txiaj, hauj lwm txawv teb chaws, home affairs thiab immigration uas yuav cia ib cov nom MPs thiab Senators los ua ntau yam hauj lwm. Hos Liberals los kuj yuav los xaiv kom tau nws tej nom kom sai los tswj tej tuam chav hauj lwm tseem ceeb tam li yog lwm pab nom teb chaws thiab.
Kevin Hogan uas yog tus lwm coj tshiab ntawm pab nom Nationals tsis kam nrog tej neeg nthuav xov xwm tham tias seb puas yog tim Jacinta Price thiaj ua rau muaj kev sib tawg tswj ntawm ob pab nom Nationals thiab Liberals. Jacinta Price uas yog ib tug nom senator ntawm xeev Nothern Territory tau mus koom nrog pab nom Liberals thaum tseem sib khom tsim pab nom koom tswj tom qab swb cov kev xaiv tsa tsoom fwv teb chaws. Tab sis raws li tau muaj ib tsab ntawv teev hnub tim 12 lub 5 hlis ntuj ntawm tus nom Bridget McKenzie uas tau ua paim quav thiab raug Murdoch press coj mus nthuav tawm ces nws yeej muaj kev txhawj xeeb txog pab nom koom tswj cov kev pom zoo tom qab Ms Price tau muaj nws cov kev txiav txim siab. Tab sis Mr Hogan hais tias tsuas yog cov teeb meem cuam tshuam me ntsis txog tej cai sib txawv ntawm ob pab nom no xwb.
Tau rov qab coj tau Australia tej neeg txum tim 11 yam khoom qub rov qab los rau teb chaws Australia no tom qab tau coj mus khaws cia ntawm lub chaw khaws qub puav pheej Fowler Museum ntawm California yuav laug txog 100 xyoo. Tej khoom no muaj 10 lub hau xub vos hmuv uas xuas iav tsim thiab ib tug kaus hniav kangaroos uas coj los ua cov ntaub khi taub hau.
Chris Minns uas yog hau xeev NSW tau qhia tias yeej tau npaj tej peev txheej ntau yam mus pab cawm tej zejzog raug dej nyab nyob nrab teb raws tej ntug hiav txwv sab qaum teb ntawm lub xeev no lawm. Yeej tau xa tej neeg txog li ntawm 2,500 tus li State of Emergency Services, ambulance neeg tua hluav taws thiab pab cawm lwm tus nrog rau tej neeg pab cawm neeg poob deg thiab marine rescue mus pab. Thiab yeej muaj tej tsheb thiab nyob hoom kiv tshuab pab ntawm tej chaw ntawd. Tab sis tus hau xeev no hais tias tseem muaj dej nyab cais tej zos ces thiaj tsis muaj peev xwm xa tau khoom noj khoom siv mus pab.
Jotham Napat uas yog Vanuatu tus thawj pwm tsav kuj qhia tias tham tau lus tseem ceeb nrog Australia tus nom txawv teb chaws Penny Wong kom muaj kev pom zoo ntawm ob tog zoo tuaj ntxiv. Tab sis tseem yuav xyuas seb ho puas pom zoo rau ntau yam hauj lwm. Ms Wong los kuj qhia tias xav xyuas kom muaj kev sib raug zoo ntxiv rau ob haiv neeg no.
South Africa tus coj Cyril Ramaphosa hais tias cov kev mus xyuas tsev dawb tham tau lus tseem ceeb raws siab xav tab sis nws kuj tsis lees Meskas tus President Trump tej lus tawm tswv yim tias muaj cov xwm txheej txhob txwm tua cov neeg ua liaj ua teb uas yog neeg dawb.
Lub koom haum International Olympic Committee raug tsuab nias kom yuav tsum qhia tias vim li cas thiaj yuav siv ib thaj chaw ntawm Brisbane uas yog thaj chaw tseem ceeb rau neeg txum tim los ua qhov chaw tsim tshav sib tw.
Ange Postecoglou uas yog tus coach rau pab Tottenham Hotspur kuj pab kom pab neeg ncaws pob no yeej cov kev sib tw Europa League Final nrog Manchester United thaum sib tw ntawm Spain lub nroog Bilbao.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follow los yog lwm cov podcasts platforms (iHeart, Amazon Music & Podcasts).
