Ntsiab lus tseem ceeb:
- Ntawm Australia no ces yeej tsis tshua siv lub tswv yim sib qhaib los nrhiav ib tug hlub.
- Cov kev pab nrhiav ib tug hlub ntawm Australia no rau ib tug twg muaj hom phiaj pab kom tej hluas tsis tau muaj tus hlub tau ntsib tej hluas uas xav sib hlub tiag tiag thiab xav ua txij nkawm los yog xav muaj kev sib hlub ntev ntxiv tuaj.
- Dating apps ces yog tej platforms uas tej neeg sau tej dab neeg qhia txog lawv tus kheej, thiab nrhiav tej neeg kom haum raws li phim thiab lawv nyiam thiab sib tham uas ntej yuav ntsib tus neeg ntawd tim ntsej tim muag.
- Cov kev ua nkauj nraug ntawm Australia txawv tej ntawm lwm cov teb chaws li cas?
- Tsim nyog koj paub txog dab tsi ua ntej yuav tham ib tug twg ntawm Australia?
- Tsim nyog koj nrhiav qhov twg thiaj tau ib tug neeg tham ntawm Australia?
- Matchmaking services yog dab tsi?
- Cov matchmaking services ua hauj lwm li cas?
Gery Karantzas uas yog ib tug zeskais (Professor) of Psychology and Relationship Science ntawm Deakin University, thiab yog tus coj uas tswj Science of Adult Relationships Laboratory, thiab kuj yog tus couple’s therapist hais tias, cov kev xav nrhiav kom tau ib tug hlub tseem ceeb tshaj txoj kev sib hlub lawm thiab — uas yog pab kom ib tug twg mloog tau tias lawv yog ib feem ntawm lub teb chaws.
Nws hais tias "Thaum uas peb cais ntawm tej chaw uas peb swm tsis hais tej chaw uas peb tau loj hlob, los tej chaw uas peb tau kawm kom peb yog ib feem ntawm ib lub teb chaws twg, uas ib txwm yog tej chaw uas peb muaj kev sib raug zoo nrog peb tsev neeg thiab peb tej phooj ywg, ces thaum peb ncaim ntawm tej teb chaws ntawd lawm, los yog tej chaw ntawv lawm, ces yeej ib txwm ua rau peb nyob tib leeg twm zeej kho siab khuav thiab mloog tias zoo li peb raug cais. Thiab tam li yog tib neeg ces peb yeej xav kom peb yog ib feem ntawm ib thaj chaw twg."
Professor Karantzas thiaj tshab txhais tias cov kev raug cais ntawm tej neeg yus hlub tshua yeej ib txwm ua rau yus ntxhov siab thiab ua rau yus muaj kev tu siab.
"Ib txoj xub ke yuav pab kom peb ntxeem dhau tej xwm txheej ua rau peb ntxhov siab vim peb tau ncaim tej neeg peb hlub tshua uas tsis muaj peev xwm qawm, puag lawv los yog sib ntsib sib cuag tau nrog lawv lawm thaum peb mus nyob rau ib lub teb chaws tshiab lawm ces yog yuav tau xyuas kom muaj kev sib ntsib sib cuag tau nrog lwm tus.
''Uas feem ntau, ces kuj yog tej neeg zejzog coj tej kab lis kev cai muaj ntsis sib xws los yog muaj tej kev xaiv zoo tib yam txawm tias tej zaum tej kab lis kev cai sib txawv, vim rau qhov yeej muaj ib txhia yeej yam tib yam, muaj cov kev coj taug ua zoo tib yam, muaj cov kev ntseeg zoo tib yam uas twb ua rau peb mloog tau tias peb yog ib feem ntawm ib co neeg zejzog twg lawm,'' raws li nws txhab ntxiv.
Txawm li cas los cov kev pib ib co kev sib raug zoo ntawm Australia no yeej ib txwm txawv tej uas muaj txawv teb chaws.
Speed dating ces yog ib co koom txoos uas tej hluas tsis tau muaj tus hlub mus ntsib thiab sib tham tim ntsej tim muag nrog ntau tus hluas (hluas nkauj/hluas nraug) kom seb puas nrhiav tau tus hlub ntawm ib co koom txoos sib tham luv luv sai sai. Credit: AsiaVision/Getty Images
Cov kev ua nkauj nraug ntawm Australia txawv tej ntawm lwm cov teb chaws li cas?
