Ntsiab lus tseem ceeb:
- Cov kev yus kho yus vaj yus tsev yog tej yam uas muaj neeg nyiam ua heev ntawm Australia no, tab sis kuj yog tej yam tseem ceeb uas yuav tau nkag siab txog tej kev phom sij, tej cai thiab kev nyab xeeb ua ntej yus yuav pib.
- Asbestos, tej xim uas xyaw txhuas thiab tej plua tshauv ces yog ib co uas yuav ua rau tsis tau txais kev nyab xeeb rau ntawm tej tsev qub thiab tej zaum yuav ua raug kev phom sij mob nkeeg tau.
- Yeej muaj ntau yam hauj lwm li txuas hluav taws xob, txuas dej los yog kho tej yam loj ntawm ib lub tsev twg ces yuav tsum yog tej neeg muaj ntaub ntawv xwb thiaj muaj cai ua tau.
- Tsim nyog tej neeg nyuam qhuav pib kho tsev pib tej yam me me ua ntej, kom paub ua tso, thiab npaj kom zoo tias yuav siv nyiaj npaum li cas tso kom thiaj tsis ua rau yus poob nyiaj ntau yog ua yuam kev lawm.
Yeej muaj peb coob leej ntau tus ces yeej yuav tau kho lawv tej vaj tse ua ntuv zus. Tsis hais tej zaum yuav pleev xwim rau ib chav twg los yog siv ntoo pua ib qho chaw, ib lub qab lawj twg tshiab li, cov kev kho tsev no yeej yog tej yam muaj neeg nyiam ua heev ntawm Australia.
Kribashini Hannon uas yog tus building and development manager paub ua tej hauj lwm no, yog tus DYI renovator, thiab yog tus teeb tsa lub koom haum Build Play Live hais tias "Vim tej neeg pheej tseem xav tias yus muaj peev xwm ua, thiab yeej muaj tej neeg coob heev pheej kho lawv tej tsev kheej xwb. Kuv xav tias yeej muaj tej neeg nyiam ua li no ntau tuaj ntxiv lawm, vim tej nqe kho los kim heev tam sim no, thiab pheej yuav tau them ib tug twg tuaj pab kho ib yam dab tsi ntawm yus tsev,'' tsis tas li ntawd los tej no kuj yog tej yam tau txais txiaj ntsim zoo rau yus, tab sis kuj tseem ceeb thiab uas yuav tau xyuas kom tau kev nyab xeeb thiab xyuas kom ua raug cai.
Xyuav kom tau txais kev nyab xeeb thaum tham txog tej asbestos thiab lwm yam khoom yuav tsim tau teeb meem kev phom sij
Ua ntej yus yuav pib ua ib yam dab tsi, tsis hais loj los me li, kev nyab xeeb tsim nyog yuav tsum yog thawj yam uas yus kub siab txog ua ntej. Txhais tias kawm kom yus paub siv tej twj, hnav tej ris tsho pov puag yug, thiab paub tias ho muaj tej kev phom sij dab tsi yus tsis faj txog ntawm yus tsev.
Ib cov kev phom sij loj tshaj plaws ntawm ntau yam yog dab tsi? Yog asbestos. Ntawm Australia no ces yeej muaj ib lub tsev ntawm peb lub twg ces yeej muaj asbestos, uas yog ib co uas muaj peev xwm ua rau mob tau cancer yog yus mus kov raug los yog ua pa nqus tau mus rau yus lub cev.
Yog tias yuav tau tshem tej asbestos, ces tsim nyog yus nrhiav ib tug neeg muaj ntawv tso cai ua tej hauj lwm no los ua tus tshem tej asbestos no tawm. Source: Getty / PixeloneStocker
Tsis tas li ntawd los yeej muaj tej khoom siv coj los tsim vaj tse txog li ntawm 3,000 yam uas tej zaum muaj asbestos, thiab tej tsev tau tsim ua ntej xyoo 1990 ces yog cov uas yuav muaj asbestos.
