Vim li cas thiaj tsim lub Hmong AI app siv
Muaj ntau yam laj thawj qhia tias vim li cas Seo Gia Vang (Yias Vaj) thiaj tau los tsim lub Hmong AI app siv.
Nws tau hais tias txij li thaum tau muaj cov generative AI raug coj los siv tsim duab lawm ces pom tau tias tej ntawv (prompt) uas yus sau tsim tsis tau tej duab Hmoob los yog tsoos Hmoob. Ces nws thiaj tau los siv tej Open AI coj los train kom paub txog Hmoob, paub ntawv Hmoob thiab paub Hmoob tej tsoos.
Lub hom phiaj kuv ua mas kuv xav kom peb cov Hmoob peb mus dhau ib kauj ruam. Qhov kuv ntshaw tshaj yog peb vam meej li luag lwm haiv neeg, peb muaj li lwm haiv neeg, luag muaj los peb muaj tib yam nkaus, ces kuv thiaj tsim lub app no.Founder of Hmong AI, Seo Gia Vang
Credit: Seo Gia Vang/Hmong AI
Muaj tej txheej txheem li cas tsim ib lub mobile app
Yias Vaj hais tias ''Ua ntej koj yuav tsim ib lub app mas koj yuav tsum tsim kom tau ib tug AI uas nkag siab txog Hmoob, paub lus Hmoob, paub ntawv Hmoob, paub tsoos tsho Hmoob.''
"Ua ntej ntawv yuav tsum tsim kom tau ib tug model, nrhiav cov model uas tsim duab ntawd ces muab Hmoob tej lus thiab tej tsoos coj mus tso rau hauv, muab combine ua ke, ces thaum ua tau ib tug model ces mam coj mus khiav hauv (Virtural Private Server - VPS) uas yog ib co cloud computer kom nws dhia tau, ces thaum nws dhia tau lawm ces tseem yuav khuab tau los yog siv tau rau hauv lub app.''
''Ces thaum tsim tau ib lub app qhuav qhuav tsis muaj data base dab tsi nyob hauv li, thiab thaum yus tsim tau yus tus AI model hauv cloud computer lawm, ces mam li sib ib qho program txuas kom tau tej xov xwm ntawm tus AI model no coj los dho tau rau lub app, ces yog thaum ntau ntawv (input prompt) ntawm qhov server ntawd ces mam ua cov duab ntawm server ces mam li xa cov duab AI rov qab los rau hauv lub app.''
Credit: Seo Gia Vang/Hmong AI
Lub ntsiab tiag ua tsim lub Hmoob AI app
Lub ntsiab tiag mas, ua ntej ntawv kuv mas yeej nyiam nyiam thiab yeej xav tias ua li cas luag lwm haiv neeg luag muaj tej applications ntau ua luaj hauv IOS thiab Androids, cas peb cov Hmoob muaj los muaj tsawg ua luaj. Yog thaum kuv pom Hmoob muaj ib yam dab tsi vam meej rau sab technology ces kuv yeej nyiam nyiam heev, kuv yeej txhawb heev. Vim rau qhov kuv yug hauv lub teb chaws uas yus haiv neeg poob qab, yus pom kev vam meej mas yus ntshaw ntshaw heev, thiab yus xav kom yus haiv neeg muaj li lwm haiv neeg.Founder of Hmong AI app, Seo Gia Vang
'Lub hom phiaj tiag tiag yeej xav kom yus haiv neeg vam meej xwb,'' raws li Yia Vaj hais.
Credit: Seo Gia Vang/Hmong AI
Siv tau tej duab AI los ua tau dab tsi xwb
Yias qhia tias lub caij no ces Hmoob nyiam siv duab ua YouTube khwv nyiaj hauv online, ces cov kev siv tej duab tsim tau ntawm lub Hmong AI no kuj pab tau qhov no, ntxiv ntawd ces kuj pab tau tej lagluam siv tej duab no coj mus txhawb nqa lawv tej lagluam ib yam dab tsi thiab.
Hos yog tham txog cov AI video no ces Yias hais tias tseem tsis tau muaj peev xwm ua tau, vim rau qhov yuav tau siv cov computer uas zoo heev los ua mas thiaj ua tau.
Credit: Seo Gia Vang/Hmong AI
Tab sis lub Hmong AI app no ces yeej muaj peev xwm sau tau ntau yam ntawv ntau yam suav ntawv Hmoob nrog thiab ua yeej tsim tau duab tib yam. Thiab nws kuj tsim tau ob version li siv hauv Google Play thiab Apple Store.
Credit: Seo Gia Vang/Hmong AI
Qhia ua cov application (App)
Yias kuj xav thov ua tsaug rau ib tsoom Hmoob sawv daws ua tau siv nws lub app no.
Nws kuj hais tias ''Yog leej twg nyiam thiab xav tsim lub app thiab muaj ib yam hom phiaj xav ua ces yuav tsum yog nyiam tiag tiag thiaj ua tau, thiab yuav tau siv tej AI technology los pab yus ua.''
''Yog leej twg nyiam thiab nug kuv ces kuv yeej yuav pab qhia lawv ua,'' raws li Yias hais.
''Kuv yuav tsis ua video los qhia sawv daws siv tab sis kuv xav kho kom siv tau lub app no zoo tshaj qub ntxiv.''
''Tab sis qhov yuav los qhia tias yuav ua li cas no ces tej zaum kuv yuav los ua thiab, rau qhov kuv paub tias muaj Hmoob coob tus paub ua, tab sis tej zaum lawv tsis pom qab ua, vim pheej tseem ua rau lub lwm haiv neeg tej tuam txhab xwb.''
Credit: Seo Gia Vang/Hmong AI
Yuav ua dab tsi ntxiv rau yav pem suab
Seo Gia Vang (Yias Vaj) hais tias muaj 2 yam nws xav ua ntxiv rau yav tom ntej.
Nws hais tias ''Qhov ib ces yog muab duab ua tau video. Qhov ob ces yog cov kev muab ntawv (text) tig ua lus (text to audio), uas yus ntshaw tias muaj ib hnub yuav muaj ib co li no thiab. Es kom muaj ib tug AI hais tau yus cov lus Hmoob thiab. Qhov no yog qhov kuv ntshaw kawg nkaus. Yog ua tau thiab ces pab kom Hmoob vam meej kawg nkaus li lawm.''
Nws kuj hais tias nws xav kom tsim tau ib tug AI hais tau lus Hmoob coj mus tso rau hauv Google los yog lwm cov Open AI uas paub thiab txhais tau ua lwm hom lus thiab.
''Tiag tiag mas kuv lub hom phiaj kuv xav ua ib qho foundation kom ua tau qhov ntawd, yog thaum ua tau lawm ces xav muab tso rau hauv cov Open AI los yog Google los sis ChatGPT ces kom sawv daws siv tau.''
Credit: Seo Gia Vang/Hmong AI
READ MORE
AI technology
