Cov privacy experts xav kom tej neeg sawv daws yuav tsum qhia rau tsoom hwv paub tam sim no tias lawv tsis pom zoo kom tsoom hwv Australia muab lawv tej xov xwm teev zwm txog kev noj qab haus huv (Health record) coj mus teev zwm khaws cia hauv online.
Sawv daws tsuas muaj sij hawj 3 hlis los txiav txim siab thiab yuav tsum qhia rau tsoom hwv paub mus txog rau hnub tim 15 lub 10 hli ntuj xyoo 2018 no lawm xwb, dhau ntawd tod ces tsoom hwv yuav cia li muag tej neeg cov health data no coj mus khaws cia rau hauv online ntawm lub vas sab My Health Record lawm xwb yog lawv tsis ceeb toom rau tsoom hwv paub.
Dr. Bernard Robertson-Dunn uas yog tus coj pawg tim tseeb (Committe Chair) ntawm lub koom haum Australian Privacy Foundation (APF) qhia tias xav kom tej neeg sawv daws txhob pom zoo tam sim no los yog txiav txim siab rau lub caij 3 hlis pib txij tam sim no mus txog lub 10 hli ntuj nrab xyoo no qhia kom tsoom hwv Australia txhob coj lawv tej xov xwm personal health record coj mus teev zwm hauv online ntawm lub vam sab hais los saum toj no.
Dr. Robertson-Dunn hais tias ' Tsoom hwv tsis muaj cai ua tswv rau tej xov xwm no. Tab sis muaj cai tswj tej xov xwm no. Qhov no txhais tau tais lawv yuav tsis muaj tej xov xwm no rho los yog tshem tawm pov tseg thiab tsuas muag zais kom lwm tus txhob nyiag tau los yog nrhiav tau xwb yog yus xav kom lawv muab pov tseg ces lawv yuav tsis ua li yus hais.'
Tab sis Zeskais (Professor) Meredith Makeham ntawm lub koom haum Digital Health Alliance tsis pom zoo nrog lub tswv yim no thiab cav tias ' cov kev coj tej neeg sawv daws cov health record coj mus teev zwm hauv online yuav tau txais txiaj ntsim ntau yam thiab yuav pab kom tsim tau cov kev tswj kev noj qab haus huv tau txais kev nyab xeeb dua tuaj ntxiv thiab tau txais cov kev kho mob zoo dua tuaj ntxiv.'
Professor Makeham tau hais tias ' peb yeej tseem tsis tau tso siab rau cov security system siv coj los pov puag tej xov xwm no thiab yeej tseem soj thiab sim cov system uas siv coj los pov puag tej xov xwm peeb zeej no tas mus li kom txhob muaj teeb meem dab tsi."
Greg Hunt uas yog Australia tus pwm tsav tswj laj fai noj qab haus huv (Health Minister) los yeej ntseeg tias 'yog ib cov security system zoo thiab tej zaum yuav yog ntiaj teb thawj cov system siv coj los pov puag tej neeg cov xov xwm tswj kev noj qab haus huv. Vim yeej tau muaj pej xeem Australia txog 6 roob tus tej xov xwm raug coj mus teev zwm ntawm lub vam sab My Health Record los tau 6 xyoo no yeej tsis muaj teeb meem dab tsi.'
Tsis tas li no los Mark Diamond uas yog tus coj ntawm lub koom haum National Rural Health Alliance los kuj tau hais ntxiv tias 'yuav ua rau tej kws kho mob muaj peev xwm pab tau tej neeg mob uas nyob cheeb tsam tuaj ntug nroog thiab nyob yaj sab kom txhob raug teeb meem pheej hmoo rau lub caij muaj teeb meem ti tes ti taw rau tej neeg mob txoj sia uas qhov ciaj thiab tuag yog 50-50 feem puas ntawd, thiaj yuav pab cawm tau tej neeg mob txoj sia.'
Yog li ntawd nom tswv thiaj xav txhawb nqa kom tej neeg sawv daws mus txheeb xyuas xov xwm kom ntxaws ntxiv tau ntawm lub vas sab My Health Record Website thiab qhia rau tsoom hwv paub tias lawv puas pom zoo rau tsoom hwv coj mus tso rau hauv online ntawm lub vas sab no mus txog rau hnub tim 15 lub 10 hli ntuj xyoo 2018 no.#
Listen to SBS Radio Hmong program at www.sbs.com.au/hmong on Thursday 6pm AEST (Australian Eastern Standard Time) and Sunday 11am AEST.
You can download SBS Radio App from App Store at https://apple.co/2pLgvCX and from Google Play at http://bit.ly/2GuIRv or you can download podcasts news in Hmong and English from www.sbs.com.au/podcasts/yourlanguage/hmong. and listen to Hmong news in iTunes at https://itunes.apple.com/us/podcast/sbs-hmong/id814724207?mt=2
Besides, you can follow us, click like, share and comments at #SBSHmong website at www.facebook.com/sbshmong.
Call to have a chat with SBS Radio Hmong Program on + 61 3 9949 2259 or sent your comments to comments@sbs.com.au.