Asbestos xwb ces kuj tsis ua kev phom sij dab tsi. Tab sis yog tias yus ho txiav ib co khoom ua vaj tse twg uas muaj tej asbestos xyaw ces tej asbestos yuav ya xyaw nrog cua.
John Batty uas yog ib tug ntawm Asbestos Education Committee thiab yog tus EDP Consultants managing director hais tias "Yog tias tej hauj lwm kho tsev uas yus ua yus kheej uas yuav tau tshau/tho/txiav los yog yuav tau dam ib co phiaj zeb twg los yog tej khoom uas muaj tej asbestos xyaw, ces yuav muaj tej hloov tshauv me me ya xyaw nrog tej cua, ces yuav raug nqus mus rau yus tej ntsws,''
Ua ntej yuav pib kho ib yam dab tsi, ces xav kom siv cov checklist ntawm asbestosawareness.com.au los pab yus txheeb seb puas yuav raug kev phom sij dab tsi. Yog yus tsis paub tseeb, ces qhov nyab xeeb tshaj plaws yog hais ib tug neeg paub ua tej hauj lwm no tuaj txheeb yus lub tsev ua ntej.
Yog tias ho yuav tau tshem ib co asbestos mus pov tseg, ces Batty xav kom yuav tau xyuas kom yus tau txais kev nyab xeeb li ntiav ib tug neeg muaj cai tshem tej khoom no tuaj pab yus.
Lwm yam kev phom sij uas yuav tau ceev faj txog ces yog tej xim pleev tsev uas muaj kua txhuas xyaw, uas yeej ib txwm pom muaj ntawm tej tsev qub thiab tej plua plav.
Ua tib zoo tswj tej plua plav ntawm qhov chaw ntawd kiag kom ntau npaum li qhov yus muaj peev xwm ua tau thiab npaj ib lub twj khwb qhov ntswg lim cua los yog siv tej ntaub npog qhov ncauj qhov ntswg uas siv tib zaug xwb pov tsev coj los siv.John Batty
Batty hais tias "Ua tib zoo xyuas kom yus hnav tej khaub ncaws pov puag yus, los yog siv tej twj khwb qhov ncauj qhov ntswg, tsom iav pab yus thaum rhuav ib yam dab tsi, tsis tas li ntawd los ua tib zoo xyuas kom yus ntxuav tes thiab ntsej muag raws li qhov tsim nyog ua ntej yus yuav mus noj mov los yog haus dej, vim tej zaum ua rau yus yuav noj tau tej hmoov tshauv ntawd mus rau yus lub cev thiab."
Kev nyab xeeb yog cov kev looj, hnav tej twj kom haum rau txoj hauj lwm yus ua los yog cov kev paub siv tej twj ntawd tias yuav siv li cas. Source: Getty / AleksandarNakic
Xyuav kom kho tau yus lub tsev raug kev raug cai: thov ntawv tso cai thiab muaj ntawv tso cai ua tau tej hauj lwm ntawd
Ib lub xeev twg ntawm Australia ces nyias yeej muaj nyias tej cai sib txawv coj los siv tswj cov kev kho vaj kho tsev, thiaj yog tej yam tseem ceeb uas yuav tau txheeb nrog yus tej nom tswv zos thiab tej nom tswv tswj tej hauj lwm tsim vaj tse.
Ib co hauj lwm li hluav taws xob los yog txuas dej ntawd ces yuav tsum tau hais kom tej neeg uas muaj ntaub ntawv raug cai ua cov hauj lwm no ua xwb.
Tsis tas li ntawd los yus tseem yuav tau thov ntawv tso cai los ua ib lub tsev loj los yog thov ntawv tso cai mas thiaj muaj peev xwm hloov kho tau ib yam dab tsi loj ntawm yus lub tsev, piv txwv li yuav muab tej ncej ntawm ib sab phab ntsa tsev tshem, los yog yuav txuas tsev los sis yuav ua ib lub qab lawj loj.
