Ntsiab lus tseem ceeb:
- Muaj cov kev xav sib txawv rau cov kev noj tej nqaij cultured meat/lab-grown meat.
- Ib txhia hais tias xyov tej nqaij tsim tau no puas muaj txiaj ntsim zaub mov raws li qhov tsim nyog.
- Ib txhia xav tias yog ib txoj xub ke tshiab rau cov kev los siv tej technology tshiab los pab tsim zaub mov thiab tsim nqaij rau ntiaj teb tej pej xeem noj.
- Ib txhia hais tias vim lawv tsis xav pom tej tshiaj txhu raug tsim txom, pov puag tej ib puag ncig.
- Tseem muaj ib txhia teb chaws txwv, yuav tau nqes peev nyiaj txiaj thiab tseem tsis tau muaj neeg coob noj tej nqaij no.
Singapore yog thawj lub teb chaws uas tau tso cai muag cov nqaij cultured meat/lab-grown meat rau tej neeg noj.
Tam sim no kuj muaj ntau lub khw noj mov ntawm Australia tab tom ua tej nqaij no rau tej neeg noj lawm thiab. Txawm li cas los tej neeg kuj muaj cov kev xav sib txawv rau cov kev noj tej nqaij no.
''Kuv yeej xav noj tej yam tshiab uas txawv thiab kuj xav sim noj thiab coj los ua noj.''
Tej txheej txheem ua cov nqaij no ces yog muab ib co cell nqaij ntawm ib tug tsiaj coj mus yug hauv ib lub bioreactor hauv ib lub factory kom cov nqaij ntawd loj tuaj ces mam li coj los ua noj.
Ellen DInsmoor uas yog tus Chief Operator Officer ntawm lub tuam txhab Vow uas yog ib lub ntawm 3 lub tuam txhab hauv ntiaj uas tau txais kev tso cai muag tau cov nqaij cultured meat hais tias tsis yog lawv yuav siv lub tswv yim no los tsim nqaij hloov tej tswv yim yug tsiaj txhu tam sim no kom tau nqaij noj.
Nws hais tias ''qhov peb ua ces yog muab ib co cell nqaij ntawm ib tug tsiaj coj mus yug hauv ib co kua uas muaj amino acids, ntsev thiab piam thaj ntawm ib lub bioreactor. Thaum daim nqaij ntawv loj tuaj lawm ces mam coj los ua noj.''
Professor Paul Wood uas yog ib tug paub txog biotechnology ntawm Monash University hais tias ''Ib txhia yeej tsis xav pom tej tsiaj txhu raug tsim txom, lwm tus xav pov puag tej ib puag ncig, thiab ntseeg tias kuj yog ib lub tswv yim zoo los tsim zaub mov noj thiab.''
Txawm li cas los kuj tseem tsis tau paub tias xyov puas yuav tsim tau ntau coj los noj, vim yuav tau yug tej nqaij hauv tej factory uas yuav tau siv hluav taws xob ntau heev txawm tias siv av thiab dej tsawg los tseem txhawj tias tej nqaij ntawv puas muaj tej txiaj ntsim zaub mov li tej tau los ntawm tej tsiaj txhu uas yug ntawm tej liaj teb tiag.
Ib txhia kuj ntseeg tias tej lagluam yeej muaj lub luag hauj lwm nrog xyuas kom tsim tau zaub mov txaus rau ntiaj teb tej pej xeem uas muaj coob tuaj ntxiv noj rau 20-30 xyoo ntxiv no.
Sam Perkins uas yog tus coj lub koom haum Cellular Agriculture Australia thiaj hais tias ''Peb xav kom siv cov cellular agriculture los pab tej tswv yim cog qoob loo thiab yug nqaij noj uas peb muaj siv tam sim no coj los daws tej xwm txheej huab cua pauv hloov uas tej zaum yuav tsim tsis tau qoob loo txaus los yog pab kom tsis txhob muaj teeb meem dab tsi li kab mob qaib tuag aws tau muaj tsis ntev los no.''
Tej technology no yeej raug siv coj los tsim ntau yam tsis hais kasfes, roj txoob, tawv, thiab chocolate lawm.
Perkins thiaj hais ntxiv tias tej neeg yeej tseem nkag siab yuam kev tias ''tej nqaij cultured meat/lab-grown meat no yog tej nqaij uas tsim hauv laboratory xwb, tab sis qhov tseeb tiag tsis yog tsuas tsim hauv tej factory xwb.''
Txawm li cas los ntshe tseem tshuav ntev heev thiaj mam yuav tsum tau tej nqaij no ntau thiab txaus rau sawv daws noj. Vim cov kev xyuas kom tau txais tsoom fwv kev tso cai, muaj neeg nqe peev rau tej lagluam no thiab tej neeg tig los noj tseem yog tej yam nyuaj. Rau qhov tseem muaj qee lub teb chaws li Meskas, Italy thiab Fab kis txwv tsis pub muag tej nqaij no.