Professor Karantzas hais tias yeej tsis tshua pom muaj tej kev nkauj nraug uas tau npaj rau ob tug hluas los sib ntsib sib tham ntawm Australia no pes tsawg. Nws tshab txhais tias:
"Yog peb tham txog ntau lub teb chaws lawm, ces tsis hais cov teb chaws ntawm cheeb tsam Middle East, ntau thaj chaw ntawm Africa, los yog ntau lub ntawm cheeb tsam Asia, yeej muaj ib txhia teb chaws no yog cov teb chaws uas tej neeg zejzog nyob koom npoj ua pab ua pawg ntau dua. Lawv cov kev ntsib/tham ib tug hlub yeej cuam tshuam nrog tej neeg lawv paub, lawv tej phooj ywg thiab lawv tej cuab yig. Thiab peb kuj tseem paub thiab tias muaj ib txhia kab lis kev cai ces yeej siv cov kev sib qhaib sib yuav ua txij nkawm ntau heev,"
Adam (tsis yog nws lub npe tseeb) tau tuaj rau Australia xyoo 2014 tam li yog ib tug tub kawm pej kuj haiv.
Nws hais tias "Thawj lub hlis ces zoo li kuj lom zem kawg. Vim txhua tsav yam tseem tshiab thiab ua rau kuv xav paub xav pom. Tab sis tom qab ib lub hlis lawm ces yus yuav tau lees paub qhov tseeb. Ua rau kuv mloog tias kuv nco vaj nco tsev. Kuv txawm pib ntsib teeb meem ntau yam tsis hais cov kev tsis swm nrog tej kab lis kev cai tshiab, tej kev tsis paub lus, thiab pheej ua rau yus tswj tsis tau yus cov kev xav kom tus. Zoo li kuv pheej tsis tshua hwm kuv tus kheej, kuv mloog tias nyob kho siab khuav,"
Tom qab nyob tau peb xyoos thiab tham tsis tau ntau tus hluas nkauj raws li nws siab xav, ces Adam thiaj tau tib mus siv ib co dating coach ntawm Melbourne.
Adam hais tias "Kuv tau kawm ntau yam txuj kom paub sib txuas lus nrog lwm tus. Kuv tus coach txhab nqa kom kuv ua tej yam txawv tej ib txwm ua li nrog tej neeg txawv yus tsis paub tham. Thiab tej txuj ci no yeej pab kom yus tsim tau kev phooj ywg nrog lwm tus, kom muaj peev xwm nrog ib tug twg tham, los yog pab kom yus muaj peev xwm mus koom tau ib co koom txoos dab tsi thiab muaj peev xwm nrog ib tug twg tham. Tej no thiaj tau ua rau muaj kev pauv hloov ntau heev rau kuv cov kev xav vim kuv xav tias tej txiv neej feem coob yeej tsis muaj peev xwm mus nrog tej hluas nkauj lawv nyiam tham li,"
Dating apps ces yog ib co online platforms uas tej zaum yog tej websites los sis yog cov mobile apps uas tej neeg siv muaj peev xwm sau dab neeg qhia txog lawv tus kheej kom nrhiav tau tej neeg phim lawv, thiab kom tau ntsib tau nrog tej neeg ntawv tham hauv online ua ntej yuav ntsib tim ntsej tim muag. Source: Moment RF / Fotografía de eLuVe/Getty Images
Tsim nyog koj paub txog dab tsi ua ntej yuav tham ib tug twg ntawm Australia?
Andrew Gung ces yog ib tug dating thiab relationship coach ntawm Melbourne yeej tau siv cov Cofidence Coaching program pab tej txiv neej coj ntseeg ntau yam kab lis kev cai sib txawv ntau tshaj ib txheeb tus kom muaj kev ntseeg siab rau lawv tus kheej.
Nws hais tias "Yeej muaj tej txiv neej ntawm ntau cov teb chaws sib txawv yeej nug peb yuav laug txhua txhua hnub li, hais tsi ntsees yog tej txiv neej ntawm teb chaws India thiab ib co teb chaws ntawm cheeb tsam Asia. Lawv tej tswv yim uas sib tham ua nkauj nraug ces pheej ua raws li tej lawv tau pom haum tej yeeb yaj kiab (movies) vim rau qhov lawv yeej tau loj hlob nrog lub tswv yim sib qhaib. Ces lawv thiaj tsis paub tias yuav ua li cas kom tej poj niam nyiam yus."
Mr Gung tshab txhais tias cov kev zoo phooj ywg thiab ua siab dawb siab zoo xwb yeej tseem yog tej yam tsis tau txaus uas yuav pab kom lwm tus nyiam yus.