Cov kev tsis thov ntawv tso cai tej zaum zoo li yuav pab txuag nyiaj thiab txuag sij hawm, tab sis tej zaum kuj yuav ua rau yus raug teeb meem tsis zoo tau thiab.
Hannon hais tias tej zaum yus kuj yuav raug nplua, raug yuam kom yuav tau rhuav, los yog tej zaum kuj yuav ua rau yus tsev neeg tsis tau txais kev nyab xeeb thiab.
Nws hais tias ''Yeej tsis xav kom yus ntsib ib yam dab tsi ua rau muaj teeb meem rau yus li. Tej hauj lwm uas yus kho yus ib yam dab tsi ntawm yus tsev no ces peb yeej pom tias tej neeg tsis ua tib zoo ua kom dej tsis txhob txeem los ntub, los yog yeej tsis ua tib zoo npaj sab hauv qab ntawm daim plag av uas yus yauv ua ib yam dab tsi kom zoo zoo tso. Ces lub sij hawm ob peb xyoos ces yuav ua rau tej chaw yus kho ntawd tuaj pwm, los yog yuav ua rau tej ntoo lwj, thiab yus yuav tau rov qab los hloov kho txhua yam uas yus kho tiav lawm dua.''
Yog tias yus tseem pib ua cov DIY tshiab xwb, ces xav kom pib ua tej yam me me tso
Geneva Vanderzeil yog ib tug kws DIY uas tau pib ua tej hauj lwm no thaum nws kho nws lub tsev pheej suab ntawm Brisbane, thiab nws hais tias cov DIY no ces kuj yog ib txoj xub ke zoo pab yus txuag nyiaj ... tab sis kuj ceeb toom tias tej zaum yuav ua rau yus yuav tau siv nyiaj ntau tshaj qhov yus kwv yees lawm thiab.
Tej zaum yus pheej xav tias cov kev uas yus kho yus tsev yuav pheej yig vim yus tsis tas them ib tug twg kho, tab sis tej nqe khoom, tej nqe ntiav siv tej twj, tej nqe xa, tej nqe thauj tej khoom siv uas seem coj mus pov tseg, tag nrho tej li hais no sau ua ke ces kuj kim heev lawm thiab.Geneva Vanderzeil
Yog tias cov hauj lwm DIY tseem yog ib co tshiab uas yus tsis tau ua dua, ces xav kom pib ua tej yam me, ua tej yam uas kom tsis txhob muaj teeb meem rau yus kom yus paub ua ua ntej tso.
Hannon hais tias "Yuav ib lub rooj thiab yuav ib co phiaj zeb los, thiab kawm kom yus paub ua ua ntej tso mam li mus kho lub plag chaw da dej.''
Cov kev xav txuag nyiaj yog ib co laj thawj ua rau tej neeg pheej ua cov DIY (yus kho yus), tab sis tej zaum kuj yog tej yam ua rau yus yuav tau them kim dua thiab. Source: Getty / Maskot
"Tsis tas yus yuav yog ib tug kws es mam pib ua ib yam dab tsi. Cov kev ua yuam kev yeej yog ib feem ntawm cov txheej txheem kawm thiab pib ua tej yam dab tsi me los yog pib pleev xwm tsev, uas yog tej yam yooj yim yus ua tau, uas yuav pab kom yus paub ua thiab ntseeg tus kheej ntau tuaj ntxiv.''
READ MORE
#61 Tackling a DIY project (Med)
Subscribe los yog caum mloog tej xov xwm kaw ua suab Australia Explained kom paub txog ntau yam xov xwm tseem ceeb thiab tej lus taw qhia kom koj pib tau lub neej tshiab ntawm teb chaws Australia.
Yog tias koj muaj ib co lus nug dab tsi los yog muaj ib co tswv yim dab tsi? Ces xa email rau peb rau ntawm australiaexplained@sbs.com.au
