Clinical Psychologist, Dr. Zac Elizabeth Buchanan ntawm Melbourne lub koom haum Psychology Foundation hais tias raws li lub koom haum Andalou Naturals uas yog ib lub koom haum tsim cov khoom pleev tawv nqaij tau mus tshawb fawb nrog cov me nyuam ntxhais hluas thiab tej hluas nkauj hnoob nyoog 18-25 xyoo, ces lawv txheeb tau tias muaj yuav laug txog li ib nrab ntawm tej ntxhais hluas no tau lees tias lawv yeej ua txhua yam kom lawv zoo nkauj. Qhov ua rau lawv ceeb loj tshaj ntawd mas tseem muaj tej ntxhais hluas no txog li ib feem peb mus phais lawv lub cev kom lawv zoo nkauj. Dr. Buchanan hais tias muaj ntau yam laj thawj ua rau lawv muaj tej teeb meem no, xws li, tej zejzog yeej tsub nias poj niam los ntev tias kom lawv yuav tsum yog cov neeg zoob nkauj, thiab tas sim no los tej media thiab social media tseem tau tsub nias thiab tias tsim nyog tej poj niam no lub cev zoo li cas ntxiv thiab.
Kuv xav tias teb chaws yeej ua rau tej poj niam mloog tau tias yog lawv zoo nkauj ces lawv thiaj muaj nqi xwb, thiab yeej tau ua rau tej ntxhais xav li no thaum tseem yau los lawm, vim muaj neeg hais rau nws tias nws zoo nkauj. Tab sis tam sim no tseem muaj tej media thiab social media tsub nias lawv ntxiv thiab tias yog lawv xav yog ib tug neeg ua dab tsi los tau, muaj neeg nyiam thiab muaj neeg saib lawv rau sam xeeb ces lawv yuav tsum yog ib tug poj niam uas tsis muaj chaw tib dab tsi kiag li. Lub tswv yim no thiaj muaj teeb meem loj heev, tsis tas li no los cov kev zoo nkauj no tseem pauv hloov raws li cov fashion ntxiv lawm thiab.
Dr. Zac Elizabeth Buchanan hais tias '' Poj niam cov kev xav ua kom lawv zoo nkauj li pleev phlu, thiab hnav ris tsho kom lawv zoo nkauj ntawd yeej tsis yog ib cov teeb meem dab tsi", vim tib neeg yeej tsis yog yuav zoo nqaij zoo tawv thiab zoo nkauj zoo nraug txhua tus. Tab sis peb cov kev xav yuav ua rau peb ntsib tau teeb meem, thiab yog tej yam tseem ceeb tshaj plaws. Vim yog tias peb tseem muaj lub tswv yim thiab txoj kev xav tias peb yuav tsum yog ib tug neeg zoo nkauj zoo nraug tshaj plaws mas peb thiaj yog ib tug neeg muaj nqi thiab tsim nuj no yog ib lub tswv yim tsis zoo hlo li. Tsis tas li no yog tias peb tseem siv sij hawm los saib iav ntau heev, los yog saib tias seb peb ho zoo li cas los sis xav tias tsim nyog peb zoo li cas ntawd yuav yog ib cov teeb meem cuam tshuam rau peb txoj kev ua lub neej txhua hnub lawm."
Dr. Zac Elizabeth Buchanan yog ib tug clinical psychologist, thiab nws yeej tau ua hauj lwm pab daws ntau yam teeb meem nyuaj siab ntxhov plawv thiab cov teeb meem saib yus tus kheej tsis tseem ceeb nrog tej hluas thiab tej laus los lawm.
Muaj Australia tej ntxhais hluas thiab tej poj niam txog li 94% nyiam cov kev zoo nkauj li yus yug los thiab muab rau yus ntau dua (Andalou-MediaCast) Source: Andalou-MediaCast
Dr. Buchanan hais tias, tsis tsim nyog cov kev zoo nkauj ntawd ua rau muaj teeb meem cuam tshuam rau yus txoj kev tsim nuj.
Tab sis tej ntxhais hluas ho puas totaub txog tias txoj kev zoo nkauj tiag tiag ho zoo li cas? Dr. Buchanan hais tias "Nws xav kom tej poj niam yuav tsum tau nug lawv tus kheej tias yog im li cs lawv thiaj pheej yuav siv sij hawm los saib seb lawv tus kheej zoo li cas? Puas yog tais lawv qaug los yog totaub yuam kev lawm tias, yuav tsum yog yus yog ib tug neeg zoo nkauj xwb es thiaj li yuav ua tau lub neej tsim nuj?
Yog li ntawd Dr. Buchanan thiaj hais tias yuav tau ua zoo xyuas kom peb tsis txhob xav phem los yog hais lus phem rau peb tus kheej, tab sis yuav tsum muaj txoj kev hlub rau peb tus kheej, ua siab zoo rau peb tus kheej thiab qhov tseem ceeb tshaj plaws yuav tsum tau lees paub tias tsis tas peb yuav zoo nkauj 100% es peb thiaj yuav ua tau lub neej tsim nuj nkaus xwb, vim peb lub yeeb yam thiab lub cev ntaj ntsug zoo nkauj li cas ntawd tsuas yog ib feem me me ntawm peb tus kheej tam li yog ib tug tib neeg xwb.