Nws hais tias "Tej txheej txheem sib tham ua nkauj nraug tau pauv hloov lawm. Tsis yog lawv cov kev qhia rau ib tug twg tias, kuv yeej npaj txhij yuav tham ib tug hluas nkauj/hluas nraug twg rau kuv cov kev tham thawj zaug es txawm yuav pab kom lawv nrhiav tau hluas nkauj. Lawv yeej tau ua ntau zaus li no tab sis yeej nrhiav tsis tau hluas nkauj rau thawj zaug uas lawv tau tham ib tug twg li."
Tsim nyog nrhiav qhov twg thiaj tau ib tug neeg tham ntawm Australia?
Andrew Gung thiaj qhia ib co tswv yim pab kom yus paub pib, uas nws hais tias siv lub vas sab Meetup.com pab yus kom paub neeg coob.
Nws hais tias "Tsis txhob xav tias yog ib co kev mus ntsib tej poj niam los yog ib txoj xub ke yuav tau tham ib tug twg, tab sis xav tias yog ib cov kev pab kom yus paub neeg, ntaus kev phooj ywg nrog tej neeg coj ntseeg ntau yam kab lis kev cai sib txawv, mus koom tej koom txoos ntau yam, los yog mus koom tej koom txoos cuam tshuam txog cov kev kawm ib yam lus twg, thiab tej koom txoos seev cev. Vim yog ib co chaw yuav pab kom muaj kev sib cuag nrog lwm tus, ces mam pib txij ntawd mus, thiab muaj peev xwm pab kom lawv sib paub nrog tej neeg coob ntxiv tuaj uas tej zaum yuav tau ntsib lawv tej phooj ywg tej phooj ywg uas tej zaum kuj yuav tau tham ib tug twg thiab."
Nws kuj xav kom siv cov dating apps thiab.
Nws hais ntxiv tias "Cov dating apps los kuj siv tau zoo thiab. Tab sis kuv xav kom tsis txhob rawm tu siab yog tias sim lawm es ho ua tsis tau raws siab xav. Xav kom yus kho tej dab neeg qhia txog yus tus kheej kom zoo seb yus yog tus neeg zoo li cas thiab yus nyiam tej neeg zoo li cas."
Tre thiab Yovnne nrog nkawv tus me nyuam.
Matchmaking services yog dab tsi?
Tej neeg uas xav siv ib co tswv yim twg tsi ntsees kom haum raws li qhov lawv xav tau muaj peev xwm siv tau cov matchmaking services ntawm Australia pab kom lawv tej ntsib tej hluas nkauj/hluas nraug uas lawv xav tham tiag tiag, los yog xav muaj kev hlub ntev ntxiv tiag. Ua yeej txawv tej dating apps, vim cov services no yuav pab kom lawv ntseeg lawv tus kheej thiab kom nrhiav tau tus neeg haum raws li lawv xav tau tiag.
Yvonne thiab Tre, ces yog ib nkawm niam txiv ntawm Sydney uas tau siv cov matchmaking service pab kom nkawv tau sib ntsib xyoo 2019.
Tre hais tias "Kuv kuj xav nrhiav ib tug hlub tom qab tau mus ncig txawv teb chaws thiab tau paub ib co kab lis kev cai tshiab, ces kuv thiaj xav nrhiav ib tug hlub thaum kuv tau rov qab los rau Australia. Thaum kuv tau rov qab los ces kuv thiaj tau siv ib co matchmaking services thiab tau pab kom kuv tau ntsib Yvonne. Ces wb txawm tau sib ntsib sib cuag kiag tam sim ntawd; thiab wb txoj kev nkauj nraug kuj tau loj hlob txij ntawv los. Wb ob leeg los yeej xav nrhiav kom tau ib tug hlub, ces thiaj tsis yog wb lam sib ntsib tom tej tog kev xwb. Vim wb yeej muaj hom phiaj xav nrhiav kom tau tus hlub tiag,"
Yvonne hais ntxiv tias "Wb los kuj paub xib txuas lus (sib tham) heev thiab wb yeej muaj kev ntseeg siab rau ib tug twg, wb yeej ib txwm sib pab kom ib tug twg muaj kev ntseeg siab rau wb tus kheej. Kuv thiaj xav tias qhov no yog tej yam tseem ceeb heev yuav pab kom muaj txoj kev sib hlub ntev ntxiv tuaj thiab kom ntxeem dhau ntau yam nyuaj."
