David Littleproud uas yog tus coj pab nom National Party of Australia (Nationals) tau qhia tias nws yuav ua nws ib pab nom thiab tsis koom nrog pab nom Liberal Party of Australia (Liberals) tom qab uas ob pab nom no tsis muaj kev pom zoo los koom tsim pab nom koom tswj (Coalition) lawm.
Mr Littleproud tau hasi tias ''Zoo li peb yeej tsis pom zoo rau tej kev siv nuclear tsim hluav taws xob siv, tej nyiaj Regional Australia Future Fund $20 billion dollars uas yuav pab kom tau nyiaj $1 billion txhua xyoo rau tej neeg ntawm zos toj siab, cov kev xyaum thiab qhia tej kws kho mob, cov kev kho tej kev tsheb to qhov thiab pab kom tej cuab yig hluas tau siv childcare thiab cov kev xyuas kom tej supermarket tsis txhob muaj fwj chim loj heev. Peb yeej xav xyuas tej no kom tsis txhob muaj teeb meem rau tej neeg ua luam cog qoob loo kom thiaj tsis muaj teeb meem dab tsi rau Australia tej neeg yuav khoom siv.''
Pab nom Nationals los kuj yuav xaiv nws tej nom los tswj tej tuam chav hauj lwm tseem ceeb thiab tej zaum ntshe tej nom tshiab no yuav tau lis ntau yam dej num.
Sussan Ley uas yog tus coj ntawm pab nom Liberals tau qhia tias tseem muaj lwm yam teeb meem ntawm tsev tsoom fwv thiab li cov kev tawm suab uas zoo li yeej xav kom nws tej nom muaj kev koom npoj tam li yog lwm pab nom teb chaws.
Pab nom koom tswj (Coalition) cov kev sib tawg tswj no thiaj ua rau pab nom Liberal Party ras los ua lwm pab nom teb chaws (Federal Opposition) lawm.
Thiaj ua rau pab nom Nationals yuav tsis tau ua tej nom ntawm lwm pab nom teb chaws lawm thiab nws yuav los teeb tsa nws ib co nom. Tej no thiaj yuav ua rau nws yuav plam qee yam txiaj ntsim, tej zaum kuj yuav tsis tau neeg ua hauj lwm ntxiv thiab ntshe yuav tsis tau 25 feem pua ntawm tej nyiaj bonus lawm.
Thiab thawj pwm tsav Anthony Albanese tau qhia tias cov kev tseem cia pab nom no muaj neeg ua hauj lwm coob ntxiv yog tej yam tsis tsim nyog thiab kuj nyob ntawm seb nws puas yuav pub kom pab nom Nationals muaj neeg ua hauj lwm coob npaum li cas xwb.
Ms Ley los yeej tau qhia tias nws yuav nrhiav kom tau nws tej nom los tswj tej tuam chav hauj lwm tseem ceeb kom sai li sai tau thiab.
Thiaj pom tias tsis yog cov kev sib tawg ua thawj zaug rau lub caij 80 xyoo uas ob pab nom no tau koom ua pab nom koom tswj xwb. Yeej tau muaj cov kev sib tawg ntawm ob pab nom no rau lub caij xyoo 1972 thiab rov qab muaj cov kev sib tawg ua zum 2 ua ntej yuav muaj kev xaiv tsa tsoom fwv teb chaws xyoo 1987, ces zaum no thiaj yog cov kev sib tawg ua zaum 3.
Txawm li cas los David Littleproud uas yog tus coj ntawm pab nom Nationals yeej tau qhia tias ''yeej tseem qhib kev dav rau cov kev sib khom kom ob pab nom no rov qab muaj peev xwm los sib koom ua pab nom koom tswj txuas ntxiv rau yav pem suab thiab.''
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum SBS Hmong Pod follow los yog lwm cov podcasts platforms (iHeart, Amazon Music & Podcasts).