Lub tuam txhab Andalou Naturals cov kev teeb txheeb tseem tshawb tau ntxiv tias pej xeem Australia siv nyiaj ib lub xyoos twg txog li ntawm $ 1 billion mus phais lawv tus kheej kom zoo nkauj zoo nraug, thiab tseem siv nyiaj txog li $350 million mus yuav tej khoom pleev phlu kom tawv nqaij txhob txoom li cov Botox ntawd nkaus xwb thiab. Tsis tas li no tseem muaj tej poj niam mus koom cov kev tshawb fawb no txog li 86% ntseeg tias, lawv muab tej kev phais no saib tseem ceeb dhau lawm, ho yeej tseem muaj ib txhia xav tias tsim nyog lawv yuav tsum tau nrhiav lawv cov kev tswj kev noj qab haus huv los pab kom lawv zoo nkauj.
Dr. Zac Elizabeth Buchanan xav tias vim tej poj niam raug tsub nias kom yuav tsum yog cov neeg zoo nkauj, ces tej zaum thiaj ua rau lawv qaug quav rau tej tshuaj plawv ib ce los yog pleev phlu thiab phais cev kho kom lawv zoo nkauj tau yooj yim. Vim tej services thiab products li hais no los tam sim no yeej muaj siv tau yooj yim thiab pheej yig lawm. Yog li ntawd tej zaum thiaj yuav ua rau tej poj niam xav mus siv tej hais no ntau tuaj ntxiv.
Tsis yog tim tej kev phais no ntau npaum li cas tab sis yog tim kis tias yog vim li cas tej neeg pheej mus phais. Tab sis yog thaum peb ho totaub zoo lawv tias peb tus kheej yeej tsim nuj tshaj tej cev ntaj ntsug uas lwm tus pom tias zoo nkauj thiab zoo nraug ntawd lawm, thiab peb tus kheej lub siab, tej cuj pwm zoo, mus txog tej kawv kawm kev txawj ntse, cov kev sib raug zoo nrog lwm tus, tej no yog tej yam thiaj yuav qhia tau txog peb tus kheej tias yog ib tug neeg tsim nuj npaum li cas tsis yog peb txoj kev zoo nkauj zoo nraug nkaus xwb.
Dr. Buchanan tseem hais ntxiv tias peb yuav tsum tau siv txhua yam tswv yim thiab tau txais kev koom tes los ntawm txhua pawg neeg hauv tej zejzog los nrog daws cov teeb meem cuam tshuam txog peb lub cev ntaj ntsug, txoj kev zoo nkauj zoo nraug, thiab tej teeb meem nyuaj siab ntxhov plawv, mas thiaj yuav daws tau tej teeb meem no. Qhov tseem ceeb tshaj plaws, xav kom peb tam li yog lub zejzog thiab lub tebchaws yuav tsum tsis txhob lees paub lub tswv yim tias yog peb lub cev zoo nkauj zoo nraug xwb mas peb thiaj yog ib tug neeg tsim nuj tsim nqi no. Vim yeej tsis muaj tseeb li hais ntawd tiag, thiab tsuas yog ib feem me me ntawm peb tam li yog ib tug neeg xwb. Thiaj tsim nyog peb yuav tau hais lus zoo rau peb tus kheej tshaj no ntxiv, hlub peb tus kheej tshaj no ntxiv tib yam li tej lus zoo uas peb hais rau peb tsev neeg, tej neeg peb hlub tshua los yog peb tej phooj ywg.
Dr. Buchanan hais tias xav kom cov neeg uas pheej txhawj tias tsam lawv tsis zoo nkauj zoo nraug es pheej nyuaj siab ntxhov plawv thiab muaj kev txhawj xeeb ntawd yuav tsum tau mus thov kev pab cuam raws li qhov tsim nyog rau lub caij lawv xav tau kev pab cuam. Yuav tsum xav rau kis zoo thiab nco ntsoov tias txawm yus tsis zoo zoo nkauj zoo nraug los yeej tsis ua li cas, thiab tsis tas yuav kom yus zoo nkauj zoo nraug 100% es yus lub neej thiaj tsim nuj nkaus xwb, yuav tsum ua tib zoo xyuas kom tej kev zoo nqaij zoo tawv no tsis txhob los ua cov txiav txim tias yus tsim nuj thiab muaj nqi npaum li cas.
Peb muaj peev xwm mus ntsib thiab cuag kws kho mob (General practitioners-GPs) kom tau ntawv mus ntsib cov kws daws teeb meem nyuaj siab ntxhov plawv tau, los yog ho mus txheeb xyuas tau ntau yam xov xwm txog cov teeb meem nyuaj siab ntxhov plawv, txhawj xeeb thiab mob hlwb tau hauv online tau ntawm lub koom haum APS website los tau.