Tej matchmaking services ntawm Australia yeej muaj hom phiaj pab kom tej hluas uas tsis tau muaj tus hlub muaj peev xwm sib ntsib sib cuag tau nrog tej uas xav nrhiav kev hlub tiag ntev ntxiv tuaj. Source: Moment RF / Ippei Naoi/Getty Images
Cov matchmaking services ua hauj lwm li cas?
Katherine Wei uas yog ib tug matchmaker ntawm Sydney uas yog ib tug Love and Life Coach yeej tau pab tej neeg thoob teb chaws Australia thiab ntawm cheeb tsam Asia tshaj 75,000 tus nrhiav kev hlub tiag.
Nws hais tias yeej muaj tej kev vam kev cia siab sib txawv ntawm tej neeg coj ntseeg ntau yam kab lis kev cai sib txawv.
Ms Wei hais tias "Kuv yeej pab tej neeg Japanese, neeg Suav thiab tej neeg ntawm cheeb tsam Southeast Asia coob heev. Thiab tej neeg no feem coob yeej xav nrhiav poj niam/nrhiav txiv yuav, thiab yeej tau nug nqe lus nug no thaum tseem pib sib tham. Tab sis ntawm Australia no ces yog thaum uas tau nug nqe lus nug no nrog ib tug txiv neej neeg dawb, ces nws txawm hais tias 'Vuag. Kuv nyuam qhuav ntsib tus hluas nkauj no xwb. Thiab nyuam qhuav ntsib nws ua zaum ob xwb es nws txawm siv nug tias seb kuv xav li cas rau cov kev sib yuav ua txij nkawm lawm? Txawm nug tias seb kuv puas tau npaj? Nws thiaj tau hais tias ''Kuv yeej tseem tsis tau paub nws zoo li."
Nws tshab txhais tias cov matchmaking no pab kom yus muaj cov kev xav tob dua cov kev siv cov dating apps.
Nws hais tias "Matchmaking yeej txawv. Kuv yeej ntsib thiab txheeb txhuas tus hluas, kom kuv totaub txog lawv tej kab lis kev cai, tej kev coj taut ua zoo thiab tej hom phiaj ntev tuaj ntxiv uas lawv xav ua. Txuas ntxiv ntawd ces kuv mam hais kom lawv mus ntsib tej neeg uas muaj cov hom phiaj sib haum uas xav nrhiav tus hlub uas xav ua li hais ntawd tiag tiag xwb. Ces thiaj tsis yog lawm kwv yees xwb, thiab pab kom lawv tau txais kev nyab xeeb ntau tuaj ntxiv thiab tsim kom tau cov kev sib ntsib sib cuag sib tham uas muaj tseem ceeb tshaj los yog tob tshaj rau ib tug twg."
Txawm li cas los tsis yog txhua tus yuav siv ib tug coach los yog ib tug matchmaker pab. Vim yeej muaj tej hluas coob heev siv tej zej zog tej koom txoos sib tw, tej chav kawm ntawv los yog cov kev ua hauj lwm yeem tham nrhiav tau kev hlub thiab.
Tab sis Andrew Gung ceeb toom kom tej neeg ceev faj txog cov online scammers thiab. Xav kom yus yuav tsum ntsib tus neeg yus xav tham ntawd rau ntawm tej zej tsoom tej chaw, qhia rau ib tug phooj ywg yus paub tias yus tab tom mus rau qhov twg, thiab tsis txhob qhia tej xov xwm siv nyiaj rau tus neeg yus mus tham ntawd paub.
Yog tias koj los yog ib tug twg koj paub ntsib teeb meem kub ntxhov hauv lub cuab yig ces hu rau lub koom haum 1800RESPECT tus xov tooj 1800 737 732, los sis xav xo (text) ray tus zauv xov tooj 0458 737 732, los yog mus txheeb tau ntawm lub vas sab 1800RESPECT.org.au. Thiab yog tias koj poob rau tej xwm txheej kub ntxhov ti tes ti taw uas yuav rau kev phom sij rau koj txoj sia ces hu rau Emergency Services tus xov tooj Triple Zero (000). Los yog hu thov cov kev pab cuam Men's Referral Service tus xov tooj 1300 766 491 uas lub koom haum No to Violence uas tus tswj.
Subcribe los yog caum mloog tej xov xwm kaw ua suab Australia Explained kom paub txog ntau yam xov xwm tseem ceeb thiab tej lus taw qhia koj koj pib tau lub neej tshiab ntawm teb chaws Australia.
Yog tias koj muaj ib co lus nug dab tsi los yog muaj ib co tswv yim dab tsi? Ces xa email rau peb rau ntawm australiaexplained@sbs.com.au
