Lub koom haum Australian Medical Association (AMA) hais tias lub caij tej neeg mus teev npe coob heev tos kom tau siv zej tsoom tej tsev kho mob, ces tej zejzog toj sab tsis tshua muaj peev xwm siv tau cov kev kho mob, ua ke no los tej chaw kho mob ntiav los kuj raug muab kaw ntau zuj zus tuaj ntxiv.
Tino La Spina uas yog tus coj lub tuam txhab Healthscope uas tswj 37 lub tsev kho mob ntiav hais tias ''lub tuam txhab ''Healthscope Operations'' ces twg raug pawg tswj tshiab los tswj lawm.''
Mark Butler uas yog Australia tus noj tswj dej num noj qab haus huv thiabj hais tias ''yuav tau kub siab txheeb seb yuav pov puag tej chaw kho mob li cas kom lawv muaj peev xwm ua tau tej hauj lwm kho mob, kom tau txais txiaj ntsim rau tej neeg mob thiab tej neeg ua hauj lwm kho mob.''
Ua ke no los tsoom fwv kuj tau tsub nias kom tej tuam txhab muag private health insurance yuav tsum them nyiaj rau cov kev siv private hospital kom ntau tuaj ntxiv thiab hais kom lawv tsis txhob nce tej insurance premiums.
Yeej muaj neeg Australia txog li 40 feem pua tau siv tej tsev kho mob ntiav uas phais tej mob txog 70 feem pua, thiab tej neeg mob txog li 30 feem puas uas mus siv zej tsoom tej tsev kho mob ces yuav tau tos ntev txog 8 teev mam tau ntsib ib tug kws kho mob ntawm Emergency Department ntawm ib lub tsev kho mob.
Dr Danielle McMullen uas yog tus coj lub koom haum AMA hais tias ''Peb tsis muaj tej xov xwm, tsis muaj tej tswv yim npaj tseg yuav ua raws, tsis muaj plan tias peb xav tau tej kws kho mob npaum li cas, xav tau cov kws kho mob li cas thiab xav tau tej neeg mob no mus ua hauj lwm rau qhov twg. Twb tau 10 xyoo lawm uas muaj tej teeb meem no lawm ces thiaj tab tom muaj teeb meem rau peb.''
Dr Raymond Lewindowsky uas yog tus coj lub koom haum sawv cev rau tej kws kho mob toj siab (Rural Doctors Association) hais tias ''Peb yuav tsum tau kho cov kev pab nyiaj rau tej hauj lwm kho mob, thiab nrhiav neeg ua hauj lwm kho mob. Thiab nrhiav tswv yim los daws tej teeb meem no.''
Thiaj tau muaj tej xwm txheej no rau lub caij tej xeev tau los qhia txog lawv tej nyiaj puag xyoo uas tau tshwm nyiaj ntau billion dollars los pab cov hauj lwm kho mob.
Cov kev txheeb txog cov kev pab cuam rau tej poj niam yug me nyuam ntawm tej zos yaj sab xeev New South Wleas xyoo 2024 ces pom tias lawv yeej tsis tshua tau siv tej kev pab cuam raws li qhov tsim nyog vim tsis tau nyiaj txaus.
Dr McMullun thiaj hais tias sawv daws cia siab tias yuav muaj peev xwm los daws tau tej teeb meem tsis tau siv kev kho mob txaus thiab xyuas kom tau txais vaj huam sib luag rau cov kev siv kev kho mob.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follow los yog lwm cov podcasts platforms (iHeart, Amazon Music & Podcasts).
